پشكا پەروەردا ئاینی ب هەڤكاری دگەل پشكا كۆمەلناسێ ل كولیژا زانستێن مرۆڤایەتی ل زانکۆیا دهۆک، سمینارەک بۆ ڤەکۆلەرا سویسری )كرستین شایۆ( لدۆر دیرۆک و کەتوارێ كەنیسا ناڤەراستا ئاشووری رێکخست، د ڤێ سمینارێ دا، ئەوا ئەڤرۆ رێکەڤتی ٩/٥/٢٠٢٢ ل سەنتەرێ جڤاکی و رەوشەنبیریێ زانکۆیا دهۆک هاتیە پێشکێشکرن، قوتابی و مامۆستایێن زانکۆیێ و کەسایەتیێن ئاینی ژ ئاینێن جودا ئامادەبوون.
د. مزگین محەمەد حەسەن راگرێ كولیژا زانستێن مرۆڤایەتی دیارکر "پشكا پەروەردا ئاینی و كۆمەلناس هاتینە راسپاردن ئەڤێ دكتۆرێ مێڤان بكەن بۆ باسکرنا دیرۆک و کەتوارێ كەنیسا ناڤەراستا ئاشووری، ئەڤ چەندە هەمی د ناڤ پەرتۆكەكا وێ دا هاتیە باسكرن، پێدڤیە هەمی بزاڤێن مە بۆ بجهئینانا سیاسەتا زانکۆیا دهۆک بن و زانکۆیێ پتر نێزیکی جڤاکی بکەین و بهێزترکرنا پێکڤەژیانێ د ناڤبەرا ئۆل و پێکهاتەیان دا دێ خزمەتا جڤاکی کەت و روویەکێ مۆدێرنتر دەتێ".
راگرێ کولیژا زانستێن مرۆڤایەتی ئەو یەکە ژی دیارکر "ئەم وەك راگریا کولیژێ بزاڤێ دکەین پێکڤەژیانا ئاینان ل کوردستانێ هێژ بهێزتر بیت و ئەم ب ئەرکێ خۆ دبینین خۆ ل ڤی بابەتی بکەینە خودان و دیرۆک و کەتوارێ هەڤ بزانین داکو پتر نێزیکی ئێک ببین".
ل دویماهیا ڤێ سمینارێ، دانوستاندن لدۆر ناڤەرۆکا سمینارێ و ئاستێ پێکڤەژیانێ ل هەرێما کوردستانێ ب گشتی و پارێزگەها دهۆکێ ب تایبەتی هاتنە ئەنجامدان.