ئەڤرۆ رێکەڤتی ١١ـی نیسانێ ٢٠٢٣ و ل ناڤەندا قوتابیان ل زانکۆیا دهۆک، ب ئامادەبوونا د. داود سلێمان ئەتروشی سەرۆکێ زانکۆیا دهۆک و رێزدار عەلی عەونی بەرپرسێ لقا ئێک یا پارتی دیمۆکراتی کوردستان، ستافێ ئەکادیمی و کارگێریێ زانکۆیا دهۆک، سەرۆکاتیا زانکۆیا دهۆک فتارە دگەل نێزیکی ١٦٠٠ قوتابیان کچ یێن ئاکنجیێن پشکێن ناڤخۆیی یێن زانکۆیا دهۆک کر.
ل دەستپێکا ڤێ خڕڤەبوونێ و د پەیڤەکا کورت دا، سەرۆکێ زانکۆیا دهۆک بخێرهاتنا قوتابی و مێڤانا کر و سوپاسیا لقا ئێک یا پارتی دیموکراتی کوردستان کر بۆ بەرهەڤکرنا ڤێ فتارێ بۆ قوتابیێن زانکۆیا دهۆک و وەک نیشانا گرنگیدانێ ب تەخا قوتابی و لاوان هژمارت و دیارکر کو "ئەڤ فتارە نەبتنێ خوارنەکە، بەلکو روینشتنەکا خێزانی یە بۆ قوتابی و مامۆستا و فەرمانبەرێن زانکۆیا دهۆک".
ژ لایێ خۆ ڤە، بەپرسێ لقا ئێک د پەیڤا خۆ دا سوپاسیا سەرۆکاتیا زانکۆیا دهۆک کر بۆ رەخساندنا زەمینێ بۆ ڤێ خڕڤەبوونێ و راگەهاند "وەلات و ئایین و دۆزا مە، مە کۆمدکەت، ئەڤە ژی ئێکرێزی و ئێکەتیا مە بهێزدئێخیت".
هەژی ئاماژێ یە وەکو نەریتەکێ سالانە، سەرۆکاتیا زانکۆیا دهۆک ل مەها رەمەزانا پیرۆز دگەل قوتابیێن زانکۆیا دهۆک یێن ل پشکێن ناڤخۆیی ئاکنجی فتارەکێ دکەت و دبیتە دەلیڤە کو قوتابیان ژ نێزیک ستافێ ئەکادیمی و کارگێریێ زانکۆیا دهۆک ببینیت و دانوستاندنێن جوان و پڕی هەڤالینی د ناڤبەرا وان دا دروستببن. ل رەمەزانا ئەڤ سالە ژی سەرۆکاتیا زانکۆیا دهۆک بۆ خوارنا فتارێ دگەل نێزیکی ١٦٠٠ قوتابیێن کچ خڕڤەبوو و بریارە سوباهی ژی دگەل نێزیکی ١٨٠٠ قوتابیێن کور یێن ل پشکێن ناڤخۆیی ئاکنجی ل هەمان جهـ فتارێ بکەت.
سەرۆکاتیا زانکۆیا دهۆک؛ ١١ـی نیسانێ ٢٠٢٣
فۆتۆ: عەلی حەبیب