رۆژا چارشەمب، رێکەڤتی ١٣ـی کانوونا ئێکێ ٢٠٢٣، قونسلێ وەلاتێ ھندێ ل ھەرێما كوردستانێ مادان گوپال سەرەدانا زانکۆیا دهۆک کر و ژلایێ د. داود سلێمان ئەترۆشی سەرۆکێ زانکۆیا دهۆک و د. لقمان هادی حەسەن هاریکارێ سەرۆکێ زانکۆیێ بۆ کاروبارێن زانستی و خواندنا بلند، ل کولیژا پەروەردا جەستەیی و زانستێن وەرزشی هاتە پێشوازیکرن.
هەر ل کولیژا پەروەردا وەرزشی و زانستێن جەستەیی و ب ئامادەبوونا د. زياد محفوظ عبدالقادر راگرێ کولیژا پەروەردا جەستەیی و زانستێن وەرزشی، و رێڤەبەرێ پەیوەندیا ل زانکۆیا دهۆک د. نزار ئەمین محەمەد و ژمارەکا ماموستا و وەرزشڤانێن زانکۆیا دهۆک، وەرزشا یوگایێ ب سەرپەرشتیا راهێنەرێ ناڤدار د. جوشی ژ لایێ قوتابێن کولیژا پەروەردا جەستەیی و زانستێن وەرزشی هاتە ئەنجامدان.
پاشان قونسلێ وەلاتێ هندێ و شاندێ دگەلدا سەرەدانا پەرتوکخانا ناڤەندی یا زانکۆیا دهۆک کر و ژلایێ رێڤەبەر و فەرمانبەرێن پەرتووکخانێڤە ب گەرمی هاتنە پێشوازیکرن، ل دویڤ دا کوژیێ پەرتووکێن هندی ل پەرتووکخانا ناڤەندی هاتەڤەکرن، ل دور ڤێ جەندێ ژی، قونسلێ وەلاتێ ھندێ مادان گوپال؛ خوشحالیا خۆ دەربری و سوپاسیا سەرۆکێ زانکۆیا دهۆک کر ب ڤەکرنا کوژیێ پەرتووکێن هندی ل زانکۆیا دهۆک، و ئامادەییا خۆ دەربری بۆ ھەڤكاری و ئەنجامدانا کارێن هەڤپشکێن زێدەتر د بوارێ زانستی و ئەکادیمی و بوارێن جودا دا دگەل زانکۆیا دهۆک.
هەروەسا رێڤەبەرێ پەیوەندیا ل زانکۆیا دهۆک د. نزار ئەمین محەمەد دیارکر: مەرەما سەرەکی ژ ئەڤێ سەرەدانێ بهێزکرنا پەیوەندیانە دناڤبەرا زانکۆیا دهۆک و ناڤەندێن ئەکادیمی ب تایبەتی زانکۆیێن وەلاتئ هندێ د بوارێ زانستی و ئەکادیمی دا، هەروەسا پەیدکرنا دەلیڤێن خواندنێ سکۆلەرشیپ بۆ قوتابی و ماموستایێن زانکۆیا دهۆک ل وەلاتێ هندێ.
ھەژی ئاماژەدانێ یە، زانكۆیا دھۆك د ماوێ بووری دا ھەولێن رژد د بوارێ پێكئینانا پەیوەندیێن ناڤدەولەتی ل گەل سازیێن ئەكادیمی یێن ناڤدەولەتی ددەت، ئەڤەژی بۆ پلان و ستراتیژیەتا زانكۆیا دھۆك دزڤریت كو زانكۆیا دھۆك ببتە زانكۆیەكا جیھانی و سنورێ ناڤخۆیی دەرباز بكەت ب مەرەما مفاوەرگرتن ژ زانین و سەربوورێن زانكۆیێن جیھانی.
راگەهاندنا زانکۆیا دهۆک؛ ١٣ـی کانوونا ئێکێ ٢٠٢٣
راپورت: حسێن تتمی
فۆتو: محەمەد عبدالکریم