ئەڤرۆ، رۆژا چوارشەمبی، 11ی چریا ئێكێ، 2023، شاندەك ژ زانكۆیا ئاكرێ سەرەدانا زانكۆیا دهۆك كر و ل سەنتەرێ كۆنفرانسان د گەل جڤاتا زانكۆیا دهۆك كۆمبوو. راگرێ كۆلیژا پەروەردێ ل زانكۆیا ئاكرێ، د. رەشاد كەمال موستەفا، سەرۆكاتییا ئەڤی شاندی دكر كو ژمارەكا ستافێ ئەكادیمی ومامۆستایێن زانكۆیا ئاكرێ د گەل دا بوون.

ل دەسپێكا روینشتنێ، و ب ئامادەبوونا هەمی راگرێن كولیژێن زانكۆیا دهۆك، سەرۆكێ زانكۆیا دهۆك، د. داوود سلێمان ئەتروشی، بخێرهاتنا شاندێ زانكۆیا ئاكرێ كر. پاشی، د. رەشاد كەمال موستەفا سوپاسییا زانكۆیا دهۆك كر ب هەمی ستاف و مامۆستا وكارگێرێن وێ ڤە، و گۆت: " مە وەك كۆلیژەك بسەر زانكۆیا دهۆك ڤە دەستپێكر یا كو ئەم ب زانكۆیا دەیك دزانین، ویارمەتی و ئەزموون و پالپشتییا زانكۆیا دهۆك بۆ مە بوونە پالدەرێن سەرەكی كو ئەم بەرێ بنیات بۆ زانكۆیا ئاكرێ بدانین و وەك زانكۆیەكا سەربەخۆ خو ببینیت." دیسان گۆت ژی: "ئەم قەت رۆلێ زانكۆیا دهۆك ژبیر ناكەین و ب ناڤێ هەمی ستافێن كارگیری و ئەكادیمی یێن زانكۆیا ئاكرێ سوپاسییا زانكۆیا دهۆك دكەین، هیڤیدارین ئەم هەمی خزمەتا خەلكێ خو بكەین برێكا خواندن و زانینێ."

دیسان، د. رەشاد باس ل وێ چەندێ كر كو زانكۆیا ئاكرێ ب 2 پشكان دەستپێكر ونوكە ژ 7 پشكێن زانستی پێك دهێت زێدەباری 10 تاقیگەھ و ژمارەكا پەرتووكخانە و 3000 قوتابی لێ دخینن. و دیار كر ژی كو زانكۆیا ئاكرێ دبیتە بنگەهەكێ خواندنێ بۆ خەلكێ دەڤەرێن ئاكرێ و بەردەرەش و دەوروبەران كو خواندنا خو لێ تمام بكەن.

ژ لایێ خو ڤە، سەرۆكێ زانكۆیا دهۆك سوپاسییا زانكۆیا ئاكرێ كر و كەیف خوشییا خو دەربری كو بنیاتێ زانكۆیا ئاكرێ ژ كۆلیژەكا زانكۆیا دهۆك بیت وداخوازا سەركەفتنێ بۆ زانكۆیا ئاكری كر. هەروەسا، ب ناڤێ زانكۆیا دهۆك ئامادەییا زانكۆیا دهۆك دیار كر بۆ پشتەڤانییا زانكۆیا ئاكرێ بۆ هەر كارەكی یێ كو مفا بگەهینیتە جڤاكی.

ل دۆماهییا ڤێ روینشتنێ، راگرێ كۆلیژا پەروەردە ل زانكۆیا ئاكرێ سوپاسنامەك پێشكێشی زانكۆیا دهۆك كر.

راگەهاندنا زانكۆیا دهۆك، 11ی چریا ئێكێ، 2023

فاطمة محمود

وێنە: موحەممەد عەبدولكەریم