ب ئامادەبوونا د. داود سلێمان ئەتروشی سەرۆکێ زانکۆیا دهۆک، پشتی دوو کۆمبوونان، بریار هاتەدان جڤاتا نوی یا زانکۆیا دهۆک دەستبکاربیت.
سەرۆکێ زانکۆیا دهۆک راگەهاند "گوهۆرین پرۆسێسەکا پێدڤی و نۆرمالە ل هەر سازیەکێ، ب تایبەتی د سیستەمێ کارگێری و دیمۆکراسی دا، ژبەرکو بەردەوام پێدڤی ب شیان و هزرێن نوی نە، بۆ پێشڤەبرنا ئاستێ زانستی و ئەکادیمی و پێشخستنا کاری".
سەرۆکێ زانکۆیا دهۆک د. داود ئەتروشی، د کۆمبوونا خۆ دا دگەل هاریکارێن سەرۆکێ زانکۆیێ و ئەندامێن بۆری یێن جڤاتا زانکۆیێ گۆت "زانکۆیا دهۆک سوپاسدارێ هەوەیە بۆ رۆلێ هەوە یێ سەرکردایەتیێ د ڤان سالێن بۆری دا، کو پڕی زەحمەت و ئاستەنگ بوون، سەرەرای هەمی کاودانێن نەخۆش و قورس، هەوە نەهێلایە زانکۆیا دهۆک ژ کاروانێ خۆ یێ زانستی و ئەکادیمی رابوەستیت، ئەڤ چەندە ژی پێخەمەت بلندکرنا ناڤێ زانکۆیا دهۆک بوویە".
د درێژاهیا کۆمبوونا خۆ دا د گەل جڤاتا بۆری یا زانکۆیا دهۆک، سەرۆکێ زانکۆیێ خویاکر "زانکۆیا دهۆک ب هەوە سەربلندە و هەمی دەمان هوین جهێ شانازیێنە، هیڤیدارین چەوا د دەمێ بۆری دا زانکۆیا دهۆک مفایەکێ مەزن ژ شەهرەزاییا هەوە دیتیە، د داهاتی دا زانکۆیا دهۆک مفای ژ سەربۆر و شیانێن هەوە ببینیت و هاریکاربن دگەل ئەندامێن نویێن جڤاتا زانکۆیا دهۆک".
پاشی ئەندامێن بۆری یێن جڤاتا زانکۆیا دهۆک، داخوازا سەرکەڤتنێ بۆ ستافێ نوی یێ جڤاتێ خواست هیڤی خواستن د کار و ئەرکێ خۆ یێ نوی دا سەرکەڤتی بن، هەروەسا ئامادەییا خو بۆ هەر راوێژ و هاریکاریەکێ بۆ ستافێ نوی دیارکر، پێخەمەت خزمەتکرن و بەرەڤپێشڤەبرنا زێدەتر یا زانکۆیا دهۆک.
هەروەسا سەرۆکێ زانکۆیێ دکۆمبوونا خۆ یا دووێ دا د گەل ئەندامێن نوی یێن جڤاتا زانکۆیێ، پیرۆزباهیێن خۆ ئاراستە کرن و داخوازا سەرکەڤتنێ د ئەرک و بەرپرسیاریەتیا وان یا نوی دا کر و دیارکر "ئەز گەلەک یێ کەیفخۆشم کو ب ووزە و هێزەکا نوی دگەل ستافێ نوی دەست ب جێبەجێکرنا پلان و ستراتیجیا زانکۆیا دهۆک بکەین، ئەز ب باوەرم ب ڤی ستافێ نوی دێ پێنگاڤێن مەزن و گرنگ هاڤێژین بۆ پتر بلندکرنا ئاستێ زانستی و پێشئێخستنا زانکۆیا دهۆک بەرەڤ قووناغێن باشتر و بلندتر و داخواز ژ ستافێ نوی کر مفا ژ سەربۆر و شارەزاییا ستافی بۆری وەربگرن".
سەرۆکێ زانکۆیێ گۆت ژی "زانکۆیا دهۆک پاشەرۆژا گەنجێن مەیە، خەلکێ مە ژی ڤیانەکا تایبەت بۆ زانکۆیا دهۆک هەیە، ژ بەر ڤێ چەندێ پێدڤیە ئەم زێدەتر گرنگیێ ب کەسێن شارەزا و خودان سەربۆر بدەین، رێزگرتنێ بکەینە بنەمایێ کارێ خۆ".
پاشی ژلایێ خۆ ڤە ئەندامێن نوی یێن جڤاتا زانکۆیا دهۆک، سوپاسیا سەرۆکاتیا زانکۆیا دهۆک کر بۆ راسپاردنا وان ل سەر ئەرکێ وان یێ نوی، و دیارکر کو جهێ شانازیێ یە ئەم بووینە جهێ باوەریێ بۆ سەرۆکاتیا زانکۆیا دهۆک.
جهێ ئاماژە پێکرنێ یە، پشتی دوو کۆمبوونان ل رۆژا ئێکشەمبی، رێکەڤتی ٢٣/١٠/٢٠٢٢ و ل سەرۆکاتیا زانکۆیا دهۆک، ب ئامادەبوونا سەرۆکێ زانکۆیێ هاتینە ئەنجامدان، ئەندامێن نوی یێن جڤاتا زانکۆیا دهۆک دێ دەست بکاربیت.
ئەندامێن جڤاتا زانکۆیا دهۆک یێن دێ دەست ب کار بن ژ ڤان بەرێزێن ناڤێن وان ل خوارێ پێکدهێت:
- د. دلدار حاجی / راگرێ کولیژا پزیشکی
- د. جێمس حەسەدۆ حەیدۆ / راگرێ کولیژا ئەندازیاری
- د. رەمەزان عابد محەمەد / راگرێ کولیژا پەروەردا بنیات-دهۆک
- د. نیعمەتوللا حامد / راگرێ کولیژا پەروەردا بنیات-ئامێدیێ
- د. رەشاد کەمال مستەفا / راگرێ کولیژا پەروەدە-ئاکرێ
- د. ئەبۆ عوبەید عەبدوللا زیاب / راگرێ کولیژا زمانان
- د. سۆزان عومەر رەسوول / راگرا کولیژا دەرمانسازی
- د. محەمەد عەزیز ئیبراهیم / راگرێ کولیژا زانست
- د. زیاد مەحفووز عەبدولقادر / راگرێ کولیژا پەروەردا جەستەیی و زانستێن وەرزشی
- د. سەعید خودێدا عەلۆ / راگرێ کولیژا زانستێن مرۆڤایەتی
- د. محەمەد شوکری شوکر / راگرێ کولیژا ڤێتێرنەری
- د. لەیلا رەسوول / راگرا کولیژا پلاندانانێ
- د. شوکری حەجی سالح / راگرێ کولیژا زانستێن ئەندازیاریا چاندنێ
- د. ئەڤین خالد عەبدولرەحمان / راگرا کولیژا یاسا
- د. نەبەز ئیبراهیم محەمەد / هاریکارێ سەرۆکێ زانکۆیێ بۆ کاروبارێن قوتابیان
- د. دلشاد عەبدولجەبار حەلیم / هـاریکارێ سەرۆکێ زانکۆیێ بۆ کاروبارێن کارگێری و دارایی
- د. لقمان هادی حەسەن / هاریکارێ سەرۆکێ زانکۆیێ بۆ کاروبارێن زانستی و خواندنا بلند