د. داوود سلێمان ئەترووشی، سەرۆکێ زانکۆیا دهۆک و ب ئامادەبوونا د. عابد عەلی حەسەن راگرێ کولیژا چاندنێ و سەرۆک پشک مامۆستایێن کولیژا چاندنێ، قوتابیێن پشکا بیستانکاری ل کولیژا ئەندازیاریا چاندنێ پێشانگەها چاندنا شانێن رووەکی و داروبارێن فێقی و جوانکاریێ و پەرتووک و پۆستەرێن گرێدای زانستێ چاندنێ و هەروەسا خوارنێن کوردی ڤەکر. سەرۆکێ زانکۆیا دهۆک ئەڤ پێشانگەهە بەرز نراخاند.
د. داوود ئەترووشی، پشتی ڤەکرنا پێشانگەهێ و ژ نێزیک ئاگەهداربوون لسەر بەرهەمێ قوتابیان، دیارکر "هەر ژ کەڤن دا، دەڤەرا مە ب بەرهەمێن چاندنێ ناڤدارە و شارستانیەتا ڤێ دەڤەرێ ب ئاوایەکێ سەرەکی لسەر چاندنێ بوویە، لەورا ب گرنگ دبینین پشتەڤانیێ ل ڤێ کولیژێ بکەین تاکو د پاشەرۆژێ دا بەرهەمێن مە، پێداویستیا مە پڕبکەن و بهێنە هنارتن بۆ دەرڤەی کوردستانێ".
سەرۆکێ پشکا بیستانکاری و سەرپەرشتێ ڤی پرۆژەی د. رافائێل تۆما دا زانین "ئەڤ پێشانگەهە بەردەوامیدانا وۆرکشۆپەکێ یە ب ناڤونیشانێ (بەرەڤ پێشڤەبرنەکا باشترا بیستانکاریێ) کو دوهی ل زانکۆیا دهۆکێ دەستپێکر و چەندین سمینار تێدا هاتنە پێشکێشکرن و پشتی هندەک چالاکیان، ئەڤرۆ ئەڤ پێشانگەهە هاتە ڤەکرن".
سەرۆکێ زانکۆیا دهۆک وێرای سەرسامیا خۆ ب کار و بەرهەمێن پشکا بیستانکاری ل کولیژا چاندنێ خویاکر، ئەو زانایێن جیهانێ یێن ئەڤرۆ ناڤداربووین، مرۆڤێن وەکو ڤان قوتابیێن بەهرەمەند و چالاک و خەمخۆرن. د سیاسەتا زانکۆیا دهۆک دایە کو گرنگیەکا مەزن ب ڤان شیانان بدەین.