كۆلیژا پزیشكی ل زانكۆیا دھۆك پشتبەستنا تمام وەك دەستكەڤتەكێ مێژوویی بدەستخۆڤەئینا، ئەڤەژی پێنگاڤەكا مەزنە د مەیدانا فیركرنا پزیشكی ل ھەرێما كوردستانێ و عیراقێ. بدەستڤەئینانا ڤی دەستكەڤتێ مەزن د كونگرەكێ رۆژنامەڤانیدا ل ھۆلا كۆنفرانسا ل زانكۆیا دھۆك ھاتە راگەھاندن، ب ئامادەبوونا د. داود سلێمان ئەتروشی، سەرۆكێ زانكۆیا دھۆك و ستافێ ئەكادیمی یێ كۆلیژا پزیشكی و مێھڤانێن زانكۆیێ.
د. دلدار حاجی موسا راگرێ كۆلیژا پزیشكی بۆ بدەستڤەئینانا ڤی دەستكەڤتێ گرنگ سوپاسیێن خۆ ئاراستەی ھەر لایەنەكێ پشكدار كر، دیسان جەخت ل سەر وێ چەندێ كر كو بدەستڤەئینانا پشتبەستنێ نە ب تنێ باوەرنامەكە ل سەر پێگیریا كۆلیژا پزیشكی ب سەركەڤتنێ، بەلكو رەنگڤەدانا ھێز و ئیرادە و كارێ رژدە بۆ ستافێ ئەكادیمی و كارگێری و قوتابیێن كۆلیژێ. دیسان د. دلدار حاجی ئاماژە دا وێ چەندێ كو پرۆسێسا پشتبەستنێ گەلەكا ب زەحمەتە و پرۆسێسەكا گشتگیرە، دیسان ناڤبری دوپاتكر كو كۆلیژا پزیشكی بەرزترین پیڤەرێن مەشقدانا كلینیكی دابیندكەت.
ھەروەسا د پەیڤا خۆدا سەرۆكێ زانكۆیا دھۆك د. داود سلێمان ئەتروشی، جەخت ل سەر گرنگیا ڤی دەستكەڤی بۆ زانكۆیا دھۆك و پارێزگەھا دھۆكێ و ھەرێما كوردستانێ كر و داخازكر زانكۆیا دھۆك ھەولێن رژد بدەت بۆ ب دەستڤەئینانا پیشەنگیێ د بەرھەڤكرنا بسپۆرێن بوارێ ساخلەمیێ ل ھەرێما كوردستانێ.
ھەژی ئاماژەدانێ یە، پرۆسێسا پشتبەستنێ ل مەھا چریا دووێ ٢٠٢٢ دەستپێكریە، كو ھەلسەنگاندنا گشتگیر بۆ ھەمی پێكھاتێن كۆلیژا پزیشكی د پرۆسێسەكا ھویر و تێر و تەسەل بۆ پرۆگرام و بابەتێن خواندنێ و پیڤەرێن وەرگرتنێ و ژێرخانا كۆلیژێ ھاتیە كرن، ئەڤ ھەلسەنگاندنا ھویر بوویە ئەگەرێ ب دەستڤەئینانا پشتبەستنێ كو كۆلیژا پزیشكی یا زانكۆیا دھۆك دئێخیتە گۆپیتكا فێركرنا پزیشكی ل كوردستانێ.
دیسان د. دلدار حاجی دوپاتكر كو ئەڤ دەستكەڤتە باوەرنامەكە ل سەر ھێزا ئیرادا كۆلیژێ د پێشئێخستنا فێركرنا پزیشكی و خزمەتێن چاڤدێریا پزیشكی ل ھەریما كوردستانێ و عیراقێ. ھەروەسا سوپاسی ئاراستەی ستافێ ئەكادیمی و كارگێری و قوتابیێن كۆلیژا پزیشكی كرن، ھەروەسا جەخت ل سەر پێگیریا كۆلیژا پزیشكی ب پاراستن و پەرەپێدانا پیڤەرێن خۆ یێن بلند كر.
ھەروەسا سەرۆكێ زانكۆیا دھۆك د. داود ئەتروشی پێگیربوونا زانكۆیا دھۆك ب جیاوازیێ د بوارێ فێركرنێدا و جھێ خۆ د بەرزكرنا ئاستێ فێركرنا زانستی دا ب بەرز نرخاند، دیسان گەشبینیا خۆ ب پاشەرۆژا كۆلیژا پزیشكی و شیانا وێ ل سەر پێشكێشكرنا پشكداریێن پربھا د كەرتێ پزیشكی و ساخلەمیێ دا نیشاندا.
زانكۆیا دھۆك د داھاتیەكێ نێزیك دا دێ د رێورەسمەكێ ژ ھەژی دا ئاھەنگەكێ ب ھەلكەڤتا بدەستڤەئینانا پشتبەستنێ و دێ ئەنجامێن وێ ھێنە راگەھاندن. ئەڤ دەستكەڤتێ گرنگ نە ب تنێ ئاستێ كۆلیژا پزیشكی بلند دكەت، بەلكو رەنگڤەدانا پێكڤەكاركرنا ستافێ كۆلیژێ ھەمیێ بۆ سەركەڤتنێ د مەشقدان و ئەنجامدانا ڤەكۆلینا دیاردكەت.
بدەستڤەئینانا پشتبەستنێ ژلایێ كۆلیژا پزیشكی ل زانكۆیا دھۆك باوەرنامەكە ل سەر پێكڤەكاركرن ب گیانێ تیمێ د پێشكێشكرنا فێركرنەكا كلینیكی یا پلە ئێك و پێشئێخستنە چاڤدێریا ساخلەمیێ ل ھەرێما كوردستانێ. ئەڤ دەستكەڤتە نە ب تنێ جھێ شانازیێ یە بۆ كۆلیژا پزیشكی و زانكۆیا دھۆك، بەلكو دەستكەڤتەكە پارێزگەھا دھۆكێ و ھەرێما كوردستانێ ھەمی شانازیێ پێ دبەت.
ئەنجومەنێ نیشتیمانی یێ پێدانا پشتبەستنێ بۆ كۆلیژێن پزیشكی NCAMC ب شێوەیەكێ فەرمی ل عیراقێ ل ٢٢ـی نیسانا ٢٠١٥ ھاتیە دامەزراندن، كو بەری ھینگێ ب ناڤێ لیژنا نیشتیمانی یا كۆلیژێن پزیشكی ل عیراقێ NACMCI بوو و سەر ب رێڤەبەریا دلنیا جۆری و پشتبەستنا ئەكادیمی یە یێ ب سەر دەستەیا ھەلسەنگاندنا زانستی و سەرپەرشتی NCAMC كو پێنگاڤێن گرنگ د پرۆسێسا پێدانا پشتبەستنێ بۆ كۆلیژێن پزیشكی یێن جودا ل عیراقێ ھەنە. ئەركێ وێ یێ سەرەكی گەرەنتیكرنا پشتبەستنكرنا كۆلیژێن پزیشكی یە ل سەرانسەری عیراقێ. د ھەمان دەمدا NCAMC ھەولا دابینكرنا پێدڤیێن سەرەكی بۆ پشتبەستنێ ژلایێ رێكخراوێن وەكو ئێكەتیا جیھانی بۆ فێركرنا پزیشكی WFME ددەت. دیسان ژ ئارمانجێن وێ باشكرنا جۆریا چاڤدێریا ساخلەمیێ ل عیراقێ ب رێكا بەرنامێ پشتبەستنا بھێز و پێگیربوون ب باشكرنا پیڤەرێن فێركرنا پزیشكی.
زانكۆیا دھۆك
زانكۆیا دھۆك زانكۆیەكا حكومی یە ل باژێرێ دھۆكێ، ب دویراتیا 150 كیلومەترا ژ باكورێ رۆژئاڤا ھەولێرێ – پایتەختێ ھەرێما كوردستانا عیراقێ. باژێرێ دھۆكێ دكەڤیتە د گەلیەكێ جواندا دەوروبەرێن وی چیایێن بلندن. كەمپا زانكۆیێ دەڤەرەكا كەسك یا مەزنە ل لایێ رۆژئاڤا باژێری و دیمەنەكێ جوان بەرامبەر باژێرێ دھۆكێ و سرۆشتێ دەوروبەر ھەیە. زانكۆیا دھۆك ل چریا ئێكێ 1992 ھاتیە دامەزراندن. ب دوو كۆلیژەیا ب تنێ دەستپێكریە بۆ دابینكرنا داخازیا دەڤەرێ ژ دەرچوویێن بسپور. نوكە زانكۆیا دھۆك ژ 19 كولیژا پێكدھێت كو 67 پشكێن زانستی بخۆڤەدگریت. پتری 24000 قوتابی ل زانكۆیا دھۆك دخوینن و پتری 4000 كادرێ ئەكادیمی و كارگێری ھەیە. قوتابیێن زانكۆیا دھۆك د ناڤ باشترین جڤاكێن ئەكادیمی ل دەڤەرێ دخوینن، د بوارێن جودا دا وەكو چاندن، پزیشكی، پزیشكی فیتێرنەری، تەلارسازی، ئەندازیاری، زانستێن مرۆڤایەتی، زمان، پەروەردا بنەرەت، ئابور و پلاندانانا جھەكی. زانكۆیا دھۆك ھەڤپشكیەكا بھێز ھەیە ب رێكا پەیوەندیێن خۆ ل گەل چەندین سازیێن خواندنا بلند و سەنتەرێن ڤەكۆلینان ل سەرانسەری جیھانێ وەكو: زانكۆیا بوردو، زانكۆیا ئیندیانا IU، زانكۆیا نیویورك NYU، زانكۆیا نوتردام ND، زانكۆیا ئەركنساس ل لیتل رۆك UA، زانكۆیا بریدج ووتر ل ویلایەتێن ئێكگرتی یێن ئەمریكا، زانكۆیا وارسو ل پۆلەندا، زانكۆیا گلاسكۆ ل ئسكوتلەندا، زانكۆیا توینتی ل ھۆلەندا، زانكۆیا لایبزیگ، زانكۆیا LLC، زانكۆیا ئولدنبۆرگ، زانكۆیا فیشتا، زانكۆیا فلینسبۆرگ، زانكۆیا دورتموند TU، زانكۆیا گیسین THM ل ئەلمانیا، زانكۆیا توسیكا، زانكۆیا پاڤیا، زانكۆیا ساپینزا ل ئیتالیا، زانكۆیا دیۆستۆ، زانكۆیا بەرشەلۆنا و زانكۆیا گەرەنادا UGR ل ئسپانیا، زانكۆیا لوند ل سوید، زانكۆیا ساسكس ل بەریتانیا، زانكۆیا تامبیری ل فنلەندا، زانكۆیا شاریقە و زانكۆیا خورفكان ل ئیمارات، و چەندین زانكۆیێن دی. دیسان زانكۆیا دھۆك ئەندامەكا چالاكە ل ئێكەتیا نێڤدەولەتی یا زانكۆیان IAU و ئێكەتیا زانكۆیێن دەریا ناڤەراست UNIMED و ئێكەتیا زانكۆیێن عەرەبی AARU.
راگەهاندنا زانکۆیا دهۆک؛ ١٩ـی ئیلۆن ٢٠٢٣
وەرگێران: ماهر کێستەیی