د چالاكیەكا بێ وێنەدا، پشكا دراما ل كۆلیژا ھۆنەرێن جوان یا زانكۆیا دھۆك مێھڤانداریا قوتابیێن قوناغا دووێ یێن پشكا زمانێ ئنگلیزی ل كۆلیژا زمانان یا زانكۆیا نەوروز كر. ئەڤ چالاكیە ب ھەڤكاری دناڤبەرا پشكا دراما ل زانكۆیا دھۆك و پشكا زمانێ ئنگلیزی ل زانكۆیا نەوروز ل سەنتەرێ قوتابیا ل زانكۆیا دھۆك ل ٢٥ـی چریا ئێكێ ٢٠٢٣ ب ئامادەبوونا مامۆستایێن پشكا دراما و مامۆستا و قۆتابیێن پشكا زمانێ ئنگلیزی یا زانكۆیا نەوروز كۆ نێزیكی ٢٠٠ قوتابیا بوون ھاتە ئەنجامدان.

ئارمانج ژ ڤێ چالاكیێ دانەنیاسینا پشكا دراما و خواندن و چالاكی و نێرینا وێ بوو ب مێھڤانا زێدەباری مێژوویا وێ ھەر ژ دامەزراندنا وێ ل زانكۆیا دھۆك ھەتا نوكە. زێدەباری بھێزكرنا پەیوەندیا ل گەل زانكۆیا نەورز و دانەنیاسینا قوتابیێن پشكا زمانێ ئنگلیزی كو شانو و ئەدەبی د خواندنا خۆدا دخوینن، ب بنەما و تێگەھێن ھونەرێ شانویێ و دانا دیتنەكا ھونەری دەربارەی كارێن نڤێسەرێ بەریتانی یێ بەرنیاس "ولیام شكسپیر" كو ب بابەتێ ڤەكۆلینێن قوتابیێن مێھڤان دھێتە ھژمارتن.

چالاكی ژ چەند برگێن نیشاندان و دانەنیاسینێ پێكدھات كو ژلایێ مامۆستایێن پشكا دراما ڤە ھاتنە پێشكێشكرن، كو بابەتێن "تێگەھێ درامایێ و شانویێ و نھێنی و تایبەتمەندیێن تێكستێن ئەدەبی یێن شكسپیری و دەستپێكا سەرھلدانا ھونەرێ درامایێ و پێكھاتێن تێكستێن ئەدەبی یێن شكسپێری و سەمپلێن دەرھێنانێ د تێكستێن شكسپیری" بخۆڤەدگرتن. ل دویماھیا چالاكیێ نیشاندانەكا شانویێ یا كورت ھاتە پێشكێشكرن كو ژ لایێ قوتابیێن پشكا دراما ڤە ھاتبوو رێكخستن.

دیسان د پەیڤەكێ دا، سەرۆكێ پشكا دراما د. محەمەد سەبری باس ل ھونەرێ درامایێ كر، كو زارڤەكرنا تێكستێ ئەدەبیە ب مەرەما خۆشی بەخشینێ و پێدڤی ب ئامادەبوونێ ل سەر دەپێ شانویێ ھەیە. ھەروەسا ناڤبری دوپاتكر كو ل ڤان دویماھیا ئالاڤێن وەكو "شانۆ، سینەما، رادیۆ، تەلەفزیۆن، سوشیال میدیا ل ھۆنەرێ درامایێ ھاتینە زێدەكرن، ژلایێ خۆڤە مامۆستا قەدری ئوسمان شێرو ئاماژە ب وێ چەندێ دا كو كەڤنترین شارستانیەتا ھونەرێ درامایێ ل دەڤ پەیدابووی شارستانیەتا سومەری بوو ل میزوپۆتامیا كو ل وی سەردەمی ھۆنەرێ درامایێ نە دھاتە نڤێسن، و ژ كارێن ل وی سەردەمی دیاربووین، "عەشتار، گلگامش، جیھانا ژێر و ھندەكێن دی بوون.

ھەژی ئاماژەدانێ یە، پشكا دراما ل سالا ٢٠٠٧ـێ سەر ب كۆلیژا ئادابێ ڤە ھاتیە دامەزراندن و ئێكەم گەرا خواندنێ یا قوتابیا بۆ سالا ٢٠٠٨ – ٢٠٠٩ وەرگرتیە، ل دویڤ دا ناڤێ كۆلیژا ئادابێ بۆ سكۆلا ئادابی و ل دویڤ دا بۆ كۆلیژا زانستێن مرۆڤایەتی ھاتیە گوھۆرین. ل ٢٢ـی گولانێ ٢٠٢٣، بریارا جوداكرنا پشكا درامە ژ كۆلیژا زانستێن مرۆڤایەتی ھاتیە دان ئەوژی ب دامەزراندنا كۆلیژەكا نوی ب ناڤێ كۆلیژا ھونەرێن جوان كو ھەردوو پشكێن دراما و ھونەرێن شێوەكار بخۆڤەدگریت. پشكا دراما چەندێن كارێن ھونەری و شانویێ ئەنجامداینە و ئێكەم كارێ وێ ل سالا ٢٠٠٩ـێ شانۆیا "مالا بویكێ" بوو و دویماھی كار ژی شانۆیا "دەروێش" بوو ل سالا خواندنێ ٢٠٢٢ – ٢٠٢٣ كو پشكەك بوو ژ پرۆژێ دەرچوونێ یێ قوتابیێن پشكا ناڤبر، ب ڤێ چەندێ ھژمارا كارێن ھونەری یێن پشكا درامایێ ژ سالا ٢٠٠٩ ھەتا سالا ٢٠٢٣ پێشكێشكرن دبیتە 56 كار ژ شانۆ و كورتە فیلما كو ب زانكۆیێ و دەرڤەی زانكۆیێ ھاتینە نیشاندان و خەلات وەرگرتینە.

راگەھاندنا زانكۆیا دھۆك؛ ٢٧ـی چریا ئێكێ ٢٠٢٣

فاطمة محمود

وەرگێران: ماھر كێستەیی

فۆتۆ: عەلی بانكی