راگەهاندنا زانکۆیێ، ١١ـی چریا ئێکێ، ٢٠٢٢
کوژیێ ئەمریکی ل زانکۆیا دهۆک ناڤەندەکا سەر ب ئۆفیسا پەیوەندیێن نێڤدەولەتی ڤە ل زانکۆیا دهۆک، هەروەسا راستەوخۆ پەیوەندی دگەل ب بالیۆزخانە و قۆنسلخانەیێن ئەمریکا ل عیراقێ و هەرێما کوردستانێ ب تایبەتی هەنە. ئارمانجا سەرەکی یا کوژیێ ئەمریکی ل زانکۆیا دهۆک پێکهاتیە ژ "چالاکرنا پەیوەندیێن کەلتۆری و زانستی یە د ناڤبەرا ویلایەتێن ئێکگرتیێن ئەمریکا و بالیۆزخانەیان و وەلاتێن مێڤاندار". ژبلی دهۆکێ، کوژیێن هەڤشێوە ل هەولێر و سلێمانیێ ژی هەنە. ب هەمان شێوە ل پارێزگەهـ و باژێرێن جودایێن عیراقێ هەنە ژ وان ژی، بەغدا، بەسرا و نەجەف، کو هەمی ژی پشکەکن ژ تۆرا مەزنا سەنتەرێن ئەمریکی یێن ئەمریکی کو ل سەرانسەری جیهانێ بەربەلاڤن و هژمارا وان ژ 600 سەنتەرا دەرباز دبن و ب هەمان شێوە کارێ خو ئەنجام ددەن.
خزمەتگوزاری و چالاکیێن کوژیێ ئەمریکی ل زانکۆیا دهۆک، نە بتنێ قوتابی و ستافێ ئەکادیمی و یێ کارگێری مفادارن، بەلکو جڤاک ب گشتی و ژ هەمی تەمەنا ژێ مفاداردبن. لەورا کوژیێ ئەمریکی قوتابیێن زارۆک ژی مێڤان دکەت و هندەک چالاکیێن دگەل تەمەنێ وان دگونجن بۆ ئەنجامددەت و وان هانددەت فێری زمانێ ئنگلیزی ببن وەکو گرنگترین و بەربەلاڤترین زمان ل جیهانێ.
د. لقمان هادی حەسەن، هاریکارێ سەرۆکێ زانکۆیا دهۆک بۆ کاروبارێن زانستی لدۆر کوژیێ ئەمریکی خویاکر "کوژیێ ئەمریکی ل سالا 2006ـێ ل زانکۆیا دهۆک هاتیە دامەزراندن، ژلایێ زانکۆیا دهۆک ڤە جهەک بۆ هاتیە دابینکرن داکو بشێت ب رێکا وی خزمەتگوزاریان پیشکێشی قوتابی و مامۆستا و هەروەسا خەلکێ دهۆکی ب گشتی بکەت. ل دەستپێکێ کوژیێ ئەمریکی د ئاڤاهیێ کولیژا یاسایێ ڤە بوو، پاشی هاتە ڤەگوهاستن بۆ ئاڤاهیێ پەرتۆکخانا ناڤەندی، کوژیێ ئەمریکی داتابەیسەک دابینکریە کو قوتابی و ڤەکۆلەر دشێن مفایی ژێ وەربگرن، دگەل پەرتۆکخانەکێ. هەروەسا وۆرکشۆپ و گۆتارا پێکێشدکەت بۆ راستڤەکرنا وان هزرێن شاش یێن پەوەندی ب ئەمریکا ژیانا وان ڤە هەین".
قوتابیێن زانکۆیا دهۆک حەزەکا بەرچاڤ و مەزن بۆ پرۆگرامێن کوژیێ ئەمریکی هەیە، کو ئەڤ کوژیە بۆ ئەنجامدانا کۆمەکا چالاکی و پرۆگرامێن پەرەپێدان و راهێنانا گەنجان کاردکەت. هەروەسا کوژیێ ئەمریکی چالاکیێن هشیارکرنێ پێشکێش دکەت کو تایبەتن ب راستڤەکرنا زانیاریێن شاش دەربارەی کەلتۆر و خەلکێ ئەمریکا ب رێکا وان گۆتار و سمینارێن دهێنە پێکێشکرن. هەروەسا ئاهەنگگێڕان ب هەلکەڤتێن دیرۆکی یێن ئەمریکا کو چەندین هزرێن شاش د جڤاکی دا ئاشکرا دکەن و راستڤەدکەن. ل دویماهیێ پرۆگرامێن فێربوونا زمانێ ئنگلیزی کو ژ پرۆگرامێن بەردەوامێن کوژیێ ئەمریکینە بۆ گرۆپێن جودایێن ناڤخۆ و دەرڤەی زانکۆیێ.
هەروەسا مامۆستایێن زانکۆیێ ژی دشێن مفای ژ پشکەک ژ خزمەتگوزاریێن کوژیێ ئەمریکی وەربگرن، ب تایبەتی پەرتۆکخانا ئەلکترۆنی، کو ژ بوارێن جودا پێکدهێت، کو ئەڤ کوژیە دەمێن پێدڤی و سەقا و کەلوپەلێن گونجای بۆ هەر مامۆستایەکی دابینکرینە داکو مفای پەرتۆک و گۆڤارێن زانستی وەربگریت.
رێڤەبەرێ کوژیێ ئەمریکی مەحموود چاچان جومعە کوژیێ ئەمریکی ب ڤی شوەی پێناسە دکەت "کوژیێ ئەمریکی ژێدەرەکێ زانیاریێن دیتنێ و چاپکری و ئەلکترۆنی یە، کو خەلکی ب کەلتۆر و مێژوو و بوها و سیاسەتا ئەمریکا ئاشنا دکەت ب مەبەستا دروستکرنا پرێن لێکتێگەهشتنێ و گۆتوبێژان دناڤبەرا خەلکێ دهۆکێ و خەلکێ ئەمریکا دا. هەرچەندە سەرەدانکەرێن مە قوتابیێن زانکۆیا دهۆکن، بەلێ کوژیێ ئەمریکی بۆ هەمی خەلکێ دهۆکێ و دەرڤەی دهۆکێ ژی ڤەکریە". دیسان رێڤەبەرێ کوژیێ ئەمریکی ئاماژە ب وێ چەندێ کر "ئەم بۆ دابینکرنا چەندین بەرناما کاردکەین کو ئارمانجێن ئەمریکا و یێن ڤێرێ بجهدئینین و خزمەتا جڤاکی دکەن د باژێری دا، وەکی دانەنیاسینا بەرنامەیین لێکگوهارتنا کەلتۆری و ئاشنا کرنا قوتابی و ئەکادیمیان ب وان پرۆگرامێن خواندنێ کو ژ لایێ بالیۆزخانەیا ئەمریکا ل بەغدا ڤە پشتەڤانیا دارایی بۆ دهێتە دابینکرن، بۆ وێ چەندێ ئەو دەرفەتە بۆ پەیداببیت بۆ بدەستڤەئینانا شیان و زانیاریان، پاشی د خزمەتکرنا جڤاک و باژێرێ دهۆکێ دا بکاربینن. هەروەسا پێشکێشکرنا چەندین بەرناما بۆ پەرەپێدانا کارامەیی و شیانێن گەنجان د باژێڕێ دهۆکێ دا، ب تایبەتی بەرنامێ دیپلۆماسیا گەلێری، کو ئارمانجا ژێ ئەوە کو گەنجان بکەینە وەلاتیێن جیهانی کو بشێن تەماشای ئاریشێن جیهانێ بکەن و لدویڤ دیتنێن خۆ پشکداریێ د دابینکرنا چارەسەریان دا بکەن".
جهێ ئاماژە پێکرنێ یە، کوژیێ ئەمریکی ل زانکۆیا دهۆک خزمەتگوزاریێن خۆ و ئاسانکاریێن د بوارێ ڤەکۆلینێن زانستی دا بێ بەرامبەر پێشکێشی هەر کەس و گرۆپەکێ دکەت، چ ل ناڤ یانژی دەرڤەی زانکۆیێ بیت.