زانكۆیا دھۆك ب ھەڤپشكی ل گەل زانكۆیا پنسلڤێنیا یا ئەمریكی بەرنامێ "جیھان د دانوستاندنێ دا" بۆ سالا خواندنێ ٢٠٢٣ – ٢٠٢٤ رادگەھینیت، دشیاندایە قوتابیێن ھەمی كۆلیژێن زانكۆیا دھۆك پشكداریێ بكەن، ب مەرجێ ھەبوونا شیانێن باش د زمانێ ئنگلیزی دا ژبەركو دانوستاندن دێ ب زمانێ ئنگلیزی بن و پێدڤیە ب باشی شیانێن ئاخڤتنێ ب زمانێ ئنگلیزی هەبن، ھەروەسا یا باشترە قوتابی ژ قۆناغێن دووێ و سیێ یێن خواندنێ بن.
ھەر قوتابیەكێ حەزا پشكداریكرنێ ھەبیت، پێزانینێن خۆ "ناڤێ سێیانی، كۆلیژ، پشك، قوناغ، ژمارا موبایلێ و ئیمێل" بۆ ئیمێلێ Dialog@uod.ac بھنێریت، دێ ھەڤدیتن ل گەل ھەمی پێشكێشكاران ھێتە ئەنجامدان بۆ پشتراستبوونێ ژ ھەلبژارتنا وان قوتابیێن دێ گەھنە ئاستێ پشكداریێ، و ھەڤدیتن دێ ل سەنتەرێ رەوشەنبیری و جڤاكی ل زانكۆیا دھۆك ل رۆژا چوارشەمبی رێكەڤتی ٦ـی ئەیلولێ ٢٠٢٣ ل دەمژمێر ١٠ـی سپێدێ ھێنە ئەنجامدان.
ھەژی ئاماژەدانێ یە، بەرنامێ "جیان د دانوستاندنێ دا" ل سالا ٢٠١٨ـێ ھاتیە دامەزراندن، ئارمانجا بەرنامەی پەیداكرنا دەلیڤێ یە بۆ ھەر كەسەكی ژ ھەر جڤاكەكی ل سەرانسەری جیھانێ بۆ پشكداریكرنێ د دانوستاندنا دا ل گەل تاكێن جڤاكێن دی یێن جیھانێ ب مەرەما لێكگوھرینا دیتن و بۆچوونا دەربارەی كێشێن جڤاكی ب مەرەما چارەسەركرنا ئاریشا و باشتركرنا جیھانێ.
قوتابیێن زانكۆیا دھۆك ژی ل چریا دووێ ٢٠٢٢، ب شێوێ تێست پشكداری د سێ دانوستاندنێن بەرنامێ ناڤبری دا كربوو، ل دویڤ دا دەلیڤا پشكداربوونێ ب زانكۆیا دھۆك وەك ھەڤپشكەكێ سەرەكی ھاتە دان، كو ٣٨ قوتابیا ژ ھەردوو رەگەزان ژ كولیژێن جودا یێن زانكۆیا دھۆك بۆ ماوێ ٢١ حەفتیان دەست ب پشكداربوونێ د دانوستاندنا دا ب شێوێ ئونلاین دا كربوو. پشكداریا ھەمی قوتابیان د ئاستەکێ بلند دابوو، ژبەركو نە ب تنێ خودان رەھوانیێن باشێن زمانێ ئنگلیزی بوون، بەلكو خودان رەھوانیێن دانوستاندنا رژد و رازیكەر بوون ب شێوەیەكێ گشتی، د بەرنامەی دا دانوستاندن ل دۆر بابەتێن جودا یێن گرێدای ئاریشێن جڤاكی یێن سەردەم و كەلتۆر و دابونەریت و ڤەگوھازتنا رەوشەنبیریێ بوو.