ئەڤ گۆتنا سەرۆكێ زانكۆیا دهۆك، د. داود سلێمان ئەتروشی د روینشتنەكا ڤەكری دا هات دگەل مامۆستایێن كۆلیژێن جودا یێن زانكۆیا دهۆك، كو ب هەلكەڤتا ب دویماهی هاتنا سالا خواندنێ ٢٠٢١-٢٠٢٢ هاتبوو ئەنجامدان.
ل دەستپێكا ڤێ روینشتنا ڤەكری، سەرۆكێ زانكۆیا دهۆك، گۆت "هەردەم مە بزاڤ كرینە دگەل مامۆستایێن زانكۆیێ کۆمببین و دانوستاندنێن ڤەكری ئەنجامبدەین، بەلێ ئەڤە خۆش دەرفەت بوو ب هەلكەڤتا بۆرینا سالا خواندنێ مە ئەڤ روینشتنە ئەنجامدا، داكو باس ل چەند تەوەران بكەین بۆ پێشخستنا زانكۆیێ هەروەسا رۆلێ زانكۆیێ د ئاڤاكرنا وەلاتی و جڤاكی دا.
ل بەراهیێ، د. داود ئەتروشی، باس ل هندەك ژ وان پێنگاڤان كر یێن د بیاڤێ گوهۆرینان دا ل زانكۆیێ هاڤێتین، كو ئارمانج ژێ ئەوە زانكۆ ب كارێ خۆیێ دروست راببیت و مژویلی چ تشتێن دی یێن لاوەكی نەبیت، و بزاڤ بهێنە کرن کولتۆرێن دروست و ساخلەم پتر د ناڤ زانکۆیێ دا پەیداببن.
سەرۆكێ زانكۆیا دهۆك، هەروەسا گۆت" دەمێ مە بریار دای ببینە مامۆستا، بەرپرسیاریا پێشخستنا جڤاكی مە یا ئێخستیە سەر ملێن خۆ، هەروەسا دویڤچوونا وێ پێشڤەچوونێ یا ل جیهانێ پەیدادبیت مە یا كریە كارێ خۆ".
سەرۆکێ زانکۆیا دهۆک هندەک بابەتێن دی ژی ب راشكاوەیی دگەل مامۆستایان ڤەكرن، دەمێ گۆتی "رەخنە ل مە دهێتە گرتن كو ئەم نەشیاینە ب دروستی كولتۆرێ زانكۆیان بجهبینین، بەلێ ئەم شانازیێ ب زانكۆیا خۆ دبەین، و پێشبینیا مە و جڤاكی بۆ زانكۆیێ پترە، زانكۆ كەواتە مامۆستا، مامۆستا ژی كەواتە زانكۆ، جڤاكی پتر ژ زانكۆیێ دڤێت و پێدڤیە ئەم د وی ئاستێ پێدڤی دا بین، و هەتا نوكە ئەم نەشیاینە وی قوتابی دروست بكەین كو پشتی دەرچوونێ پشتبەستنێ ل سەر خۆ بكەت و د ڤی بیاڤی دا رەخنە ل مە دهێتە كرن، گوهۆرینێن کارگێری بتنێ بەس نینن، دڤێت گوهورینا د پرۆگرامێن خواندنێ و شێوازێ وانەگۆتنێ و هندەك بوارێن دی ژی دا بكەین ب مەرەما پێشخستنێ و بەرهەمەكێ باشتر".
سەرۆكێ زانكۆیا دهۆك، ئەو ژی دیاركر كو پلان هەنە بۆ گوهۆرینان، چ یێن کارگێری بن یان یێن زانستی، و گۆت" من باوەری هەیە زانكۆیا دهۆك ب شیانێن مامۆستایێن خۆ، دێ شێت پێشخستنێن پتر ئەنجامدەت".
د بیاڤێ پەیوەندیان ژی دا، سەرۆكێ زانكۆیا دهۆك د پەیڤا خۆ دا دگەل مامۆستایان راگەهاند "مامۆستا د بیاڤێ پەیوەندیان دا دشێت رۆلێ سەرەكی بگێریت و دشێت فەندێن مەزن و پرۆژێن ئەكادیمی بۆ زانكۆیێ بدەستڤەبینیت، ب تایبەتی ژی ئەو مامۆستایێن ل دەرڤەی وەلاتی خواندین. زانكۆیا دهۆك دێ گرنگیێ دەتە ڤی بابەتی و دێ رێزێ ل ماندویبوون و خەمخۆریا وان گریت و كارێ وان ب هەروە ناچیت".
پاشی سەرۆکێ زانکۆیا دهۆک نوینەرێن مامۆستایان داخوازکرنە لسەر ستێجێ و ب دەستقوتانان سوپاسیا هەمیان کر بۆ ئەرک و ماندیبوونا وان، لدویڤدا سەرۆکێ زانکۆیێ و هەرسێ هاریکارێن وی د. ئەحمەد محەمەد سالح، د. لوقمان هادی حەسەن و د. مێڤان عارف عەبدولرەحمان بۆ بەرسڤدانا پرسیار و بۆچوون و تێبینی و رەخنەیێن مامۆستایان روینشتن و ئەڤ روینشتنە ژ لایێ د. نیبار بەدیع، نوینەرێ گشتی یێ مامۆستایان ڤە هاتە برێڤەبرن.
د ڤێ روینشتنا ڤەكری دا چەندین مامۆستا پشكداری دانوستاندنێ بوون و پرسیار و تێبینی و بۆچوونێن خۆ پێشكێشی سەرۆكێ زانكۆیێ و هاریكارێن سەرۆكێ زانكۆیێ كرن، د بیاڤێ سیستەمێ خواندنێ و بابەتێن دیتر یێن گرێدایی وەرگرتنا قوتابیان و كارێن کارگێری ل زانكۆیێ. لدۆر گرنگیا قەبویلکرنا رەخنێ و رۆلێ وێ د پێشڤەبرنێ دا، سەرۆكێ زانكۆیێ گۆت "زانكۆ جهێ هزرا ئازاد و رەخنا ئاڤاكەرە ب ئارمانجا پێشخستنا زانکۆیێ".