سەنتەرێ بێشكچی بۆ ڤەكۆلینێن مرۆڤایەتی و سەنتەرێ ڤەكۆلینێن جینوسایدێ ل زانكۆیا دهۆك ب هەڤكاری دگەل سەنتەرێ ڤەكۆلینێن جینوسایدێ ل زانكۆیا ئەربیل یا نێڤدەولەتی ئێكەم كۆنفرانسێ زانستی یێ نێڤدەولەتی ل دۆر جینوسایدێ ل رۆژا 14/4/2019 ل هۆلا كۆنفرانسان ل زانكۆیا دهۆك گێرا.
ل رێورەسمێن ڤەكرنا كۆنفرانسی سەرۆكێ زانكۆیا دهۆك پ. د. مصلح دهۆكی د پەیڤەكی دا گۆت دەڤەرا رۆژهەلاتا ناڤین، دەڤەرا هەڤركی و ململانێ و ئێكلاكرنا بەرژەوەندیێن زلهێز و هێزێن هەرێمی و جیهانی بوویە، هێز هەردەم ئالاڤێ ئێكلاكرنێ بوویە، ئێكلاكرنا ب هێزێ دهێتە كرن چ پێ نەڤێت لایەنێ لاواز دێ بیتە قوربانی ڤان هەڤركیان، هەروەسا ئاماژە دا وێ چەندێ كو قەدەرا مەیە كوردستان ژی پارچەكە ژ دەڤەرا رۆژهەلاتا ناڤین، كو د كێشە و هاوكیشێن دەڤەرێ دا هەردەم كوردستان بوویە سوتەمەنیا جەگ و ناكوكیان، نەمازە پشتی (پەیمانا لوزانێ) و دابەشكرنا كوردستانێ ب سەر وەلاتێن دەوروبەر و پێكڤە گرێدانا كوردستانا باشور ب عیراقێ ڤە، هەر بناغەكێ ل سەر شاشیێ بهێتە ئاڤاكرن چەند خۆ راگریت ژی سەركەفتنێ نائینیت.
پ. د. مصلح دهۆكی هەروەسا گۆت زانكۆیا دهۆك هەردەم بزاڤێن وێ ئەون ژلایێ ئەكادیمی و زانستی ڤە پاشترین خزمەتا پێشكێش بكەت، هەروەسا ژ لایێ پەیوەندی و گێرانا چالاكیێن ژ ڤی رەنگی ژی هەردەم خۆ ل رێزێن پێشیێ دیتیە و بۆ ژێگرتنا بابەتێن گرنگ، گێرانا ڤی كۆنفرانسێ نێڤدەولەتی ژی ئێك ژ ڤان پێشەنگیانە، هیڤیا مە ئەوە د ڤان دوو روژان دا بشێین پەیاما ڤی كۆنفرانسی بگەهینین و ئەنجام و راسپاردان بۆ لایەنێن پەیوەندیدار ئاراستە بكەین، دیار ژی كر كو د ڤی كۆنفرانسێ نێڤدەولەتی دا سەربۆرێن وان وەلاتێن جینوساید ب دژی وان هاتینە كرن دێ هێنە بەحس كرن داكو مفایی ژ سەربۆرێن وان ببینین بۆ چاوانیا دانەنیاسینا تاوانا جینۆسایدێ و چەسپاندنا وێ ل دادگەه و ناڤەندێن نێڤدەولەتی، ئەڤ چەندە ژی دێ ڤی كۆنفرانسی دەولەمەند تر لێ كەت.
ل دویف دا پەیڤا زانكۆیا ئەربیل یا نێڤدەولەتی ژلایێ د. محەمەد ئیحسان ڤە هاتە خاندن و تێدا بەحسێ جینوسایدان و دانەنیاسیا جینوسایدان كر و بەحسێ ئارمانجا گێرانا ڤی كۆنفرانسی ژی كر كو ب هەلكەفتا یادا ئەنفالان هاتیە گێران.
ل دویف دا پەنەلێن كۆنفرانسی دەست پێكرن كو بۆ دوو رۆژان دێ د بەردەوام بن و بابەتێن وێ گرێدایی جینوسایدێ و سەربۆرێن وان وەلاتێن جینوساید ب سەردا هاتین.