ب ئامادەبوونا رێزدار عەلی عەونی، بەرپرسێ لقا ئێك یا پارتی دیموكراتی كوردستان، د. دلشاد عەبدولجەبار حەلیم و د. نەبەز ئیبراهیم محەمەد، ھاریكارێن سەرۆكێ زانكۆیا دهۆکێ، جه‌هوه‌ر عه‌لى عه‌زیز، دەڤەردارێ دھۆكێ، عومەر عەلی، رێڤەبەرێ گشتی یێ پەروەردا پارێزگەها دهۆكێ، د. سەعید خودێدا عەلۆ، راگرێ كۆلیژا زانستێن مرۆڤایەتی، راگر و ستافێ كارگێریێ زانكۆیا دھۆك و قوتابی و مامۆستایێن كولیژا زانستێن مرۆڤایەتی و رێڤەبەرێن سازیێن حكومی و ھۆنەرمەند و ھۆنەردوستێن باژێرێ دھۆكێ و دەزگەھێن راگەھاندنێ، یازدەمین پێشانگەھا پشكا ھۆنەرێن شێوەكار ب درۆیشمێ "ھۆنەر ئافراندنا زانست و زانینێ یە" ل كولیژا زانستێن مرۆڤایەتی، ل رۆژا سێشەمبی رێكەڤتی ٢٣ـی گولانێ ٢٠٢٣ ھاتە گێران.
پێشانگەھ ژلایێ رێزدار عەلی عەونی ڤە ھاتە ڤەكرن، ئامادەبوویا گەریانەك ل ناڤ پێشانگەھێ ئەنجامدا و تەماشەی كارێن ھۆنەری یێن قوتابیا كر. د پێشانگەھێ دا ١٨٨ كارێن ھۆنەری یێن ٣١ قوتابیێن قۆناغا چوارێ یێن پشكا ھۆنەرێن شێوەكاری ھاتنە نیشاندان، كو وەكو پرۆژێن دەرچوونێ ژ لایێ وان ڤە ھاتبوونە بەرھەڤكرن، زێدەباری كارێن ھۆنەری یێن ژلایێ قوتابیێن قۆناغێن ئێكێ و دووێ و سێیێ ڤە ھاتینە ئامادەكرن، كو پتری ١٧٠٠ كارێن ھۆنەری بوون.
مامۆستا دلگەش جاسم عەزیز سەرۆكێ پشكا ھۆنەرێن شێوەكاری ل كولیژا زانستێن مرۆڤایەتی دياركر، كو گێرانا پێشانگەھا بۆ كارێن ھۆنەری یێن قوتابیێن پشكا ھۆنەرێن شێوەكاری وەك نەریتەك سالانە دھێتە ئەنجامدان، ئەوژی ب مەرەما نیشاندانا كارێن قوتابیان و پەیداكرنا پەیوەندیەكێ دناڤبەرا كارێن ھۆنەری و جڤاكێ دەرڤەی زانكۆیێ، دیسان ناڤبری باس ل گرنگیا پێشانگەھێ كر، كو بۆ جۆراوجۆریا شێوازێن قوتابیا د نیگاركرنێ و دەربرینكرنێ ژ كێشەیێن جڤاكی دزڤریت.
نەجیبا محەمەد قاسم، قوتابیەكا پشكدارا پێشانگەهێ باس ل كارێن خۆ یێن ھۆنەری كر و دیاركر كو كەڤالێن وێ ب ناڤێ "رەنگ د ڤالاھیا ئسمانی دا"، ب مادێن جودا وەكو بۆیاغ، غری، رەنگێن زەیتی، خوێ، و ب كەرەستێن فرچە و كێرك ھاتینە دروستكرن، دیسان باس ل واتایێن كەڤالێن خۆ كرن، كو دەربرینێ ژ ئەوێ ڤالاھیا گەردوونی یا بەرفرەھـ دكەن یاكو مرۆڤێ سەردەم تۆشی بەرزەبوونێ دكەت. قوتابیەكێ دی ب ناڤێ ئالان ئدریس مستەفا كەڤالێن خۆ ب شێوازەكێ جودا ب ناڤێ "دیتنەكا ھۆنەری د ھەبوون و نەبوونێ دا" دروستكربوون، قوتابی تێكەلكرن د ناڤبەرا پەیكەرسازی و نیگاركێشیێ دا ئەنجامدابوو بۆ دەربرینێ ژ ھەبوونێ و نەبوونێ. قوتابیەكا دی ب ناڤێ پەری ئازاد ئەحمەد كارێن خۆ یێن ھۆنەری ل دۆر ئازادیا ژنێ ب ناڤێ "ژن، ژیان، ئازادی" ب شێوازەكێ جودا نیشاندان، ئێك ژ كارێن وێ یێن ھۆنەری دەربرین ژ وان تێگەھان دكر یێن پێدڤی بۆ ژنێ وەكوث ژن، ژیان، رۆناھی، ئازادی، گرنژین، باوەری، جوانی، شیان، دلۆڤانی و ھێز.
ھەژی ئاماژێ یە، زانكۆیا دھۆك بەردەوام چالاكیێن زانستی، ھۆنەری، رەوشەنبیری، ب مەرەما بەرزكرنا ئاستێ قوتابی و مامۆستایێن خۆ ئەنجامددەت.
راگەهاندنا زانکۆیا دهۆک؛ 28ـی گولان 2023
راپۆرت: ماھر كێستەیی
فۆتۆ: محەمەد عەبدولكەریم و عەلی بانكی