ب ئامادەبوونا وەزیرێ ساخلەمیا ھەرێما كوردستانێ د. سامان حسێن بەرزەنجی، سەرۆكێ زانكۆیا دھۆك د. داود سلێمان ئەتروشی، سەرۆكێ زانكۆیا ئەمریكی – دھۆك راندال رۆدز و رێڤەبەرێ ساخلەمیا پارێزگەھا دھۆكێ د. ئەفراسیاب موسا، كولیژا پەرستاری ل زانكۆیا ئەمریكی ل كوردستانێ كۆنفرانسێ ئێكێ یێ ھەڤشێوەكرنا چاڤدێریاساخلەمیێ (ھەڤشێوەكرنا سەركەڤتنێ: رۆلێ ئێكلاكەر یێ دانەرێن سیاسەتان د زێدەكرنا فێربوونا ل سەر بنەمایێ ھەڤشێوەكرنێ ئاڤادبیت د مەشقدان و فێركرنێ د بوارێ چاڤدێریا ساخلەمیێ دا)، ب درویشمێ "گوھۆرینا فێركرنا چاڤدێریا ساخلەمیێ ل عیراقێ ب رێكا ھەڤشێوەكرنا كلینیكی، نوكە ب رێڤەیە، پاشی چ دھێت" كو ل زانكۆیا ئەمریكی ل ٢٨ـی نیسانێ ٢٠٢٣ ب ئامادەبوونا پزیشك و مامۆستایێن كولیژێن پەرستاری و پزیشكی یێن زانكۆیێن دھۆك و ئەمریكی و مووسل و سۆران و دیانا و زاخۆ ھاتە ئەنجامدان.
ئارمانج ژ ڤی كۆنفرانسی سەرنجدانا بكارئینانا ئامیرە و مۆدێلێن ژیر یان ئاسایی د پێرابوونێن پزیشكی دا، كو قوتابیێن پەرستاری ل كولیژان ل دەستپێكێ راھێنانان ل سەر دكەن و پشتی دەرچوونێ د ژیانا خۆ یا پیشەیی دا د بوارێ پزیشكی و پەرستاریێ دا ئەنجامددەن. سەرەدەری ل گەل ڤان ئامیر و مۆدێلا مفای دگەھینیتە قوتابیان د خزمەتكرنا نەخوشان دا ب شێوەیەكێ باشتر و كێمكرنا رێژا شاشیێن پەرستار و نۆژدارا، هەروەسا ھاریكارێ وانە بۆ شكاندنا ترسێ ژ سەرەدەریكرنێ ل گەل نەخۆشان د پاشەرۆژێ دا. ھەژی ئاماژەكرنێ یە كو ھزرا ھەڤشێوەكرنا مەشقدان و فێركرنێ، ئانكو راھێنان و فێربوونێ ب رێكا نەخۆشەكی ژبلی مرۆڤی ژلایێ كۆنفرانسی ڤە ھاتیە پێشكێشكرن و ئێكەم جارە ل سەر ئاستێ عیراقێ دھێتە پەیرەوكرن، ھەروەسا د. نزار شاكر رێڤەبەرێ وانەیێن كلینیكی دیاركر "ئامیرە و مۆدێلێن ژیر یان ئاسایی جھێ نەخۆشیێن مرۆڤی دگرن و بەرسڤدانێن سرۆشتی یێن وەكھەڤی مرۆڤان پێشكێشدكەن ل دەمێ سەرەدەریكرنا قوتابیێن پەرستاریێ ل گەل دا".
ژ ئەنجامدانێن دشیاندایە قوتابی ل سەر مۆدێل و ئامیرێن ژیر بكەن، كێشانا خوینێ و پیڤانا فشارا وێ و ڤەژاندن و ئەنجامدانا زارۆكبوونا سروشتی و ئامیرێ ھەناسەدانا دەستكرد یا زارۆكا.
د برگەیێن كۆنفرانسی دا چەندین راوێژكار و شارەزایێن چاڤدێریا ساخلەمیێ یێن ناڤخۆ و دەرڤە ژ ئەمریكا و رۆسیا و ئیران و پاكستان و قەتەر و فلیپین، سمینارێن جودا ل دۆر بابەتێ كۆنفرانسی پێشكێشكرن و باس ل گرنگی و مفایێ بكارئینانا ئەڤان جۆرە ئامیران و ستراتیژیێن تایبەت ب وان ڤە كر. ژ دیارترین بابەتان، سمینارا د. جیرفی بیرناردینو راگرێ كولیژا پەرستاری ل زانكۆیا ئەمریكی و رێكخەرێ كۆنگرەی بوو، كو تێدا باس ل گرنگترین ستراتیژیێن پەرستاریێ كر، ئەوژی (Standardized Patients) ئانكو نەخۆشێن ستاندارد، ئەوژی ل دەمێ نۆژدار یان پەرستان ل گەل نەخۆشەكێ دیاركری رێدكەڤیت ل سەر بەردەوامیدانێ ب چارەسەركرنێ و چاڤدێریا رەوشا وی یا ساخلەمی و وەرگرتنا بەرسڤدانێ بۆ چارەسەریێ بەرامبەر گوژمەكێ پارەی، خۆ ئەگەر یێ ھێمایی ژی بیت. ئەڤ چەندە ب مفایە بۆ زانینا ئەنجامێن پشتی مایتێكرنا نۆژداری و چارەسەریێ، كو دشیاندا نینە ئامیرێن زیرەك و مۆدێل ئەڤێ چەندێ پێشكێشی پزیشك یان پەرستاری بكەن.
ھەروەسا ژ ستراتیژیێن دی یێن ھاتینە نیشاندانپ تەكنیكا Moulage ل سەر مۆدێلان، ئەوژی دروستكرنا برینانە ل سەر مۆدێلان، ئەڤەژی یا ب مفایە د ھێزكرنا شیانێن ھەست و سۆزان یێن قوتابیان و ھاریكارە ل سەر شكاندنا ترسێ ل دەف وان ب تایبەتی ل دەمێ تێكەلبوونا وان بۆ حالەتێن نۆژداری یێن ھەستیار یان دیمەنێن نەخواستی وەكو برین و خوینبەربوونێ.
دیسان د. محەمەد دەباغ راوێژكارێ نەشتەگەریا زارۆكا و سەرۆكێ پشكا فێركرنا پزیشكی ل زانكۆیا دھۆك سمینارەك ب ناڤونیشانێ "زێدەكرنا بەرنامێن قێركرنێ یێن ل سەر ھەڤشێوەكرنێ د بابەتێن پزیشكی یێن زانكۆیێ دا ئاڤادبیت" د ڤێ سمینارێ دا باس ل جۆرێن ھەڤشێوەكرنێ كر یێن دشیاندایە د فێركرنا پزیشكی دا بھێنە بكارئینان چ مۆدێلێن ژیر و ھویركاریێن بەرز، یان ناڤنجی یانژی لاواز یانژی تەكنیكێن ژیوارێ گرێمانەیی یان ھەڤشێوەكرنا رۆلێ نەخۆشی ژلایێ ھندەك كەسێن دیاركری ڤە.
زێدەباری ئەڤێ چەندێ، بازنەکێ گەنگەشێ ھاتە پێكئینان و ژلایێ د. نزار عسمەت رێڤەبەرێ ساخلەمیا پارێزگەھا دھۆكێ یێ بەرێ ڤە ھاتە برێڤەبرن و چەندین شارەزایێن ساخلەمیێ تێدا پشكداربوون، د ڤێ بازنەی گەنگەشا گرنگترین ئەنجامدانێن ل سەر بەلگەیان د بوارێ ھەڤشێوەكرنا چاڤدێریا ساخلەمیێ دا ھاتە كرن.
ژبەر پشكداریكرنا زۆر د كۆنفرانسی دا و ئەو ھزرێن نوی یێن ھاتینە پێشكێشكرن كو بوونە جھێ دەستخۆشیا ئامادەبوویان، بریار ھاتە دان كۆنفرانس سالانە بھێتە ئەنجامدان بۆ ڤێراگەھشتنا دویماھی پێشھاتان د بوارێ ھەڤشێوەكرنا چاڤدێریا ساخلەمیێ كو بریارە كۆنفرانسێ بۆ جارا دووێ د سالا بھێت یا خواندنێ دا بھێتە ئەنجامدان.
راگەھاندنا زانكۆیا دھۆك؛ ٨ـی گۆلانێ ٢٠٢٣
راپۆرت: فاطمە مەحموود، فرمێسك حەسۆ و ماھر كێستەیی