د. داود ئەتروشی: ژبلی پەیرەوکرنا (بۆلۆنیا پرۆسێس - Bologna Process) مە چ بژاردەیێن دی نینن
April 27, 2022, 8:06 p.m.

 

ئەڤرۆ رێکەڤتی ٢٥/٤/٢٠٢٢ و ب بەرهەڤبوونا د. داود سلێمان ئەتروشی سەرۆکێ زانکۆیا دهۆک و هژمارەکا سەرۆک پشکێن بسپۆریێن زانستێن مرۆڤایەتی و نوینەرێن بۆلۆنیا پرۆسێس ل زانکۆیا دهۆک،  وۆرکشۆپا دووێ لدۆر چاکسازیێن د بوارێ ئەکادیمی دا ل زانکۆیا دهۆک لبەر رۆناهیا بۆلۆنیا پرۆسێس، ل سەنتەرێ رەوشەنبیری و جڤاکیێ زانکۆیا دهۆک هاتە ئەنجامدان، دوهی هەمان وۆرکشۆپ بۆ نوینەرێن پشکێن زانستیێن بسپۆریێن زانستێن خوڕی هاتبوو ئەنجامدان.

 

د پەیڤا دەستپێکێ دا د. داود ئەتروشی باس ل گرنگیا مەزنا بۆلۆنیا پرۆسێس کر و راگەهاند "پەیرەوکرنا ڤێ پرۆسێسێ مەزنترین چاکسازیە ل وەزارەتا خواندنێن بلند هاتیە ئەنجامدان و مە ل زانکۆیا دهۆک ژبلی پەیرەوکرنا بۆلۆنیا پرۆسێس چ بژاردەیێن دی نینن، سەرەرای هندێ کو پەیرەوکرنا ڤێ پرۆسێسێ فەرمانەکا سەرتاسەری یە و پێدڤیە بجهبینین، مە ل زانکۆیا دهۆک باوەری هەیە کو ئەڤە باشترین چاکسازیە و د پاشەرۆژێ دا دێ شانازیێ ب دەرئەنجامان بەین".

 

سەرۆکێ زانکۆیا دهۆک باس ل گۆرانکاری و چاکسازیێن دهێنە پێشبینیکرن پشتی پەیرەوکرنا بۆلۆنیا پرۆسێس کر و خویاکر "ئەڤ پرۆسێسە دێ کوالێتیا خواندنێ ل زانکۆیا دهۆک بلندکەت و دێ قوتابی بیتە سەنتەرێ فێربوونێ، وەکو دەرئەنجام ژی، زانکۆیا دهۆک دێ دەرچوویەکێ زاناتر و خودان شیان و کارامەی بەرهەمئینیت. هەروەسا پەیرەوکرنا ڤێ پرۆسێسێ دێ زانکۆیا دهۆک ب خێزانا ئەکادیمی یا نیڤدەولەتی ڤە گرێدەت و دێ بیتە ئەگەر پەیوەندیێن زانکۆیا دهۆک یێن نیڤدەولەتی فراوانتر لێ بهێن، هەلبەت ئەڤە ژی د بەرژەوەندیا زانکۆیا دهۆک و قوتابی و مامۆستایێن وێ دایە".

 

د. داود ئەتروشی ئاماژەدا بەرهەڤیێن زانکۆیا دهۆک بۆ پەیروەکرنا پرۆسێسا بۆلۆنیا و خویاکر کو ل هەمی کولیژا دێ هۆبەیێن تایبەت ب پەیرەوکرنا بۆلۆنیا پرۆسێس هەبن و نوینەرێن پشکێن زانستی ل هەر کولیژەکێ دێ د ڤان هۆبەیان دا کارکەن و راگەهاند "هیڤیدارین ئەم بشێین زانکۆیا دهۆکێ بکەینە باشترین سەنتەرێ راهێنانێ د بوارێ بۆلۆنیا پرۆسێس دا ل هەرێما کوردستانێ".

 

د بەردەوامیا وۆرکشۆپێ دا هەر ئێک ژ د. ئەمین عەبدولقادر و د. سەرهات مستەفا باس ل هویرکاریێن پرۆسێسا بۆلۆنیا کر و ئەو گۆرانکاری و ریفۆمێن ژ ڤێ پرۆسێسێ دهێنە پێشبینیکرن کر و پاشی د. ئسماعیل ئەمین باس ل سیستەمێ هەلسەنگاندنێ د ڤێ پرۆسێسێ دا کر، ل دویماهیێ ژی دانوستاندن لدۆر تەوەرێن جودایێن ڤێ پرۆسێسێ هاتنە کرن و گرنگیەکا تایبەت ب پێشڤەبرن و نویکرنا پرۆگرامێن خواندنێ هاتەدان.