رۆژا ئێكشەمبی رێكەڤتی 20ـی ئەیلولێ 2023، وۆركشوپەك ل دۆر گۆھرینا ناڤێ پشكا "گەشتیاری و توریزما ژینگەھێ" بۆ "ژینگەھ و تۆریزما ژینگەھێ" بۆ مامۆستایێن وێ پشكێ ھاتە ئەنجامدان.

وۆركشۆپ ب پەیڤا ھاریكارێ سەرۆكێ زانكۆیێ بۆ كاروبارێن قوتابيا، د. نەبەز ئیبراهیم محەمەد دەستپێكر. ناڤبری تەكەز ل سەر گرنگیا ڤان جۆرە وۆركشۆپا کر، دیسان تەکەز ل وێ چەندێ کر، کو گرنگە پشكێن زانستی یێن كۆلیژێن زانكۆیا دھۆك ل گەل بازارێ کاری بگونجینین. ناڤبری دەربارەی گوھۆرینا ناڤێ پشكا "گەشتیاری و تۆریزما ژینگەھێ"، گۆت "مە ب فەر زانی ئەڤ گوهورینە بهێنەکرن، ژبەرکو دنوکە دا بازار وێ چەندێ دخازیت، ژبەركو ژینگەها مە یا گونجای یە بۆ گەشتیاری و تۆریزما ژینگەهێ و ئەو رێژا زۆر یا گەشتیارێن قەستا دەڤەرا مە دکەن، بۆ ژینگەھا مە ب دارستان و کانی و رویبارێن وێ دزڤریت. لەورا ب ئەڤێ گوھۆرینێ دشیاندایە پەرەپێدانا بابەتێن خواندنێ یێن ڤێ ێشكا زانستی بھێتە دان و قۆتابیێن مە بەرھەڤ ببن و بشێت مفای ژ ژێدەرێن سروشتی وەربگرین و د بوارێ تۆریزما ژینگەھێ دا بكاربینن. ب ئەڤێ چەندێ دێ دەلیڤێن کاری زێدەبن و گرنگی ب خەلكێ گوندان ھێتە دان داكو ئەوژی مفادار بن.

دیسان د. هەدار سەعید فەیزی سەرۆک پشكا گەشتیاری و تۆریزما ژینگەهێ، ئێک ژ پشكدارێن وۆركشوپێ دیاركر کو د نوكەدا جيهان بەرەف پەرەپێدانا ژینگەهێ و ڤە دچیت، لەورا یا فەرە بابەت و پرۆگرام ل ڤێ پشكێ بهێنە زێدەکرن، بۆ هندێ قوتابی زێدەتر زانیاریان وەربگرن و ئاستێ خواندنا وان باشتر لێبھێت و بشێن دەلیڤێن کاری ب دەست خۆڤە بینن. دیسان دیاركر كو ئارمانج ژ گوهۆرینا ناڤێ پشكێ بۆ ئەوێ چەندێ دزڤریت، دەڤەرا مە جهەکێ گەشتیاری یە و ژبەر ھەبوونا ژێدەرێن سروشتی گەشتیار قەستا جهێن دەڤەرا مە یێن گەشتیاری دکەن و سالانە پێدڤیێن بازارێ كاری دھێنە گوھۆرین لەورا گرڵانگە خۆ ل گەل كەتواری بگونجینین.

مامۆستا نێجیرڤان حازم، ئێك ژ ئامادەبوویا دەربارەی وۆركشوپی دیاركر، د وۆركشوپیدا تەکەز ل سەر وێ چەندێ ھاتەکرن، کادێ چەوا شێن د پاشەروژێ دا زێدەتر دەلیڤێن کاری بوو دەرچویێن ڤێ پشكێ پەیداکەین، ب تایبەت ل کەرتێ تایبەت و بزاڤێ بکەین شیانێن قوتابیان باشتر لێ بکەین، دیسان ناڤبری گۆت "مە داخازکر ریفۆرمەکا تایبەت د ڤێ پشكێ دا بهێتەکرن، ژبەرکو مە تێبینی دکر دڤێ پشكێ دا کیماسیەک هەیە، ب تایبەتی د بەرھەڤكرنا قوتابیێن دەرچوی دا، هیڤیدارین سەرنچ و تێبینیێن هاتینەکرن ل ڤێ پشكێ ل بەر چاڤ بهێنەوەرگرتن".

ل دویماھیێ دانوستاننێن چر دناڤبەرا ئامادەبویا و پشكدارێن وۆركشوپی دا هاتنە ئەنجامدان و ئامادەبوویا تێبینی و پێشنیارێن خۆ پێشكێشكرن ب مەرەما باشترلێكرنا پشكێ كو بشێت ب باشترین شێوە قوتابیا ئاڤابکەت و خزمەتا کەرتێ گەشتیاری و ژینگەهێ بكەت.

راگەھاندنا زانكۆیا دھۆك؛ 2١ـی ئەیلولێ 2023

راپۆرت: نیبار حەجی

فۆتۆ: محەمەد عەبدولكەریم