ل رۆژا 8/12/2021 پشكا ئه‌ندازیاریا بایومدیكال ل زانكۆیا دهۆك ووركشۆپه‌كێ ئونلاین دگه‌ل زانكۆیا THM یا ئالمانی ئه‌نجامدان بۆ وه‌رگرتنا پالپشتیا رێكخراوا داد یا ئه‌لمانی بۆ پرۆگرامێ (Biomedical Engineering).
راگرێ كۆلیژا ئه‌ندازیاری ل زانكۆیا دهۆك، د. جیمس حسدو هیدو، دیاركر كو بۆ بده‌ستڤه‌ئینانا پشته‌ڤانیا رێكخراوا داد دڤێت ئه‌ڤ ووركشۆپه بهێنه ئه‌نجام دان كا ڤان هه‌ردوو لایه‌نان چ كریه و گه‌هشتینه چ ئه‌نجام بۆ ئایده‌ی ل دۆر پێشڤه‌برنا ڤی پرۆگرامی، گۆت ژی سه‌رۆكێ زانكۆیا دهۆك، د. داود سلیمان ئه‌تروشی، ژی دڤی ووركشۆپی دا یێ پشكدار بوو، و پشته‌ڤانیا خۆ ژی بۆ ڤی پرۆگرامی دیاركر، هه‌روه‌سا قوتابێن ڤێ پشكێ ژی پشكدار بوون د ووركشۆپی دا.
د. جیمس حسدو هیدو ئه‌و ژی گۆت" كو پشته‌ڤانیا سه‌رۆكاتیا زانكۆیێ دێ پتر یا هاریكار بیت بۆ پشته‌ڤانیا رێكخراوا داد یا ئه‌لمانی، كو رێكخراوا داد پشته‌ڤانیا وان جۆره پرۆگرامان دكه‌ت ئه‌وێن زانكۆیێن ئه‌لمانی دگه‌ل زانكۆیێن ژ ده‌رڤه ئه‌نجام دده‌ن، داكو د پرۆگرامێن وان دا پشكداریێ بكه‌ن".
زانكۆیا دهۆك و زانكۆیا (THM- Technische Hochschule Mittelhessen) یا ئه‌لمانی ل دویف رێككه‌فتنه‌كی پشكا (Biomedical Engineering) ب پالپشتیا رێكخراوا داد ڤه‌كریه، و باوه‌رناما هه‌ڤپشك دده‌نه ده‌رچوویێن ڤێ پشكێ.