ل ژێر ناڤونیشانێن (پێکڤە بەرڤ دەروونەکێ ساخلەم )، ئەڤرۆ رۆژا دووشەمبی ڕێکەڤتی ٢٠٢/١٠/١٠ ل ناڤەندا قوتابیان ل زانکۆیا دهۆک، پشکا دەروونناسی ل کولیژا زانستێن مرۆڤایەتی، وۆرکشۆپەک بۆ د. ئالان جەمیل سەرۆکێ پشکا دەروونناسی و د. عیماد ئەتروشی مامۆستایێ زانکۆیێ ئەنجامدا.
ل دەستپێکا وۆرکشۆپێ، د. ئالان جەمیل باس ل گرنگیا پشکا دەروونناسی ل کولیژا زانستێن مرۆڤایەتی یا زانکۆیا دهۆک کر، هەروەسا سوپاسیا راگرێ کولیژێ و قوتابیێن پشکا دەروونناسی کر بۆ رێکخستن و ئەنجامدانا ئەڤێ وۆرکشۆپێ، گۆت ژی"مەرەم ژ ئەنجامدانا ڤان جۆرە وۆرکشۆپان بۆ زێدەتر هشیارکرنا تاکێن جڤاکی یە".
پاشی دیاکر ژی"پشکا دەروونناسی سالانە ب شێوەکێ ئەکادیمی و پێشکەڤتی قوتابیان وەکو چارەسەکارێن دەروونی بەرهەڤدکەت و پێشکێشی جڤاکی دکەت بۆ چارەسەرکرنا نەخۆشیێن دەروونی".
د درێژیا وۆرکشۆپێ دا، چەندین سمینار و چالاکی ژلایێ قوتابیێن پشکا دەروونناسی ڤە هاتنە ئەنجامدان، ل دویماهیێ ژی قوتابیێن پشکا ناڤهاتی سوپاسیا راگر و سەرۆکێ پشکا دەروونناسی کر بۆ پشتەڤانیا وان بۆ ئەنجامدانا ئەڤێ وۆرکشۆپێ.
جهێ ئاماژەپێکرنێ یە، ل سالا ١٩٩٢ـێ، پشتێ شەرێ کەنداڤێ، ژمارەکا مەزن یا سەربازێن ئەمریکی هاتنە کوشتن و بریندارکرن ئەڤێ چەندێ ژی کاریگەریەکا مەزن ل سەر دەروونی پەیداکر، ژبەر ڤێ چەندێ ڕۆژا ١٠/١٠ وەکۆ ڕۆژا جیهانی یا ساخلەمیا دەروونی هاتە دەستنیشانکرن.