١١ قوتابیێن نابینا و کێمبینا یێن کولیژا زانستێن مرۆڤایەتی ل زانکۆیا دهۆک، پشکداری خولەکا تایبەت بوون لدۆر بکارئینانا گۆپالێ سپی و نەهێلانا ئاستەنگێن هاتنوچوونێ و بلندکرنا شیانێن پشتبەستنێ لسەر خۆ. ئەڤ خولە ژ لایێ رێکخراوا هیڤی یا نەحکوونی و ب هەڤکاری دگەل کولیژا زانستێن مرۆڤایەتی ل زانکۆیا دهۆک هاتە ئەنجامدان، کو بۆ ماوێ ٢١ رۆژا بەردەوامبوو و ئەڤرۆ رێکەڤتی ٢٨/٢/٢٠٢٢ بدویماهی هات.
قوتابیێن پشکدار د ڤێ خولێ دا ب ئاوایەکێ تیۆری و پراکتیکی شارەزایی و زانین وەرگرتن، کو رۆژانە ژ لایێ راهێنەر د. نەسیم حەسەن عەبدی ڤە بابەتێن خولێ هاتنە پێشکێشکرن. هەر قوتابییەک دوو رۆژان ل ژینگەها وی یا زانکۆیێ ئاشنادکر و رۆژەکێ ل ئاوایێن بەزاندنا ئاستەنگێن سەرەکی ل دەرڤەی کەمپا زانکۆیێ شارەزادکر.
هەژی ئاماژێیە کو لسەر بنەمایێ ستانداردێن نیڤدەولەتی، زانین و رێنمایی و شارەزایی د ڤێ خولێ دا بۆ پشکداران هاتە پێشکێشکرن، وەکو؛ چەوانیا روینشتنێ، رێڤەچوونێ لسەر دەرەجکا، ل ناڤ باغچەیان، لسەر رێکێن راست، رێکێن ئاخێ و رێکێن زڤر، چەوانیا دەربازبوونێ ژ جاددەیان و هژمارەکا زانین و شارەزاییێن دی یێن تایبەت ب نابینان ڤە.
قوتابیێن پشکدار دلخۆشییەکا مەزن لدۆر ڤێ خولێ دەربری و ئاماژە ب وێ یەکێ دا کو مفایەکێ زۆر هاتە وەرگرتن، چونکو ئاشنابوون لدۆر ژینگەها وان یا زانکۆیێ بابەتەکێ گرنگە و دبیتە ئەگەرێ خورتبوونا هەستێ ب ژێیاتیێ بۆ زانکۆیا دهۆک.