ب ئامادەبوونا د. پشتیوان سادق، وەزیرێ ئەوقاف و كاروبارێن ئایینی و د. داود ئەتروشی، سەرۆكێ زانكۆیا دھۆك و قوتابی و مامۆستا و فەرمانبەرێن زانكۆیا دھۆك و هژمارەکا مێڤانێن دەرڤەی زانكۆیێ ئەڤرۆ رێكەڤتی ٣٠ـی ئادارا ٢٠٢٣ ئێكەم وەرزێ رەوشەنبیری ل زانكۆیا دھۆك دەستپێكر.
پەیڤا دەستپێكێ ژ لایێ سەرۆكێ زانكۆیا دھۆك د. داود ئەتروشی ھاتە پێشكێشكرن، كو بخێرھاتنا مێڤانا كر و باس ل گرنگیا رێكخستنا ئێكەم وەرزێ رەوشەنبیری ل زانكۆیا دھۆك كر و گۆت "زانكۆیا دھۆك بەردەوام چالاكیان ئەنجامددەت، ھەرچەندە ب ناڤێ وەرزێ رەوشەنبیری نەبووینە، لێ مە وەك زانكۆیا دھۆك بریاردا سالانە وەرزێ رەوشەنبیری بھێتە ئەنجامدان، ئەوژی ب ئارمانجا دروستكرنا پرەكێ د ناڤبەرا قوتابیێن زانكۆیێ و چالاكیێن رەوشەنبیری دا، دیسان داكو قوتابی و مامۆستایێن زانكۆیێ ل گەل ھەلكەڤتێن رەوشەنبیری ژ دەرڤەی زانكۆیێ د پەیوەندیەكا بەردەوام دا بن".
د ئێكەم رۆژا وەرزێ رەوشەنبیری ل زانكۆیا دھۆك دا، سمینارەك ژلایێ د. پشتیوان سادق ڤە ل دۆر "پەیوەندیێن د ناڤبەرا حکومەتا هەرێمێ و حکومەتا فیدرال دا: خاک، دابەشکرنا دەستهەلاتێ و ژێدەرێن سرۆشتى" ھاتە پێشكێشكرن. ل دەستپێكێ ناڤبری باس ل مێژوویا دابەشكرنا كوردستانێ ژ لایێ ھەڤپەیمانان ڤە پشتی شەرێ جیھانیێ ئێكێ كر، كو مللەتێ كورد ب "مەزلووم و مەغدوور" سالۆخدا، ژبەركو پتری ٤٠ ملیۆن كەسانە و بێ وەلات ماینە. دیسان باس ل رێكەڤتنا سایكس بیكو یا سالا ١٩١٦ـێ د ناڤبەرا رۆسیا و بەریتانیا و فەرەنسا دا كر، یا دەربارەی دابەشكرنا دەڤەرێ د ناڤبەرا ڤان ھەرسێ وەلاتێن زلھێز دا ھاتیە ئەنجامدان، دیسان رێكەڤتنا سیڤەر ل ١٩٢٠ـێ كو وەكو ھیڤیەكێ بوو بۆ كوردان و ل دویڤ دا ب رێكەڤتنا لۆزان ل ١٩٢٣، ئەڤ ھیڤیە ژناڤچوون و ل دویڤ ڤێ رێكەڤتنێ ئەم ب دەولەتا عیراقێ ڤە ھاتینە گرێدان.
د درێژەپێدانا سمینارا خۆ دا، د. پشتیوان سادق باس ل دامەزراندنا دەولەتا عیراقێ كر و ئەو پێشھاتێن ل عیراقێ رویداین، ھەر ژ دامەزراندنێ ھەتا سالا ١٩٥٨ـێ و ل دویڤ دا ھەتا سەرھلدانا بوھارا ١٩٩١ـێ، كو ناڤبری بریارا ٦٨٨ یا نەتەوەیێن ئێكگرتی یاكو د بەرژەوەندیا گەلێ كورد دا ھاتیە دەركرن و ب باشترین دەستكەڤت بۆ كوردان ھەژمارت و گۆت "پشتی رێكەڤتنا سیڤەر، بۆ ئێكەم جار ناڤێ كوردان ل سەر ئاستێ نێڤدەولەتی ل سالا ١٩٩١ـێ ل دەمێ دەركرنا بریارا ٦٨٨ و ل دویڤ دا دانانا ھێلا ٣٦ یا دژەفرینێ، ئەڤەژی دەستكەڤتەكێ گرنگە د مێژوویا بزاڤا رزگاریخوازیا كوردی دا".
دیسان ناڤبری باس ل رەوشا ھەرێما كوردستانێ و عیراقێ پشتی سالا ٢٠٠٣ یێ كر و باس ل پەیوەندیێن د ناڤبەر حكومەتا ھەرێمێ و حكومەتا فیدرال دا كر و دیاركر كو مە چەندین ئاریشە ل گەل حكومەتا فیدرال ھەنە و ئاریشا سەرەكی نەبوونا باوەریێ یە، دیسان پاشگەزبوونا لایەنێ عیراقی ژ پەیمانێن خۆ، ھەر ژ كەڤن دا بوویە ئێك ژ ئەگەرێن نە گەھشتن ب چ رێكەڤتنان ل گەل لایەنێ عیراقی.
ل دویماھیێ قوتابیان پرسیار دەربارەی بابەتێ سمینارێ ئاراستەی د. پشتیوان سادق كرن، ناڤبری ژی ژ لایێ خۆ ڤە بەرسڤ ل سەر پرسیارێن وان دا، دیسان د. ھەوار خەلیل تاھر، راگرێ كولیژا زانستێن سیاسى و سەرۆكێ دەستەیا وەرزێ رەوشەنبیری ب ناڤێ زانكۆیا دھۆك سوپاسیا د. پشتیوان سادق كر بۆ پێشكێشكرنا سمینارێ و ل دویڤ دا سەرۆكێ زانكۆیێ دیاریەكا رێزلێنانێ پێشكێشی د. پشتیوان سادق كر.
راگەھاندنا زانكۆیا دھۆك؛ ٣٠ـی ئادار ٢٠٢٣
راپۆرت: ماھر كێستەیی، فرمێسک حەسۆ و فاطمة محمود
فۆتۆ: محەمەد عەبدولکەریم