ل رۆژا شەمبی رێكەڤتی ٢٧ـی گولانێ ٢٠٢٤، د ساخكرنا ٥٤ـەمین سالرۆژا پارێزگەھبوونا دھۆكێ دا، مامۆستایێ زانكۆیا دھۆك ئیبراھیم مەحموود، بیرمەند و جڤاكناس و ڤەكۆلەر و نڤێسەرێ كورد، خەلاتێ رێزلێنانێ ژ لایێ پارێزگارێ دهۆكێ د. عەلی تەتەر ڤە وەرگرت.

مامۆستا ئیبراھیم مەحموود ھژمارەكا زۆر یا بەرھەمان د بوارێن فەلسەفە، دیرۆك، جڤاك، ئەدەب، دۆزا كوردی و چەندین بوارێن دی ھەنە، زێدەباری وەرگێرانا چەندین پەرتۆكێن بوارێن جودا كو ھندەك ژ وان چاپكری نە و ھندەك ب شێوێ pdf و ھندەكێن دی ل ژێر چاپێ دا نە، كو ھژمارا بەرھەمێن وی دگەھیتە نێزیكی ٣٠٠ بەرھەمان.

مامۆستایێ ناڤبری، کو د نوکە دا ڤەكۆلەرە ل سەنتەرێ بێشكچی یێ ڤەكۆلینێن مرۆڤایەتی ل زانكۆیا دھۆك، د پەیڤا خۆ دا ل كەرنەڤالا پارێزگەھبوونا دھۆكێ سوپاسیا پارێزگارێ دھۆكێ د. عەلی تەتەر كر و سوپاسیا سەرۆكێ زانكۆیا دهۆک د. داود سلێمان ئەتروشی كر بۆ پالپشتیا وی و ئینانە پێشا كەسانێن ئەكادیمی و گرنگێدان ب ھەلگرێن زانست و زانینێ، ناڤبری دیاركر كو خەلاتكرنا وی رێزلێنانە ل زانكۆیا دھۆك بۆ رۆلێ وێ یێ سەرەكی د پێشڤەبرنا پارێزگەھا دھۆكێ دا.

راگەھاندنا زانكۆیا دھۆك؛ ٢٨ـی گولان ٢٠٢٤