قوتابیێن زانكۆیا دھۆك وانەیێن جینۆسایدێ ل قوتابخانا پێشكێشدكەن
June 15, 2023, 10:10 a.m.

سەنتەرێ ڤەكۆلینێن جینۆسایدێ ل زانكۆیا دھۆك ب ھەڤكاری ل گەل سەنتەرێ بێشكچی بۆ ڤەكۆلینێن مرۆڤایەتی، ل ١٨ـی نیسانێ 2023، و ب ئامادەبوونا د. داود سلێمان ئەتروشی سەرۆکێ زانکۆیا دهۆک، وۆركشۆپەك ب ناڤونیشانێ "سەربۆر ژ گۆتنا سمینارێن جینۆسایدێ ل قوتابخانا" ئەنجامدا. ئەڤ وۆركشۆپە بۆ قوتابیێن پشكدار د پرۆژێ "جینۆساید د بیردانكا مە دا" ھاتبوو رێكخستن كو پرۆژێ ناڤبری ژ لایێ ھژمارەكا قوتابیێن زانكۆیا دھۆك ژ كۆلیژێن جودا ب شێوێ خۆبەخش دھاتە ئەنجامدان و ژ لایێ سەنتەرێ ڤەكۆلینێن جینۆسایدێ دھاتە ب رێڤەبرن ب ھەڤكاری ل گەل رێكخراوا Youth Speak NGO.

ل دەستپێکێ سەرۆكێ زانكۆیێ هندەک دانوستاندن ل گەل قوتابیێن پشكدارێن پرۆژێ "جینۆساید د بیردانكا مە دا" کرن دەربارەی ئەزموونا وان د گۆتنا سمینارا دەربارەی جینۆسایدێ بۆ قوتابیێن قوتابخانا، دیسان سەرۆكێ زانكۆیێ جەخت ل سەر پشكداریكرنێ د كارێن خۆبەخشی دا كر ب تایبەت ژ لایێ قوتابیا ڤە، كو دبیتە ئەگەرێ بدەستڤەئینانا زانینێ و پێشكەڤتنا تاكەكەسی و پەیدابوونا سەربۆرێن نوی ل دەف قوتابی و دبیتە ئەگەرێ ئاڤاكرن و پێشڤەبرنا جڤاكی. دیسان دەستخۆشی ل قوتابیێن پشكدار كر بۆ ھەبوونا گیانێ خۆبەخشیێ ل دەف وان و دیاركر "ئەڤە کارێ هەوە وێ واتایێ ددەت كو ھوین خودان كەیسەكێ ھەڤپشك و باوەریەكا بھێزن و ئەڤ كارە رەنگڤەدانا پەیوەندیەکا بھێزە دناڤبەرا هەوە و ئاخ و وەلات و جڤاكی دا، ل دویڤ دا سەرۆكێ زانكۆیێ داخواز ژ قوتابیا كر ھەر ئێك ژ لایێ خۆ ڤە ھاندانا قوتابیا بكەت بۆ ئەنجامدانا كارێن خۆبەخشیێ". ل دویماھیێ خۆشحالیا خۆ دەربری كو گرۆپەكێ قوتابیا ژ كۆلیژێن جودا ب خۆبەخشی كاردكەن و ئامادەیا خۆ بۆ پێشكێشكرنا ھاریكاریێ بۆ پرۆژێن خۆبەخشی د داھاتی دا نیشاندا.

ل دویڤ دا د. سالم جاسم حاجی رێڤەبەرێ سەنتەرێ ڤەكۆلینێن جینۆسایدێ پەیڤەك پێشكێشكر و تێدا باس ل جینۆسایدێ كر و ب ئەنفال و كۆمكوژی و كیمیابارانا حەلەبچە و جینۆسایدا ئێزدیان ڤە گرێدا، ناڤبری دیاركر "ل سەردەمێ نوی پتری ھەمی مللەتان ل سەر ئاستێ جیھانێ مللەتێ كورد تۆشی جینۆسایدێ بوویە. لەورا یا گرنگە كارەساتێن ب سەرێ مللەتێ مە ھاتین ژبیرنەكەین و كار ل سەر نڤشێن نوی بكەین، ب تایبەتی قوتابخانا، داكو ئاگەھی جینۆسایدا ب سەرێ مللەتێ مە ھاتی ببن". دیسان ناڤبری ئاماژەدا گرنگیا پێشكێشكرنا سمینارێن جینۆسایدێ ژ لایێ قوتابیێن زانكۆیێ ڤە، ژبەركو بابەتێ بریاردای یێ جینۆسایدێ بۆ قوتابخانا ژ لایێ مامۆستایێن نەبسپۆر ڤە دھێتە پشكێشكرن، لەورا ئەڤ پرۆژە دێ بیتە ئەگەرێ پەیدابوونا فیدباكی ل دەف قوتابیێن قوتابخانا و دێ بیتە پالدەر کو پتر لێگەریان و دویڤچوونێ بۆ بابەتێ جینۆسایدێ بكەن. ل دویماھیێ ناڤبری گۆت "ئەم یێ كاردكەین داكو جینۆساید دووبارە نەھێنە رویدان و ئەگەر رویدان ژی، كار بۆ راوەستاندنا وان بكەین".

د بەردەوامیا ڤێ وۆرکشۆپێ دا، قوتابیێن پشكدار سەربۆرا خۆ د پێشكێشكرنا سمینارا دا بۆ قوتابیێن قوتابخانا ڤەگێرا، قوتابیێن پشكدارێن وۆركشۆپی پێكھاتبوون ژ: محەمەد حەسەن حسێن (رێكخەرێ پرۆژەی) و دەرچوویێ كۆلیژا زانستێن سیاسی – پشكا سیستەمێن سیاسی و سیاسەتا گشتی، سەگڤان سلێمان عەلی، قوتابی ل كولیژا زانستێن مرۆڤایەتی – پشكا ئاشتی و مافێ مرۆڤ، ئیبراھیم سەعید مستەفا، قوتابی ل كۆلیژا زانستێن سیاسی – پشكا پەیوەندیێن ناڤدەولەتی، ژیان سەدیق عەبدوللا، قوتابی ل كۆلیژا زانستێن سیاسی – پشكا پەیوەندیێن ناڤدەولەتی، دیلان ئەنەس حسێن، قوتابی ل كۆلیژا زمانان – پشكا وەرگێران. ھەر ئێك ژ قوتابیێن ناڤبری باس ل سەربۆرا خۆ د پێشكێشكرنا سمیناران دا بۆ قوتابیێن قوتابخانا ل دۆر جینۆسایدێ كر. ل دویماھیێ ژی ھژمارەكا راسپاردە و پێشنیارا ژ لایێ قوتابیا ڤە بۆ درێژەپێدانێ ب پرۆژەی و ئەنجامدانا چالاكیێن زێدەتر پێشكێشكرن.

راگەھاندنا زانكۆیا دھۆك؛ ٢٠ـی نیسان ٢٠٢٣

راپۆرت: ماھر كێستەیی

فۆتۆ: محەمەد عەبدولکەریم