زانكۆیا دهۆك ل رۆژا 18/4/2016 سمینارەك ل دۆر هەرێما كوردستانێ و پابەندبوونێن نێڤدەولەتی بۆ د. دیندار زێباری سەرۆكێ لژنا پێداچوون و بەرسڤدانا راپۆرتێن نێڤدەولەتی ل جڤاتا وەزیران ل حكومەتا هەرێما كوردستانێ رێكخست.
ئەڤ سمینارە كو ل ناڤەندا قوتابیان هاتە پێشكێش كرن تێدا سەرۆكێ زانكۆیا دهۆك پرۆفیسۆر د. مسلح دهۆكی و جڤاتا زانكۆیێ و چەند مامۆستا و قوتابی تێدا د بەرهەڤ بوون، د. دیندار زێباری بەحسێ هەرێما كوردستانێ و پابەندبوونێن نێڤدەولەتی كر.
د پشكەكا سمینارا خودا زێباری گۆت نەتەوێن ئێكگرتی ئورگانا هەرە مەزنا نێڤدەولەتی یە كو چەند دەزگەهان بخوڤە دگرت ژ وان ژی كومەلا گشتی كو سالانە كومبوونێن خو ئەنجام ددەت و هەرێما كوردستانێ ژی د چارچووڤێ عیراقێ دا پشكداریێ د وان كۆمبوونان دا دكەت.
گۆت ژی د راپۆرت و سەرەدەریێن نەتەوێن ئێكگرتی دا هەرێما كوردستانێ وەكو وەلاتەكێ خودان كامل سەروەری سەرەدەری ل گەل دهێتە كرن، دیار ژی كر كو ئەڤە دەستكەفتەكێ مەزنە بۆ هەرێما كوردستانێ چونكو ئەڤ هەرێمێن دی یێن فیدرالی ئەڤ سەرەدەریە ل گەل ناهێتە كرن.
د. دیندار زێباری ئەو ژی گۆت كو هەرێما كوردستانێ هەمی ئاسانكاریان دكەت بۆ وان رێكخراو و ئورگانێن نێڤدەولەتی ئەوێن دڤێن بهێنە هەرێما كوردستانێ و چاڤدێریا مافێ مروڤی و هەر بابەتەكێ دیتر بكەن.