بۆ هەمى مامۆستا وقوتابى وفەرمانبەرێن مەیێن خۆشتڤى وقەدرگران و خەلکێ دهۆکا ڕەنگین وخۆراگر.

سەرۆکاتییا زانکۆیا دهۆک سۆزدابوو مامۆستا وقوتابى و فەرمانبەرێن خۆ، کو دویڤچوونەکا تێر وتەسەل بۆ ئەوێ رێزبەندییا زانکۆیان بکەت، ئەوا ل هەیڤا (12) ل سالا (2015) ژلایێ وەزارەتا خواندنا بلندڤە هاتییە ڕاگەهاندن، کوتێدا شاشییەک بەرامبەر زانکۆیا دهۆک هاتبوو کرن، کو کربوو د گرۆپێ (C)دا و سەرۆکاتییا زانکۆیا دهۆک لیژنەکا دویفچوونێ یا تایبەت بۆ ئەڤى بابەتى چێکر وتێدا هەلسەنگاندنەکا زانستى وئەکادیمى بۆ ئەنجامێن رێزبەندییێ هاتە کرن و د ئەنجامدا دیار بوو، کو ڕێژەکا زۆر ژ داتایێن زانکۆیا دهۆک ژبەر چەند ئەگەرێن تەکنیکى وفەنى نەهاتبوونە تومارکرن، ئەوژێ  بۆ ئەگەرێ هندێ، کو شاشی د ڕێزبەندییا زانکۆیا دهۆکدا پەیدابن. زانکۆیا دهۆکێ ئەنجامێن ئەوێ لیژنێ د چارچۆڤێ ڕاپۆرتەکا زانستى وئەکادیمیدا بۆ وەزارەتا خواندنا بلند ڕەوانەکر وپشتى دانوستاندن وگەنگەشەکا دویر ودرێژ، دوهى وەزارەتێ وب نڤێسارەکا فەرمى دانپێدان ب هەبوونا شاشییێ بەرامبەر زانکۆیا دهۆک کر.  هەژی گوتنێیە، کو وەزیرێ خواندنا بلند سەرەدەرییەکا ئەکادیمى وئەرێنێ بۆ تێبینیێن زانکۆیا دهۆک ل سەر ئەوێ ڕێزبەندییێ هەبوو. ئەم ژى وەک زانکۆیا دهۆک دەستخۆشی وسوپاسییا جەنابێ وەزیرێ خواندنا بلند و ڤەکۆلینێن زانستى بەرامبەر خەمخۆرییا ئەوى دکەین.

زانکۆیا دهۆک ستێرەکا گەش و ڕوهنە د ئەسمانێ کوردستانێدا و جهێ هزارەها بسپۆر و خودان شیان ومرۆڤێن ئەکادمییە، کو ئەڤرۆکە ل هەمى دام ودەزگەهێن وەلاتى ول هەمى تەخ و چینێن چڤاکى ڕۆلەکێ بەرچاڤ هەنە و دبینن.

زانکۆیا دهۆکێ هەر سەر فەراز و سەربلند بیت، کو بەرهەمێ خوینا شەهێدین بزاڤا رزگارى خوازا کوردستانێیە.