ل رۆژا پێنج شەمبی رێكەڤتی ١٨ـی گولانێ ٢٠٢٣، زانكۆیا دھۆك پێشوازی ل شاندەكێ زانكۆیا گلاسكۆ یا سكۆتلەندی كر، سەرەدانا شاندێ ناڤبری پشكەك بوو ژ دەستپێشخەریا ئیراسموس پلس بۆ كارێ سەرەكی یێ ئێكێ، ڤەگۆھاستن بۆ ناڤدەولەتی، ئامانجا سەرەدانێ پەرەپێدانا ھەڤكاریێن ناڤدەولەتی و بەرفرەھكرنا ھەڤپشكیێ دناڤبەرا ھەردوو زانكۆیا دا بوو.
د. عەلی تەتەر، پارێزگارێ دھۆكێ بخێرھاتنەكا گەرم ل شاندێ ناڤبری كر ل نڤێسینگەھا خۆ ل ئاڤاھیێ پارێزگەھا دھۆكێ، ل دویڤ دا كومبوونەكا بەرھەمدار ل گەل شاندێ ناڤبری ھاتە ئەنجامدان، كو جەخت ل سەر ھەڤكاریێ دناڤبەرا ھەردوو زانكۆیا دا د داھاتی دا ھاتە كرن، ل گەل جەختكرن ب شێوەكێ تایبەت ل سەر باژێریبوون و رھوریشالێن وێ و پێشكەڤتنێن پاشەرۆژێ.
پشتی كومبوونێ ب ناڤونیشانێ "باژێرێن فێربوونێ و ھەڤكاریێن ناڤدەولەتی" ل سەنتەرێ كۆنفرانسا ل زانكۆیا دھۆك ھاتە ئەنجامدان، د ئەڤێ سمینارێ دا مامۆستایێن زانكۆیا گلاسكۆ، مایكل ئوزبورون، جون روبن دیڤیس، ماری رایان، یولیا نیستیروڤا و كریستی وایلد پشكدار بوون، دانوستاندن و لێكگوھۆرینا زانین و شارەزایێن وان د بوارێن جودا یێن ئەكادیمی و جڤاكی ب رێكا نیشاندان و روینشتنا گەنگەشێ ھاتە كرن.
ئێك ژ بابەتێن گرنگ ژلایێ مایكل ئوزبورون ڤە، كو مامۆستایێ زانكۆیا گلاسكۆ ل دۆر "باژێرێن فێربوونێ د دەوروبەرێ جیھانی دا" د ئەڤێ نیشاندانێ دا مایكل ئوزبورون باس ل تێگەھێ "باژێرێ فێربوونێ" و شیانا مفاوەرگرتن ژ ژێدەرێن فێركرنێ كر بۆ پێشئێخستنا ئابووری و فێركرنا گشتگیر، ناڤبری گوت "ئەز یێ ب ھیڤی مە باژێرێ دھۆكێ ببیتە ھەڤپشك و كار بكەت، داكو ببیتە باژێرەكێ فێربوونێ یێن یۆنسكۆ، داكو دەلیڤا دەستڤەئینانا خەلاتێ یۆنسكۆ یێ باژێرێ فێربوونێ ھەبیت.
سەنتەرێ باسكل، یێ كو نڤێسینگەھێن وی ل ھەمی دەڤەرێن ئەفریقیا و ئاسیا و ئوسترالیا و ئەوروپا و ویلایەتێن ئێكگرتی یێن ئەمریكا ھەی، كو نڤێسینگەھا وێ ل باژێرێ دھۆكێ ژی ھەیە، رۆلەكێ كاریگەر د جێبەجێكرنا وان سیاسەتا یێن پەرەپێدانا بارودۆخێن ژیارێ و كاری ل سەر ئاستێ ناڤخۆیی و ھەرێمی دكەن، ئەوژی وەكو ناڤەندەكێ یە بۆ لێكگوھۆرینا پێشكەڤتنێن ناڤدەولەتی د سەرمایا جڤاكی دا و دەڤەرێن فێربوونێ، ھەروەسا پشكداریكرن د پێشئێخستنا ھەر ئێك ژ رەوشا ئابووی و جڤاكی.
دیسان یولیا نیستروڤا، پشكداری ب سمینارەكێ ل دۆر فێركرنا ناڤدەولەتی یا بەراورد ل زانكۆیا گلاسكۆ كر، ناڤبری باس ل ئاڤاكرنا ئاشتیێ و مافێن مرۆڤی و پشكداریكرنا گەنجان كر، ھەروەسا ئاماژە ب رۆلێ كاریگەر یێ پشكداریكرنا گەنجا د ھەولێن ئاڤاكرنا ئاشتیێ ل دەڤەرێن پەراوێزكری و دەڤەرێن زەنگین ل گلاسكۆ دا. نیشاندانا وێ نێرینا گەنحا بۆ ئاشتی و دادپەروەری و مافێن مرۆڤی د ناڤ جڤاكێن وان و رادا پێگیربوونا وان ب ئاڤاكرنا ئاشتیێ و دادپەروەریێ د جڤاكی دا بخۆڤەدگرت.
پشتی نیشاندانێن پشكداران، روینشتنەكا گەنگەشێ ھاتە ئەنجامدان، ھەر پێنج مامۆستایێن شاندێ ناڤبری پشكدار بوون و ژلایێ د. كەمال عەزیز قێتولی ڤە ھاتە برێڤەبرن، د روینشتنێ باس ل بابەتێن گرێدای پێشنیارێن پرۆژێن ڤەكۆلینان و پێشئێخستنا ھەڤپشكیێ ب مەرەما بەرھنگاربوونا بەربەستێن جڤاكی یێن نوی ھاتە كرن، گەنگەشە بوونە جھێ پەرەپێدانا لێكتێگەھشتن و ھەڤكاریێ ب شێوەیەكێ باشتر دناڤبەرا ھەردوو زانكۆیا دا.
ل دویماھیێ شاندێ زانكۆیا گلاسكۆ ل گەل سەرۆكێ زانكۆیا دھۆك، د. داود سلێمان ئەتروشی ل سەرۆكاتیا زانكۆیا دھۆك روینشت و باس ل گرنگیپێدانێن ھەڤپشك د پەرەپێدانا ھەڤپشكی و رێككەڤتنێن داھاتی دا كر، دیسان باس ل شیانێن ھەڤكاریێ یێن بەرھەمدار دناڤبەرا زانكۆیا دھۆك و زانكۆیا گلاسكۆ كر.
ئەڤ سمینارە پێنگاڤەكا گرنگ بوو بەرەڤ بەرفرەھكرنا ھەڤكاریێن ناڤدەولەتی و پەرەپێدانا تێگەھێ فێربوونێ، زانكۆیا دھۆك بەردەوام ھەولا پەرەپێدانا پشكداریكرنێن خۆ ل گەل ھەڤپشكێن ناڤدەولەتی دكەت یێن پشكدار د پێشڤەبرنا فێركرنێ و پێشئێخستنا جڤاكی دا.
راگەھاندنا زانكۆیا دھۆك؛ ١ـی خزیران ٢٠٢٣
راپۆرت: فاطمة مەحمود
وەرگێران: ماھر كێستەیی
فۆتۆ: محەمەد عەبدولكەریم و عەلی بانكی