بۆ پێشڤەبرنا هەڤکاری ی هەماهەنگیێ د ناڤبەرا زانکۆیا دهۆک و زانکۆیا فلۆریدا دا و د چارچۆڤێ پرۆگرامێ Sister City دا ئەوێ ل ناڤبەرا باژێرێن دهۆک و فلۆریدا، هەردوو هاریکاتێن سەرۆکێ زانکۆیا دهۆک د. ئەحمەد محەمەد سالح و د. لوقمان هادی حەسەن و هژمارەکا ئەندامێن جڤاتا زانکۆیا دهۆک ل ١١/٥/٢٠٢٢ دگەل شاندێ زانکۆیا فلۆریدا کۆمبوون.

پرۆگرامێ Sister City یێ گەینسڤێل، رێکخراوەکا نەحکوومی یە ل فلۆریدا دهێتە پشتەڤانیکرن و بزاڤێ دکەت دەستهەلێن باژێری و ئەندامێن جڤاکی، پەیوەندیێن دۆمدرێژ دگەل (باژێرێن خویشک) ل سەرانسەری جیهانێ دروستبکەن.

د کۆمبوونێ دا د. بهار ئارمەغانی پرۆفیسۆرا هاریکار ل زانکۆیا فلۆریدا دانوستاندن دگەل نوینەرێن زانکۆیا دهۆک کرن بۆ بهێزکرنا هەڤکاری و هەماهەنگیێ دگەل زانکۆیا دهۆک، جڤاتا زانکۆیا دهۆک ژ لایێ خۆ ڤە دیارکر کو دپلاندایە رێککەڤتننامەیەکا تێکگەهەشتنێ دگەل زانکۆیا فلۆریدا ئیمزابکەت ب مەرەما هەماهەنگیەکا باشتر لسەر ئاستێ ئەکادیمی، بۆ پتر خزمەتکرنا جڤاکی، قوتابی و ستافێ زانکۆیێ. جڤاتا زانکۆیا دهۆک خۆشحالیا خۆ ب ڤێ سەرەدانێ و هەماهەنگیا دگەل زانکۆیا فلۆریدا دەربری.