سه‌رۆكێ‌ زانكۆیا دهۆك: دێ‌ گرنگیێ‌ ده‌ینه‌ په‌رتووكخانا ناڤه‌ندی دا قوتابی ب باشترین شێوه‌ مفای ژێ‌ بینن
نوفمبر 14, 2021, 11:42 ص

سه‌رۆكێ‌ زانكۆیا دهۆك، د. داود سلیمان ئه‌تروشی، ل رۆژا 4/10/2021 سه‌ره‌دانا په‌رتووكخانا ناڤه‌ندی یا زانكۆیا دهۆك كر، و گه‌ریانه‌ك د ناڤ پشكێن په‌رتوكخانێ‌ دا كر، داكو ژ نێزیك ل دۆر كاركرنا په‌رتووكخانێ‌ ئاگه‌هدار ببیت.

د. داود سلیمان ئه‌تروشی د ڤێ‌ سه‌ره‌دانێ‌ دا گۆت "مه‌ دڤێت په‌رتووكخانا ناڤه‌ندی هوسا به‌رهه‌ڤ كه‌ین قۆتابیێن مه‌ پتر به‌رێ‌ خۆ بده‌نه‌ په‌رتووكا و په‌رتووكخانێ‌، هه‌روه‌سا ببیته‌ جهه‌ك چالاكی لی بهێنه‌كرن، قوتابیێن ماسته‌ر و دكتۆرایێ‌ كارێن خۆ ل وێرێ‌ ئه‌نجام بده‌ن، چونكو گه‌له‌ك ژێده‌رێن زانستی یێن لێ‌ هه‌ین ژ په‌رتووك و گۆڤار و نامێن ماسته‌ر و دكتۆرایێ‌، و ئه‌م دێ‌ پتر گرنگیێ‌ ده‌ینێ‌ كو قوتابی ب باشترین شێوه‌ مفای ژێ‌ ببینن".

سه‌رۆكێ‌ زانكۆیا دهۆك هه‌روه‌سا به‌حسێ‌ مه‌ره‌ما ڤێ‌ سه‌ره‌دانێ‌ كر بۆ په‌رتووكخانا ناڤه‌ندی و گۆت "مه‌ره‌م ژ ڤێ‌ سه‌ره‌ردانێ‌ ئه‌وه‌ ئه‌م ڤێ‌ په‌رتووكخانێ‌ بشێوه‌كێ‌ باشتر بێخینه‌ دكاری دا، چونكو په‌رتووكخانه‌ دلێ‌ هه‌ر زانكۆیه‌كی یه‌".

د ڤێ‌ سه‌ره‌دانێ‌ دا كو هاریكارێ‌ سه‌رۆكێ‌ زانكۆیێ‌ بۆ كاروبارێن كارگێری و دارایی، د. احمد محمد صالح، ژی دگه‌ل دابوو، سه‌رۆكێ‌ زانكۆیا دهۆك، به‌حسێ‌ رێنما و شێوازێن نوی یێن كاركرنێ‌ كر ل ناڤا په‌رتووكخانان و دووپاتی ل وێ‌ چه‌ندێ‌ كر كو دڤێت كارێ‌ بكۆم بهێته‌ كرن داكو پتر هاریكاری و هه‌ڤكاری دناڤبه‌را فه‌رمانبه‌ران دا هه‌بیت و كار ب ئاسانی ب رێڤه‌ بچیت.