راگەهاندنا زانکۆیا دهۆک؛ ١٥ـی کانوونا ئێکێ ٢٠٢٢
ب مەرەما بەرفرەهکرنا پەیوەندیێن ئەکادیمی د ناڤبەرا زانکۆیا دهۆک و زانکۆیا(تی. ئێچ. ئێـم.) یا ئەلمانی دا، سەرۆکێ زانکۆیا دهۆک د. داود سلێمان ئەتروشی دگەل شاندەکێ پێکهاتی ژ د. صباح وەیس، راوێژکارێ وەزیرێ خواندنا بلند، د. جێمس حەیدۆ راگرێ کولیژا ئەندازیاری ل زانکۆیا دهۆک و د. سالح ئەتروشی، سەرۆکێ پشکا ئەندازیاریا بایۆمێدیکال ل کولیژا ئەندازیاری یا زانکۆیا دهۆک، سەردانا زانکۆیا (تی. ئێچ. ئێـم.) یا ئەلمانی کر.
سەرۆکێ زانکۆیا دهۆک د. داود سلێمان ئەتروشی خۆشحالیا خۆ ب پێشوازیا گەرم یا سەرۆکێ زانکۆیا (تی. ئێچ. ئێـم.) یا ئەلمانی ل شاندێ زانکۆیا دهۆک دەربڕی و دیارکر "د ڤێ سەرەدانێ دا مە کۆمبوونەکا گرنگ دگەل سەرۆکێ زانکۆیا (تی. ئێچ. ئێـم.) یا ئەلمانی ئەنجامدا و چەندین تەوەرێن گرنگ هاتنە گۆتوبێژکرن، ژ وان ژی بەرفرەهکرنا پەیوەندیا د ناڤبەرا هەردوو زانکۆیان دا. هەروەسا درێژکرنا گرێبەستا د ناڤبەرا زانکۆیا دهۆک و زانکۆیا (تی. ئێچ. ئێـم.) دا و وەرگرتنا دەرچوویێن زانکۆیا دهۆک ل خواندنا ماستەرێ ل زانکۆیا ناڤبری. هەروەسا باشترکرنا پرۆگرامێن خواندنا پشکا ئەندازیاریا شارستانی و تەلارسازی ژ تەوەرێن گرنگێن کۆمبوونێ بوون. ل دویماهیا کۆمبوونێ ژی چەندین پێشنیار و داخوازی هاتنەکرن، ب مەرەما هەڤکاریەکا زێدەتر د ناڤبەرا هەردوو زانکۆیان دا".
هەر د ڤێ سەرەدانێ دا، شاندێ زانکۆیا دهۆک پشکداری د کۆنفرانسەکێ تایبەت ب خواندنا بایۆمێدیکال یا زانکۆیا دهۆک دا کر، کو تێدا گۆتوبێژێن گرنگ ل دۆر باشترکرن و بەرفرەهکرنا خواندنا بایۆمێدیکال هاتنەکرن.
وەکو دهێتە زانین بۆ ماوێ ٩ هەیڤانە ژمارەکا قوتابیێن پشکا بایۆمێدیکال یا کولیژا ئەندازیاری ل زانکۆیا دهۆک، ل زانکۆیا (تی. ئێچ. ئێـم.)ـن ل باژێرێ گیسن ل وەلاتێ ئەلمانیا، ئەوژی ب مەرەما ب دویماهی ئینانا خواندنا بەکاڵوریۆسێ د بوارێ ئەندازیاریا بایۆمێدیکالی دا.
جهێ ئاماژەپێکرنێ یە، زانکۆیا دهۆک ئێکەم زانکۆیە ل کوردستانێ، کو پرۆگرامێ خواندنا بایۆمێدیکال لێ دهێتە خواندن، پشتی دەرچوونا قوتابیان ل پشکا ناڤبری، باوەرنامە ژ هەردوو زانکۆیێن دهۆک و زانکۆیا (تی. ئێچ. ئێـم.) یا ئەلمانی ب قوتابی دهێتەدان.