وەزیرێ خاندنا بلند و ڤەكۆلینێن زانستی ل حكومەتا هەرێما كوردستانێ د. ئارام محەمەد قادر دگەل رێڤەبەرێن گشتی یێن وەزارەتێ ل رۆژا 8/11/2020 سەرەدانا زانكۆیا دهۆك كر، بۆ ژ نێزیك ئاگەهداربوون ل چاوانیا ب رێڤەچوونا پرۆسا خاندنێ.
د. ئارام محەمەد قادر ل تۆمارا گشتی یا زانكۆیا دهۆك دگەل سەرۆكێ زانكۆیا دهۆك پ. د. مصلح دهۆكی و هاریكارێن سەرۆكێ زانكۆیێ بەحسێ پرۆسا وەرگرتنا قوتابیان كرن و سەرۆكێ زانكۆیێ دیاركر كو هەتا نوكە 5581 قوتابی بۆ سالا نوی یا خاندنێ ل زانكۆیا دهۆك هاتینە وەرگرتن و پێشبینی دكەین هەتا شەش هزار قوتابیان بهێنە وەرگرتن، هەروەسا وەزیرێ خاندنا بلند ژ نێزیك د گەل دەرچوویێن ئەڤ سالە دانوستاندن كرن و گوهداریا بۆچوونێن وان كر.
ل دویف دا د رێورەسمەكی دا باوەرناما رێزلێنانێ یا وەزارەتا خاندنا بلند و ڤەكۆلینێن زانستی پێشكێشی د. موئەیەد ئاغالی میرزا راگرێ كۆلیژا دەرمانسازی ل زانكۆیا دهۆك كر و هیڤیا سەركەفتن و بەردەوامیێ بۆ خاست كو سەرپەرشتیا هەوا رووی ب رووی بوونا ڤایرۆسێ كۆرۆنایێ ل پارێزگەها دهۆكێ رۆلەكێ كاریگەر د گێریت ب تایبەت رۆلێ وان ل هشیاركرنا وەلاتیان و خزمەتكرنا گەل و وەلاتی و هیڤیی خاست نموونێن ب ڤی رەنگی د زۆر بن و هیڤیا سەركەفتن و بەردەوامیێ بۆ خاست.
هەر د ڤێ سەرەدانێ دا د. ئارام محەمەد قادر د رێورەسمەكی دا كۆلیژا زانستێن سیاسی ل زانكۆیا دهۆك ڤەكر، كو پێكهاتیە ژ هەردوو پشكێن پەیوەندیێن نێڤدەولەتی و دبلۆماسی و پشكا سیستەمێ سیاسی و سیاسەتا گشتی، ل دۆر ڤی بابەتی ژی وەزیرێ خاندنا بلند د پەیڤەكی دا بۆ مامۆستا و ستافێ كۆلیژێ پشتەڤانیا وەزارەتێ بۆ دووپات كر و راگەهاند كو سەرخستنا ڤێ كۆلیژێ و پەرەرپێدانا وێ دێ بیتە دەسكەفتەكێ دیتر ژ دەستكەفتێن زانكۆیا دهۆك.
هەر ل زانكۆیا دهۆك وەزیرێ خاندنا بلند دگەل راگر و چەند مامۆستایێن زانكۆیێ كۆمبوو و دانوستاندن ل سەر چەند كێشە و ئاریشێن نوكە یێن پرۆسا خاندنێ كرن، د ڤی چارچووڤەی دا د. ئارام محەمەد قادر راگەهاند كو ل ناڤ ڤێ رەوشا نالەبارا دەڤەرێ و بەلاڤبوونا پەتایا كۆرۆنایێ، پرۆسا خاندنێ ب سیستەمێ ئاوێتە ئێك بۆ ژ هەلبژارتنێن ناچارێن ئەڤ سالا خاندنێ داكو پرۆسا خاندنێ یا پاراستی بیت، ل دویف سیستەمێ خاندنا ئاوێتە ژی ئەولەویەتا مە بۆ خاندنێ دناڤ كەمپێ زانكۆیێ یە، گۆت ژی ئومێدا مە ئەوە دەمێ رەوش باشتر بیت هەمی وانە ل ناڤ كەمپێ زانكۆیێ بهێنە خاندن، بۆ ڤێ ژی قووناغ ب قووناغ ل بەر رۆشنایا وان راپۆرت و هەلسەنگاندن و رێكارێن لژنا بلند یا رووی ب رووی بوونا كۆرۆنایێ و وەزارەتا ساخلەمی دێ هێنە دیاركرن، زانكۆیێن مە ب جێبەجێ كرنا سەرجەم پرۆتۆكۆل و رێنمایان دگەل رەوشا ساخلەمی یا هەرێما مە دێ هێنە گونجاندن، ب رەنگەكی پاراستنا گیانێ قوتابی و فەرمانبەر و مامۆستایێن زانكۆیێ ل بەرچاڤ بهێتە وەرگرتن.
هەر ل رۆژا 8/11/2020 وەزیرێ خاندنا بلند و ڤەكۆلینێن زانستی دگەل دا سەرۆكێ زانكۆیا دهۆك و رێڤەبەرێن گشتی یێن وەزارەتێ سەرەدانا پارێزگارێ دهۆكێ د. عەلی تەتەر كر و دكۆمبوونەكی دا بەحسێ چاوانیا ب رێڤەچوونا پرۆسا خاندنێ ل زانكۆ و پەیمانگەهێن هەرێما كوردستانێ ب گشتی و دهۆكێ ب تایبەتی هاتە كرن، بۆ ڤێ چەندێ ژی وەزیرێ خاندنا بلند رۆلێ پارێزگارێ دهۆكێ ل گەشەپێدان و پشتەڤانیێ بۆ سێكتەرێ خاندنا بلند ل سنۆرێ پارێزگەها دهۆك ب گرنگ زانی، و هەروەسا پلان و بەرنامێن سالا نوی یا خاندنێ ژی بەرچاڤ كرن، و دڤی چارچووڤەی دا پارێزگارێ دهۆكێ دەستخۆشیا كارێن وەزارەتێ كر و جارەكا دی پشتەڤانیا خۆ بۆ سێكتەرێ خاندنا بلند ل پارێزگەها دهۆكێ دووپاتكر.