قۆتابیێن خۆشتڤی…
مامۆستا و فه‌رمانبه‌رێن هێژا یێن زانكۆیا دهۆك
سوبه‌هی، رۆژا ئێكشه‌مبی، رێکەڤتی ١٠-١٠-٢٠٢١، رۆژا ده‌نگدانێ یه، ده‌نگدان بۆ پاراستنا مافێن مه یە، یێن تاكو نوكه بده‌ستڤه‌هاتین، هەروەسا بۆ بده‌ستڤه‌ئینانا وان مافانە، ئەوێن ئه‌م خه‌باتێ بۆ دكه‌ین. واتە، پشکداریكرنا بهێز د هه‌لبژارتنێن سوبه‌هی دا، پاراستن و بدەستڤەئینانا مافانە. هه‌روه‌ك هوین دزانن، ماف ناهێنه دان، به‌لكو دهێنه وه‌رگرتن، بۆ ڤێ چه‌ندێ ژی پێدڤیه هژمارا ده‌نگ و نوێنه‌رێن مه یێن به‌ره‌ڤانیێ ل ده‌ستكه‌ڤت و مافێن مه دكه‌ن ل به‌غدا زۆر و بلند و بەرچاڤ بن.
قوتابیێن عه‌زیز…
هه‌بوونا زانكۆیا دهۆكێ ئه‌نجامێ خه‌بات و قوربانیدانا ده‌هان ساڵێن فیداكاریا باب و باپیرێن مە و هه‌روه‌سا جانفیدایی یا پێشمه‌رگێنمە یێن قه‌هره‌مان بوویه ل ده‌ڤه‌را به‌هدینان و ته‌ڤاهییا كوردستانێ. دامه‌زراندنا زانکۆیا دھۆک ژی، ژ ئه‌نجامێ بڕیارا حه‌كیمانه‌یا سه‌ركردایه‌تیا سیاسییا كوردستانێ بوویه. به‌رده‌وا‌میدانا پرۆسا خواندن و فێربوونێ د كه‌شه‌كێ ئارام و پاراستی دا، بۆ پێگه‌هاندنا هه‌وه‌یێن خۆشتڤی، ئه‌نجامێ كاركرنا شه‌ڤ و رۆژا پێشمه‌رگه و ئاسایش و هێزێن ئه‌منی یه. بۆ پاراستنا ڤێ و چه‌ندین ده‌ستكه‌ڤتێن دی، پێدڤیه ئه‌م ب ئەرکێ خۆ یێ نیشتیمانی راببین و وەک ماف و وەک ئەرک سوبه‌هی ب ئازادانه دەنگێ خۆ بكاربینین بۆ بەرژەوەندی و پاراستنا خاک و نیشتیمانێ کوردستانێ.
ده‌یكو بابێن قوتابیان…
بو زامنكرنا پاشەرۆژەکا گەش بو كوڕ و كچێن خۆ ل كوردستانێ و پاراستنا وان ژ ده‌ستێن نه‌یاران، پێدڤیه هوین به‌ری هه‌ر كه‌سه‌كی به‌ره‌ڤ سندۆقێن ده‌نگدانێ بچن و ب ئازادانە ده‌نگێ خۆ بده‌نه لایه‌نێن كو ئه‌ركێ به‌ره‌ڤانی و پاراستنا مه هه‌میان ل بەرچاڤ وەرگرتینە و دێ وەرگرن.
مامۆستا و فه‌رمانبه‌ر و هاوڵاتیێن خۆشتڤی…
زانكۆ مه‌لبه‌ندا زانست و مه‌عریفێ یه، هوین ژی هه‌می خودانێن وێ نه. زانكۆ پارچەکا گرنگە ژ جڤاكه‌كی كو هوین ب هه‌می ئۆل و نه‌ته‌وه و ئێتنیك تێدا ئه‌ندامن، ده‌نگدان بۆ پاراستن و به‌رده‌وامیا وێ، مافێ مه هه‌میانه. سۆز و په‌یمان بیت ئه‌م كاربكه‌ین بۆ پێشڤه‌برنا ئاستێ فێربوون و خواندنێ و خزمه‌تكرنا جڤاكێ مه، بەلێ گەلەک پێدڤیە ئەم ھەمی ب ئێکدەست بەردەوامیێ ب ڤێ ئارامیا ئەم تێدا دژین بدەین، کو پشکداری د دەنگدانێ دا خزمەتا پاراستن و گەشەکرنا ڤێ ئارامیێ دکەت.
ل دویماهیێ، داخوازێ ژ هەر ئێک ژ هەوەیێن هێژا دكه‌م سوبه‌هی مافێ خۆ یێ دیموكراتیك بكار بینن و ئەرکێ خۆ یێ نیشتیمانی ئەدابکەن و ده‌نگێ خۆ بده‌نه هه‌لگرێن ئاڵایێ پاراستنا كورد و كوردستانێ.
د. داود سلێمان ئەتروشی
سەرۆکێ زانکۆیا دھۆک
٢٠٢١/١٠/٩