د چوارچۆڤێ پرۆژێ: "دەشتێت نەینەوا: بەرەڤ ساخكرنا چاندنێ، پالپشتیا پێرابوونێن كەلەپوری یێن كەلتوری ل دەشتا نەینەوا" دا ئەوی كو دهێتە بجھ ئینان ژ لایێ زانكۆیا دهۆك ڤە، تیمێ پرۆژەی چالاكیەك ئەنجام دا ل 5ـی كانوونا دووێ، 2024، كو چەندین سەرەدان ب خو ڤە دگرتن بۆ جهێن ئایینی ل دەشتا نەینەوا، ل شێخان، القۆش ولالش، كو بو كۆمەكا گەنجان هاتبوو رێكخستن ژ ئایینێن جودا جودا: ئیسلام، كرستیان و ئێزیدی.
د. عومران عومەر عەلی، مامۆستایێ كۆلیژا زانستێن سیاسی ل زانكۆیا دهۆك، و د. نزار موحەمەد ئەمین، مامۆستایێ كۆلیژا یاسا ل زانكۆیا دهۆك، یێن كو ئەندامێن پرۆژێ ناڤهاتی نە، ئامادەی ئەڤان سەرەدانان بوون. د. عومران باس ل سەرەدانان كر و گوت: "مە سەرەدانا مەزارگەهی لالش كر و مە پێزانینێن زێدەتر ل دۆر ئایینێ ئیزیدی و پێرابوون و كەلتورێ وی زانین ب رێكا رێبەرەكێ ئیزیدی. پاشی، ئەم بەرەڤ مزگەفتەكێ ڤە چووین ل قەزا شێخان. ل وێرێ، مامۆستایێ ئایینی ل مزگەفتێ باس ل ئایینێ ئیسلامێ كر و كەلتورێ وی و ب تایبەتی بنەمایێن وی یێن گرێدایی پێكڤەژیانێ و قەبولكرنا ئایینێن دیتر. دیسان، مە سەرەدانا دێرەكێ كر ل ئەلقۆش كو ل وێرێ قەشەیەكی ئایینێ كرستیانا نیشان دا د گەل گرنگترین بهایێن وی". دیسان، د. عومران ئاماژە ب وێ چەندی دا و گوت: "هەر گاڤەكا ئایینێن جیاواز نیزیكی ئێك ببن، پتر ئێك و دوو دنیاسن برێكەكێ كو بشێت پێكڤەژیانێ و ئاشتیێ بهێز بێخیت د ناڤبەرا خەلكێ دەڤەرا دەشتا نەینەوا دا."
دیسان، كەوسەر، كو كچەكا مسلمانە ژ قەزا تلكێف، دیار كر: "من گەلەك پێزانین ل دۆر ئایینێ ئێزیدی نەبوون، بەلێ پشتی سەرەدانا مە بۆ لالش، مە پتر ئایینێ ئێزیدی وكەلتور وپێرابوونێن وی نیاسین. مە گەلەك تشتێن هەڤپشك هەنە."
ژ لایەكێ دی ڤە، نسرین عەرەب، كو كجەكا ئێزیدیە ژ قەزا شێخان، دیار كر كو دەمێ سەرەدانا مزگەفتێ كری و گوهداریا مامۆستایێ ئایینی كری؛ گەلەك تشت بۆ ئاشكرا بوون. گوت ژی: "ئەگەر كەسەكی ب شێوەیەكێ نێگاتیڤ باس ل ئیسلامێ كربا؛ دبیت مە باوەركربا بێ مەرەم، بەلێ پا د نوكە دا، ئەم گەلەك راستیێن پوزەتیڤ فێربووین دەربارەی ئیسلامێ."
عومران عەدنان ژی، كو گەنجەكێ كرستیانه ژ تلكێف، كەیف خوشیا خو دەربری ب ڤێ ئەزموونێ و گوت: "مە گەلەك تشتێن نوی زانین ل دۆر ئایینێ ئێزیدی. مە زانی كو مە گەلەك تشتێن هەڤپشك هەنە. و مە داب ونەریت و باوەری و هویرگیریێت مەزارگەهین وان زانین."
بشێوەكێ سەرەكێ، پرۆژێ "دەشتێت نەینەوا: بەرەڤ ساخكرنا چاندنێ، پالپشتیا پێرابوونێن كەلەپوری یێن كەلتوری ل دەشتا نەینەوا" یێ دهێتە برێڤەبرن ژ لایێ چەندین تیمان ڤە ژ زانكۆیا دهۆك، و ب پالپشتیا دارایی یا USAID دهێتە جێبەجێكرن ب هەڤكاری د گەل زانكۆیێن پۆردو، ئیندیانا و نۆتردام، و. ئارمانجا وی بهێزكرنا پێكڤەژیانێ یە و پێشئێخستنا چاندنێ برێكا نەریتێن كەلەپوری یێن خەلكێ دەشتا نەینەوا. و د نوكە دا د بوارێ جێبەجێكرنێ دایە.
راگەهاندنا زانكۆیا دهۆك، 9ـی كانوونا دووێ، 2024
فاطمة محمود
وەرگێران: فاطمة محمود
وێنە: حسێن تتمی