ئارمانج ژ ڤەکرنا پشکا کارگێری بازارگەری، پێگەهاندن و دەستهەلکرنا دەرچوویانە و پێشکێشکرنا زانین و شارەزایی و کارامەیی و شیانانە و رێخۆشکرن بۆ ئەنجامدانا داهێنانا د بوارێ بازارگەریا دینامیکی دا. ژ لایەکێ دی ڤە، نە ب تنێ پێشڤەبرنا ئەکادیمی ئارمانجا ڤێ پشکا زانستی یە، بەلکو خزمەتکرنا جڤاکی ب رێکا پێرابوونێن بازارگەری ئێکە ژ ئارمانجێن سەرەکیێن ڤەکرنا ڤێ پشکێ. و ب رێکا تێکەلکرنا زانینا تیۆری و دیتنێن زانستی و شارەزاییا پراکتیکی، پشکا کارگێری بازارگەری یا رژدە ل سەر پێگەهاندنا کەسانێن پێشەگەر د ڤی بواری دا کو بشێن چالاکانە رۆلێ خۆ د بازاری دا بگێرن و خزمەتا جڤاکێ خۆ بکەن.
پشکا کارگێری بازارگەری ل کولیژا کارگێری و ئابووری ل زانکۆیا دهۆک، ب پرۆگرام و ژێرخانە و ستافەکێ ئەکادیمیێ دەستهەل و سەقایەکێ گونجایێ فێربوون و پێگەهاندنێ، گەرەنتیا وێ یەکێ دکەت کو سەرکردێن پاشەرۆژێ د بوارێ بازارگەریێ دا پێبگەهینیت و ئەڤ سەرکردە رۆلەکێ سەرەکی د بازاری دا بگێرن و ڤەکۆلینێن زانستیێن پێشەنگ د ڤی بواری دا ئەنجامبدەن و خزمەتەکا بێ وێنە پێشکێشی جڤاکی بکەن.
راگەهاندنا زانکۆیا دهۆک؛ ٢٥ـی تەباخێ ٢٠٢٣