ب مەرەما نێزیکتر هایداربوونێ ل سەر پرۆسێسا پێشکێشکرنێ بۆ خواندنا بلند (دبلۆما بلند، ماستەر و دکتۆرا) ل زانکۆیا دهۆک، ئەڤرۆ رێکەڤتی ١١ـی نیسانێ ٢٠٢٣، سەرۆکێ زانکۆیا دهۆک د. داود سلێمان ئەتروشی، ل گەل هاریکارێ سەرۆکێ زانکۆیێ د. لوقمان هادی حەسەن، سەرەدانەک بۆ یەکەیا دروستکرنا سۆزنامێن یاسایی بۆ پێشکێشکرنێ بۆ خواندنا بلند ل زانکۆیا دهۆک، ئەوا ل سەنتەرێ رەوشەنبیری و جڤاکیێ زانکۆیا دهۆک هاتیە دانان، ئەنجامدا و ژ نێزیک هایدار بوو کو ئەڤ پرۆسێسە ب شێوەکێ جوان و رێکوپێک دهێتە ئەنجامدان و هەمی ئاسانکاری بۆ پێشکێشکاران دهێنە دابینکرن.
هەر د ڤێ سەرەدانێ دا، سەرۆکێ زانکۆیا دهۆک دانوستاندن دگەل هژمارەکا کارمەندێن ڤێ یەکەیێ و هەروەسا هژمارەکا پێشکێشکارێن خواندنا بلند ئەنجامدان، ئەوژی ب مەرەما زانینا هەر ئاریشە و ئاستەنگەکا هەیی، وان ژی ژ لایێ خۆ ڤە باس ل وێ یەکێ کر کو ئەڤ پرۆسە گەلەک جوان و ئاسان دهێتە ئەنجامدان و هەمی ئاسانکاری بەردەستن.
دهێتە زانین پرۆسێسا پێشکێشکرنێ بۆ خواندنا بلند (دبلۆما بلند، ماستەر و دکتۆرا) ل حەفتیا بۆری ل زانکۆیا دهۆک دەستپێکریە و تاکو ١٤ـی ئەیارێ ٢٠٢٣ دێ یا بەردەوام بیت.
راگەهاندنا زانکۆیا دهۆک؛ ١١ـی نیسانێ ٢٠٢٣
فۆتۆ: هەرمان جانگیر