ل رۆژا 6/2/2019 ل سەرۆكاتیا زانكۆیا دهۆك كۆمبوونەكا بەرفرەه ل ناڤبەرا زانكۆیا دهۆك و رێڤەبەریا گشتی یا پەروەردا پارێزگەها دهۆكێ ل دۆر پرۆسا خاندنێ و پێدڤیا پەروەردێ ب مامۆستایێن بسپۆر هاتە كرن.
د ڤێ كۆمبوونێ دا كو سەرۆكێ زانكۆیا دهۆك پ. د. مصلح دهۆكی و رێڤەبەرێ گشتی یێ پەروەردا پارێزگەها دهۆكێ عومەر عەلی د بەرهەڤ بوون ب درێژی بەحسێ پرۆسا خاندنێ ل دەڤەرێ هاتە كرن و رێڤەبەرێ پەروەردێ داخاز ژ زانكۆیا دهۆك كر كو ڤەكۆلینەكا مەیدانی ژ لایێ مامۆستایێن زانكۆیا دهۆك ڤە بهێتە كرن بۆ زانینا ئاستێ قوتابیێن دەڤەرێ و ب تایبەت ئەو قوتابخانێن سیستەمێ وان بوویە ئنگلیزی.
رێڤەبەرێن پەروەردێن رۆژهەلات و رۆژئاڤا یێن سەنتەرێ دهۆكێ و رێڤەبەرێن پەروەردێن ئاكرێ و ئامێدیێ ژی پشكدار بوون دڤێ كۆمبوونێ دا داخاز ژ زانكۆیا دهۆك كر كو ئەو پشك بهێنە بەرفرەه كرن یێن پەروەردێ پێدڤی ب بسپۆریا وان هەی و هەروەسا وەرگرتنا قوتابیان ل وان پشكا بهێتە زێدەكرن داكو ئەو كێماسیا د هندەك بسپۆریان دا هەی بهێتە پر كرن وەكو پشكێن زانستەكان و زمانێ عەرەبی و زمانێ ئنگلیزی.
راگرێن كۆلیژێن پەروەردا بنیات و پەروەردا بنیاتا ئامێدیێ و پەروەردا ئاكرێ ژی د بەرهەڤ بوون دیاركرن كو دێ د هاریكار بن دگەل پەروەردێ چ بۆ وەرگرتنا مامۆستایێن پەروەردێ ل دەواما ئێڤاری یان ژی بەرفرەه كرنا وان پشكێن زانستی ئەوێن پەروەردێ پێدڤی پێ هەبیت.
سەرۆكێ زانكۆیا دهۆك بریار دا كو زانكۆ راگرێ كۆلیژا پەروەردا بنیات ئامێدیێ وەكو نوینەرێ خۆ دەستنیشان بكەت بۆ هەماهەنگیێ ل گەل رێڤەبەریا گشتی یا پەروەردا پارێزگەها دهۆكێ و پەروەردێن قەزایا و هەروەسا دێ كۆبوونێن بەردەوام ژی هەبن هەتا پێكڤە دگەهنە ئەنجامان و ل دویف وان داتا و ئامارێن دهێنە كرن كا پەروەردا گشتی یا دهۆكێ پێدڤی ب چ بسپۆری هەبیت زانكۆیا دهۆك دشیان دایە وان بسپۆریان زێدەكەت و گۆت ژی زانكۆ ب رێكا مامۆستایێن خۆ دێ ڤەكۆلینان ل سەر ئاستێ خاندنا قوتابیان ل دەڤەرێ كەت و ل دویف وان ئەنجامان ل گەل رێڤەبەریا پەروەردێ دێ كار ل سەر وان ئەنجامان هێتە كرن.