ل رۆژا شەمبی رێكەڤتی ١٤ـی چریا ئێكێ ٢٠٢٣، شاندەكێ ئیتالی ژ زانكۆیا ساساری یا ئیتالی و نەخۆشخانا زانكۆیا سان رافائێل و كۆمەلا ئیتالی بۆ ھەڤگرتنێ ل گەل خەلكی AISPO یاكو پالپشتیا ھەردوو زانكۆیێن ئیتالی د بوارێ پێشئێخستنا پرۆگرامێن پزیشكی دكەت، سەرەدانا زانكۆیا دھۆك كر و ژ لایێ سەرۆكێ زانكۆیا دھۆك د. داود سلێمان ئەتروشی و راگر و مامۆستایێن كۆلیژێن پزیشكی ڤە ھاتە پێشوازیكرن.

شاندێ ناڤبری ژ سەرۆكێ AISPO فابیۆ سیشیری، مامۆستایێ زانكۆیا ساساری بیرو كابوتشینیللی، رێڤەبەرێ AISPO فیبریكو شیودی، بەرپرسێ ئوفیسا KRI ریبیكا زانوسو، سەرۆكا تیما AISPO ئەلیساندرا روسی، رێڤەبەرێ پرۆژێ AISPO د. بەختیار ئەحمەد، پێكھاتبوون، ئارمانجا ڤێ سەرەدانێ ئەنجامدانا ھەڤكاریێ یە د بوارێن پزیشكی دا بۆ باشتركرنا خزمەتێن پزیشكی و زانینا پێشكێشی قوتابیێن كۆلیژێن پزیشكی دھێتە كرن، ئەوژی ب چەندین رێكا كو د كۆمبوونێ دا ھاتنە گەنگەشەكرن، وەكو ڤەگوھاستنا فەرمانبەر و مامۆستا و قوتابیا و ئاڤاكرنا شیانا و پێشئێخستنا پرۆگرامێن خواندنێ و بەرفرەھكرنا بسپۆریا ل كۆلیژێن پزیشكی ب تایبەتی ژی كۆلیژا پەرستاری.

د كۆمبوونێ دا راگرێن كۆلیژێن پزیشكی و ساخلەمیێ ل زانكۆیا دھۆك دید و بۆچوونێن خۆ دەربارەی پێدڤیێن كۆلیژێن خۆ بۆ گەھشتن ب باشترین ئاستێن خواندنێ و ڤەكۆلینا زانستی پێشكێشكرن. ژ لایێ خۆ ڤە نوینەرێن ھەردوو زانكۆیێن ئیتالی و رێكخراوا AISPO پێشوازی ل وان پێشنیازا كر و وان ژی ھندەك پێشنیاز بۆ خزمەتكرنا كۆلیژێن زانكۆیا دھۆك پێشكێشكرن. ژ پێشنیازێن شاندێ ناڤبری پێكئینانا گرۆپێن ڤەكۆلینا ژ قوتابیێن زانكۆیا دھۆك و زانكۆیا ساساری، زێدەباری پێكئینانا گرۆپێن ڤەكۆلینا ژ مامۆستایێن ھەردوو زانكۆیا بۆ بەرزكرنەکا جۆریا ڤەكۆلینێن ئەنجامدای بۆ ڤێراگەھشتنێ ب ئاستێن ڤەكۆلینێن جیھانی. دیسان گەنگەشا شیانێن پێشئێخستنا مەشقدانا ناڤخۆیی بۆ قوتابیێن ماستەر و دكتۆرایێ ل زانكۆیا ساساری و نەخۆشخانا زانكۆیا سان رافائیل ھاتەكرن.

ھەژی ئاماژێ یە، كۆلیژا زانستێن تەندروستی و كۆلیژا پەرستاری ل زانكۆیا دھۆك ھەر ژ سالا ٢٠٢١ دەست ب پرۆژەكی ل گەل زانكۆیا ساساری و نەخۆشخانا زانكۆیا رافائێل و AISPO، ب ئارمانجا پێشئێخستنا پرۆگرامێن خواندنێ یێن ھەردوو كۆلیژا و مەشقدانا كلینیكی و سەلامەتیا قوتابی و تاقیگەھا. ئەڤ پرۆژە پشتی چەندین سەرەدانێن مەیدانی و كۆمبوون و گەنگەشا ل ناڤبەرا كۆلیژا زانستێن تەندروستی و رێكخراوا AISPO ھاتە ئەنجامدان، كو ل دویماھیا پرۆژەی راپۆرتەكا ھەلسەنگاندنێ بۆ كۆلیژا زانستێن تەندروستی بەرھەڤكربوو. د وێ راپۆرتێ دا ئەو ئارمانج دەستنیشانكرینە یێن جەخت ل سەر ھەلسەنگاندنا كێمیا ئامیر و پێدڤیێن تاقیگەھان كری، ھەروەسا پشتراستبوون ژ پیشەكار و شارەزاییا كادرێ وانەگۆتنێ، دیسان پێداچوون ل بابەتێن خواندنێ و پێداچوون ل برۆتۆكۆلێن سەلامەتیا قوتابیا و و خالێن دی یێن بووینە جھێ گرنگیپێدانا پرۆژەی.

دھێتە پێشبینیكرن ئەڤ ھەڤكاریە بەردەوام ببیت كو كۆلیژێن پزیشكی یێن دی ژی ل زانكۆیا دھۆك بخۆڤەبگریت، دیسان ئەڤ كۆمبوونە دێ بیتە ئەگەرێ پەیدابوونا ھەڤكاریا زێدەتر كو زێدەباری كۆلیژێن پزیشكی، كۆلیژ و بسپۆرێن زێدەتر بخۆڤەبگریت. ب ئەڤێ چەندێ زانكۆیا دھۆك بەرھەڤیا خۆ رادگەھینیت بۆ ئەنجامدانا پرۆگرامێن زێدەتر د پاشەرۆژێ دا ل گەل AISPO و زانكۆیا ساساری و نەخۆشخانا زانكۆیا سان رافائێل، و بھێزكرنا پەیوەندیان ل گەل سازیێن ئیتالی، ھەژی ئاماژەپێدانێ یە زانكۆیا دھۆك د دەمێ بووری دا پەیوەندی ل گەل سازیێن ئیتالی بەستینە و چەندین پرۆژە ب ھەڤكاری ل گەل ئەنجامداینە.

زانكۆیا دھۆك

زانكۆیا دھۆك زانكۆیەكا حكومی یە ل باژێرێ دھۆكێ، ب دویراتیا 150 كیلومەترا ژ باكورێ رۆژئاڤا ھەولێرێ – پایتەختێ ھەرێما كوردستانا عیراقێ. باژێرێ دھۆكێ دكەڤیتە د گەلیەكێ جواندا دەوروبەرێن وی چیایێن بلندن. كەمپا زانكۆیێ دەڤەرەكا كەسك یا مەزنە ل لایێ رۆژئاڤا باژێری و دیمەنەكێ جوان بەرامبەر باژێرێ دھۆكێ و سرۆشتێ دەوروبەر ھەیە. زانكۆیا دھۆك ل چریا ئێكێ 1992 ھاتیە دامەزراندن. ب دوو كۆلیژەیا ب تنێ دەستپێكریە بۆ دابینكرنا داخازیا دەڤەرێ ژ دەرچوویێن بسپور. نوكە زانكۆیا دھۆك ژ 19 كولیژا پێكدھێت كو 67 پشكێن زانستی بخۆڤەدگریت. پتری 24000 قوتابی ل زانكۆیا دھۆك دخوینن و پتری 4000 كادرێ ئەكادیمی و كارگێری ھەیە. قوتابیێن زانكۆیا دھۆك د ناڤ باشترین جڤاكێن ئەكادیمی ل دەڤەرێ دخوینن، د بوارێن جودا دا وەكو چاندن، پزیشكی، پزیشكی فیتێرنەری، تەلارسازی، ئەندازیاری، زانستێن مرۆڤایەتی، زمان، پەروەردا بنەرەت، ئابور و پلاندانانا جھەكی. زانكۆیا دھۆك ھەڤپشكیەكا بھێز ھەیە ب رێكا پەیوەندیێن خۆ ل گەل چەندین سازیێن خواندنا بلند و سەنتەرێن ڤەكۆلینان ل سەرانسەری جیھانێ وەكو: زانكۆیا بوردو، زانكۆیا ئیندیانا IU، زانكۆیا نیویورك NYU، زانكۆیا نوتردام ND، زانكۆیا ئەركنساس ل لیتل رۆك UA، زانكۆیا بریدج ووتر ل ویلایەتێن ئێكگرتی یێن ئەمریكا، زانكۆیا وارسو ل پۆلەندا، زانكۆیا گلاسكۆ ل ئسكوتلەندا، زانكۆیا توینتی ل ھۆلەندا، زانكۆیا لایبزیگ، زانكۆیا LLC، زانكۆیا ئولدنبۆرگ، زانكۆیا فیشتا، زانكۆیا فلینسبۆرگ، زانكۆیا دورتموند TU، زانكۆیا گیسین THM ل ئەلمانیا، زانكۆیا توسیكا، زانكۆیا پاڤیا، زانكۆیا ساپینزا ل ئیتالیا، زانكۆیا دیۆستۆ، زانكۆیا بەرشەلۆنا و زانكۆیا گەرەنادا UGR ل ئسپانیا، زانكۆیا لوند ل سوید، زانكۆیا ساسكس ل بەریتانیا، زانكۆیا تامبیری ل فنلەندا، زانكۆیا شاریقە و زانكۆیا خورفكان ل ئیمارات، و چەندین زانكۆیێن دی. دیسان زانكۆیا دھۆك ئەندامەكا چالاكە ل ئێكەتیا نێڤدەولەتی یا زانكۆیان IAU و ئێكەتیا زانكۆیێن دەریا ناڤەراست UNIMED و ئێكەتیا زانكۆیێن عەرەبی AARU.

راگەھاندنا زانكۆیا دھۆك؛ ١٦ـی چریا ئێكێ ٢٠٢٣

راپۆرت: فاطمة محمود

وەرگێران: ماھر كێستەیی

فۆتۆ: محەمەد عەبدولکەریم