وەزارەتا خواندنا بلند کرێیا خواندنێ کێمکر
أكتوبر 6, 2022, 9:31 ص

ئەڤرۆ روژا چوارشەمبی رێکەڤتی 5ـێ ئوکتۆبەرێ2022ـێ، عەباس ئەکرەم پەیڤدارێ وەزارەتا خواندنا بلند و ڤەکۆلینێن زانستی راگەهاند: ژبەر بارودۆخێ تایبەتێ هەرێما کوردستانێ و د هەمان دەم دا داکو بشێین دەلیڤێن زۆرترێن خواندنێ بۆ قوتابیێن هەرێما کوردستانێ دابینبکەین، هەروەسا گیانێ هەڤرکیێن زانستی ل سازیێن ئەکادیمی بپارێزین، وەزارەتا خواندنا بلند بریارا دا ب کێمکرنا کرێیا خواندنێ ل زانکۆ و پەیمانگەهێن حکومی و تایبەت.

پەیڤدارێ وەزارەتا خواندنا بلند دیارکر "کرێیا خواندنێ ل زانکۆ و پەیمانگەهێن حکومیێن هەرێما کوردستانێ ب رێژا ٤٥% ل هەمی قووناغێن خواندنا دەستپێکی و خواندنا بلند (پارالێل، ئێڤاران) هاتە کێمکرن، هەروەسا ل زانکۆ و پەیمانگەهێن تایبەت لدویڤ ئەنجامێن رێزبەندیا نیشتمانی ب رێژا (١٠ بۆ ٢٠%) بۆ هەمی قۆناغێن خواندنێ هاتە کێمکرن".

ئەکرەم عەباس گۆت ژی "فەرمانا وەزاری یا کێمکرنا کرێیا خواندنێ بۆ هەمی زانکۆ و پەیمانگەهێن حکومی و تایبەت یێن هەرێما کوردستانێ هاتیە ئاراستەکرن، بۆ ڤێ سالا خواندێ ژی ئەڤ بریارە دێ چیتە د بوارێ بجهئینانێ دا، ب ڤی شێوێ ل خوارێ:

زانکۆیێن حکومی:

داشکاندن ب رێژەیا (٤٥%) ژ کرێیا خواندنا (پارالێل، ئێڤاران) بۆ هەمی قووناغێن خواندنا دەستپێکی و خواندنا بلند ل سەرجەم زانکۆیێن حکومی و سازیێن دی یێن وەزارەتا خواندنا بلند و ڤەکۆلینێن زانستی بۆ سالا خواندنێ (٢٠٢٢-٢٠٢٣).

زانکۆیێن تایبەت:

کێمکرنا کرێیا خواندنێ دێ لدویڤ ئەنجامێن رێزبەندیا نیشتمانی بیت، لدویڤ شێوێ ل خوارێ:

  • کرێیا خواندنێ ل زانکۆیێن گرۆپ B، ب رێژا (١٠%)دێ هێتە کێمکرن.
  • کرێیا خواندنێ ل زانکۆیێن گرۆپ C، ب رێژا (١٥%)دێ هێتە کێمکرن.
  • کرێیا خواندنێ ل زانکۆیێن گرۆپ D، ب رێژا (٢٠%)دێ هێتە کێمکرن.
  • کرێیا خواندنێ ل هەمی پەیمانگەهێن تایبەت و کولیژێن زانکۆیان ب رێژا (٢٠%)دێ هێتە کێمکرن.