ئەڤرۆ رێکەڤتی ١٨ـی نیسانێ ٢٠٢٣، و ب ئامادەبوونا د. داود سلێمان ئەتروشی سەرۆکێ زانکۆیا دهۆک، رێڤەبەرێ نوی یێ سەنتەرێ بێشکچی بۆ ڤەکۆلینێن مرۆڤایەتی د. سەلاح محەمەد سەلیم ل جهێ د. نەشوان شوکری دەستبکاربوو.
د رێورەسمەکی دا و ب ئامادەبوونا د. عەبدولفەتاح بۆتانی سەرۆکێ ئەکادیمیا کوردی و دامەزرێنەرێ سەنتەرێ ناڤبری، سەرۆکێ زانکۆیا دهۆک باس ل گرنگیا ڤی سەنتەری کر و سوپاسیا دامەزرێنەرێ سەنتەری کر بۆ کار و خەباتا وی ل دەستپێکا دامەزراندنێ و پەسنا کار و بەرهەمێ د. نەشوان شوکری کر و سوپاسیێن سەرۆکاتیا زانکۆیێ ئاراستەکرن و دیارکر "وەکو سەرۆکاتیا زانکۆیا دهۆک شانازیێ ب کار و بەرهەمێن ڤی سەنتەری دبەین ژبەر کارێن وان یێن ئەکادیمیێن رژد و بەرهەم و چالاکی و کۆنفراسێن وان یێن ب کوالێتیەکا بلند". هەروەسا سەرۆکێ زانکۆیا دهۆک داخوازا سەرکەڤتنێ بۆ رێڤەبەرێ نوی یێ سەنتەری کر و پشتەڤانیا سەرۆکاتیا زانکۆیا دهۆک بۆ کار و بەرهەمێن وان د بوارێ دیرۆک و کەلتۆرێ کوردی دا دیارکر.
هەر د ڤی رێورەسمی دا، د. نەشوان شوکری سوپاسیا سەرۆکاتیا زانکۆیا دهۆک کر بۆ پشتەڤانیا وان یا بەردەوام بۆ ڤی سەنتەری د ماوێ بۆری دا و بەرهەڤیا خۆ دیارکر کو بەردەوام کار و خزمەتێ د چارچۆڤێ ڤی سەنتەری و بسپۆریا خۆ دا بۆ زانکۆیا دهۆک بکەت. ژ لایێ خۆ ڤە د. سەلاح محەمەد سەلیم سوپاسیا سەرۆکاتیا زانکۆیا دهۆک کر بۆ باوەری پێدانێ و دەستخۆشی ل د. نەشوان شوکری کر بۆ کار و بەرهەمێن وی د چارچۆڤێ ڤی سەنتەری دا د ماوێ بۆری دا.
دهێتە زانین سەنتەرێ بێشکچی بۆ ڤەکۆلینێن مرۆڤایەتی ل ٢٢ـی نیسانێ ل سالا ٢٠٠٦ـێ هاتیە دامەزراندن، ب مەرەما بجهئینانا ئارمانجێن نشتیمانی ل دویڤ دیتن و ئەرکێن زانکۆیا دهۆک. سەنتەرێ ناڤبری گرنگیێ ددەتە بدەستڤەئینانا ئارمانجێن پێشڤەبرنا نشتیمانی و پاراستنا دوکیومێنتێن دیرۆکی، ب تایبەتی د میراتێ جڤاکی و ئابووری و جیوگرافی و دیرۆکی دا، هەروەسا راستڤەکرنا هزرێن شاش یێن دەستهەلات و سازیێن نیڤدەولەتی و سازیێن راگەهاندنێ دروستکرین ل دۆر دۆزا کوردی. هەروەسا ئێک ژ ئەرکێن ڤی سەنتەری وەرگێران و دووبارە چاپکرنا نڤیسینێن جڤاکناس ئیسماعیل بێشکچی یە.
راگەهاندنا زانکۆیا دهۆک؛ ١٨ـی نیسانێ ٢٠٢٣
فۆتۆ: محەمەد عەبدولکەریم