ل رۆژا 30/4/2019 د رێورەسمەكی دا هۆلا مەزن یا چالاكیان ل ناڤەندا قوتابیان ل زانكۆیا دهۆك ب ناڤێ هۆلا خەلەفێ زێباری هاتە ب ناڤ كرن
د رێورەسمان دا سەرۆكێ زانكۆیا دهۆك پ. د. مصلح دهۆكی د پەیڤەكی دا گۆت پێشمەرگە و میدیا كار و هەلبەستڤانێ گەلێ مە خەلەف زێباری، ئەو بێژەرێ ب دەنگێ خۆ خزمەتا دوزا گەلێ خۆ كری، ئەو هەلبەستڤانێ ب هەلبەستا خۆ دەربرینێن ناخێ خۆ دارشتین، ئەو پێشمەرگێ ل شورەشا ئیلونا مەزن پشكداری د شورەشێ دا كری، ئەوا ل سەر ملێن وی یاهاتیە كرن، ئەڤرۆكە دڤێت رێز ل خزمەت و كریارێن وی بهێتە گرتن، خەبات و ماندیبوونا وان ل بەرچاڤێن مە بیت.
پ. د. مصلح دهۆكی هەروەسا گۆت مە ل زانكۆیا دهۆك ئەڤ هۆلە ب ناڤێ هۆلا (خەلەف زێباری) ب ناڤ كر، ژ بۆ وێ چەندێ دەمێ قوتابیێن مە گەنجێن مە ڤی ناڤی دبینن بزانن (خەلەف زێباری) كی بوو و چ بۆ وەلاتێ خۆ كریە، كارێ وی كریارێن وی ل بەرڤ چاڤ بن، چونكو مرۆڤێن ژ هەژی دڤێت هەردەم دچاڤێن هەمیان دا زندی بمینن.
هەر د رێورەسمان دا برازایێ خەلەفێ زێباری عەمید خسرۆ زێباری د پەیڤەكی دا بەحسێ چەند قوناغێن ژیانا خەلەفێ زێباری كرن كو ل سالا 1948 ل گۆندێ بانیێ ل دەڤەرا زێباریا هاتیە سەر دونیایێ و خاندنا سەرەتایی ل گۆندێ نەپاخیێ بدووماهی ئینایە، پاشی هاتیە ئاكرێ و ل دویڤ دا ل زانكۆیا مووسل پشكا ئابووری بەكالوریوس وەرگرتیە، ل سالا 1973 گەهشتیە رێزێن پێشمەرگەیی و پشكداری دشۆرەشا مەزنا ئەیلولێ دا كریە، ل سالا 1974 بێژەرێ ئێزگێ دەنگێ كوردستانێ بوو ل دەڤەرا گلالە، ل سالا 1978 قەستا ئەمریكا كریە و مافێ پەنابەریێ ل وێرێ وەرگرتیە و ل سالا 1991 دبیتە ژ دامەزرێنەرێن رادیۆیا دەنگێ ئەمریكا پشكا زمانێ كوردی ل باژێرێ ناشڤیل و ئێكەم دەنگ بوو ل رادیۆیا دەنگێ ئەمریكا پەخش بووی، ل گۆلانا 2018 ل ئەمریكا وەغەرا دووماهیێ كر