A seminar about the success equation
Dec. 19, 2018, 11:30 p.m.

تۆرا دەرچوویێن زانكۆیا دهۆك ب هەڤكاری ل گەل دەزگەهێ‌ روانگە سمینارەك بۆ چالاكڤانێ‌ مەدەنی عەبدولسەلام مەدەنی ل دۆر هاوكێشا سەركەفتنێ‌ ل رۆژا 18/12/2018 ل هۆلا كۆنفرانسان ل زانكۆیا دهۆك رێكخستن. 
د ڤێ‌ سمینارێ‌ دا كو هژمارەكا قوتابی و مامۆستایێن زانكۆیا دهۆك تێدا د بەرهەڤ بوون، ل دەسپێكێ‌ سەرۆكێ‌ زانكۆیا دهۆك پ. د. مصلح دهۆكی د پەیڤەكی دا گۆت بزاڤێن زانكۆیا دهۆك د بەردەوامن ژ بۆ خزمەت كرنا قوتابی و دەرچوویێن زانكۆیێ‌ و هەردەم مە خواستیە پشتی كو قوتابی ژ زانكۆیێ‌ دەردچیت ب ئێكجاری ژ زانكۆیێ‌ نەهێتە ڤەقەتیان و پەیوەندی هەر دگەل زانكۆیێ‌ بمینیت، لەورا مە تۆرا دەرچوویێن زانكۆیێ‌ دامەزراندیە دا كو ببیتە پرەك بۆ پێكڤە گرێدانا دەرچوویان دگەل زانكۆیێ‌ كو هەر كارەكێ‌ هەبیت زانكۆ ب رێكا ڤێ‌ تۆرێ‌ بگەهینیتە دەرچوویێن خۆ.
پ. د. مصلح دهۆكی هەروەسا گۆت بۆ داهاتی ژی تۆرا دەرچوویێن زانكۆیێ‌ دێ‌ چالاكیێن گرنگ بۆ دەرچوویان هەبن داكو ژبلی ئەو بابەتێن زانستی ئەوێن ل كۆلیژێن خۆ وەردگرن هەروەسا زانیاری ل دۆر چاوانیا لێگەریان و دیتنا دەلیڤێن كاری هەبن، ئەو چەند ژی دیار كر كو ژ بلی ڤێ‌ تۆرێ‌ پێشتر ل زانكۆیا دهۆك سەنتەرێ‌ گەشەپێدانا كاری هاتبوو دامەزراند بۆ هەمان مەبەست كو خزمەتێ‌ بگەهینیتە قوتابیان و دەرچوویێن زانكۆیا دهۆك.
ل دیف دا چالاكڤانێ‌ مەدەنی عەبدولسەلام مەدەنی دەست ب سمینارا خۆ كر ل دۆر هاوكێشا سەركەفتنێ‌ و بەحسێ‌ وان كاران كر یێ‌ مرۆڤی بەرەف سەركەفتنێ‌ دبەن و هەروەسا بەحسێ‌ وان شیانا ژی یێن كو پێدڤی بن بۆ سەركەفتنێ‌، دووپاتی ل وێ‌ چەندێ‌ ژی كر كو هاوكێشا سەركەفتنێ‌ ل دیف وی كەسی ب خۆ دمینیت كا چەند یێ‌ بەرهەڤە بۆ سەركەفتنێ‌، هەروەسا دەرگەهێ‌ دانوستاندنێ‌ ژی هاتە ڤەكرن و قوتابیان پسیارێن خۆ ئاراستەی مامۆستایی كرن.