د چوارچوڤێ ھەڤكاریا دناڤبەرا ئێكەتیا ئەوروپی و زانكۆیا دھۆك دا، چوار مامۆستایێن زانكۆیا دھۆك پشكداری د راھێنانێن پەرەپێدانا شیانێن مامۆستایا بۆ پێشڤەبرنا بابەتێن خواندنێ یێن كۆلیژێن پەروەردە و پەروەردا بنیات و فێركرنا بنەرەت "Teachers Mod" كر ل زانكۆیا پاڤیا ل ئیتالیا ل ٣٠ـی چریا ئێكێ ھەتا ٤ـی چریا دووێ ٢٠٢٣.

مامۆستایێن پشكدار پێكھاتبوون ژ د. سەعید ئدریس سەعید و د. نەسرین محەمەد عەبدوللا و د. سەعید عاید عەطیە و د. نادیە زەكو ئلیاس مامۆستایێن كۆلیژا پەروەردا بنیات ل زانكۆیا دھۆك. زێدەباری پشكداربوونا مامۆستایێن زانكۆیا سەلاحەدین، و زانكۆیا ھەلەبچە، و زانكۆیا زاخۆ، و زانكۆیا راپەرین یێن ھەرێما كوردستانێ.

د. سەعید ئدریس سەعید مامۆستایێ پشكا زمانێ ئنگلیزی ل كۆلیژا پەروەردا بنیات، دیاركر ئارمانجا پرۆگرامێ "Teachers Mod" راھێنانكرنا ستافێ ئەكادیمی یێ ھەر پێنج زانكۆیێن پشكدارە ل دۆر شێوازێن سەردەمیانە یێن وانەگۆتنێ، دیسان دیزاینكرنا بابەت و پرۆگرامێن خواندنێ یە و چەوانیا بەرھەڤكرنا كورسبوكێن بابەتا و پێشڤەبرنا شیانێن مامۆستایێن كۆلیژێن پەروەردە و پەروەردا بنیاتە. دیسان ناڤبری دیاركر د راھێنانا دا جەخت ل سەر زمانی ھاتە كرن وەك ژێدەرێ سەرەكی یێ فێركرنێ و گرنگی پێدان ب ئالاڤ و شێوازێن وانەگۆتنێ یێن كارا و پشكداریكرنا فێرخوازی د پرۆسێسا فێركرنێ دا.

د. نەسرین محەمەد عەبدوللا، مامۆستا ل پشكا زمانێ عەرەبی ل كۆلیژا پەروەردا بنیات، دەربارەی پشكداربوون د پرۆژێ "Teachers Mod" دیاركر، كو د وۆركشۆپێن راھێنانێ دا بابەتێن یەكسانیا جێندەری و زمان و مێژوو یێن ل كۆلیژێن زانكۆیا پاڤیا یا ئیتالی دھێنە خواندن ھاتنە گەنگەشەكرن، تێبینی و سەرنجێن بەرھەمدار ژ لایێ پشكداربوویێن زانكۆیا دھۆك ڤە ھاتنە پێشكێشكرن و د گەنگەشادا ھەڤبەركرن دناڤبەرا بابەتێن خواندنێ یێن زانكۆیا دھۆك و زانكۆیا پاڤیا ھاتە كرن.

ھەژی ئاماژەدانێ یە، پرۆژێ "Teachers Mod" ژ لایێ زانكۆیا دھۆك بۆ ئێكەتیا ئەوروپی ھاتبوو پێشنیاركرن و وەك دەستكەڤتەك بۆ زانكۆیا دھۆك و وەزارەتا خواندنا بلند و ڤەكۆلینێن زانستی یا ھەرێما كوردستانێ دھێتە ھژمارتن، كو دێ مفایەكێ زۆر بۆ پرۆسێسا فێركرنێ ل ھەرێما كوردستانێ ھەبیت. پرۆژە ژلایێ ئێكەتیا ئەوروپی ڤە دھێتە پالپشتیكرن ب پشكداریا ئێكەتیا زانكۆیێن دەریا ناڤەراست Unimed و زانكۆیا پاڤیا یا ئیتالی و زانكۆیا گەرەنادا یا ئیسپانی و زانكۆیا ئوتادا یا پورتوگالی و پێنج زانكۆیێن ھەرێما كوردستانا عیراقێ ئەوژی زانكۆیا دھۆك، و زانكۆیا سەلاحەدین، و زانكۆیا ھەلەبچە، وزانكۆیا زاخۆ، و زانكۆیا راپەرین.

راگەھاندنا زانكۆیا دھۆك؛ ٨ـی چریا دووێ ٢٠٢٣

نڤێسین: ماھر طاھر كێستەیی