ب مەرەما خورتكرنا پەیوەندیێن زانكۆیا دهۆك یێن نێڤدەولەتی و دروستكرنا پەیوەندیێن نوی یێن ئەكادیمی دگەل سازیێن ئەكادیمی یێن ئەلمانی، ل رێکەڤتی ٤/٥/٢٠٢٢ سەرۆكێ زانكۆیا دهۆك د. داود ئەتروشی د سەرەدانا خۆ یا فەرمی یا ئێكێ دا وەکی سەرۆکێ زانکۆیا دهۆک بۆ وەلاتێ ئەلمانیا، چەندین دیدارێن گرنگ دگەل هژمارەكا بەرپرسێن ئەكادیمی و سیاسی ئەنجامدان.
سەرۆکێ زانکۆیا دهۆک د سەرەدانا خۆ دا بۆ باژێرێ شتۆتگارت ل هەرێما بادن ڤۆرتمبێرگ ل ئەلمانیا دگەل هاریكارێ سەرۆكێ زانكۆیا شتوتگارت DHBW پرۆفیسۆر (پیێتەر ڤاتەرلاین ) کۆمبوو، ئەڤ زانكۆیە هەڤكارا سەرەكیا زانكۆیا دهۆكە د پرۆژێ دانانا (پەیمانگەها چارەسەریا دەروونی) و هەروەسا كلینیكا پەیوەندیدار ل زانكۆیا دهۆك، د ڤێ دیدارێ دا گەنگەشە ل سەر بەرفرەهكرنا پەیوەندیان هاتنەكرن.
هەروەسا سەرۆکێ زانکۆیا دهۆک د ڤێ سەرەدانا فەرمی دا دیدارێن جودا ئەنجامدان دگەل شیرەتکارا وەزارەتا زانست (کوکاڤسکی شۆلەرت)، سەرۆکێ باژێرڤانیا کارلشرۆهە (فرانک مێنتروپ)، بەرپرسێن کاروبارێن عیراقی ل هەرێما بادن ڤۆرتمبێرگ و تیمێ ئەلمانی یێ پەیمانگەها چارەسەریا دەروونی ل زانکۆیا دهۆک، د ڤان دیداران دا پشتەڤانیەكا گەرم ل بەرفرەهكرنا پەیوەندیان هاتە كرن.
بۆ زانین، بەرپرسێن باژێرێ شتۆتگارت گرنگیەكا تایبەت ب پارێزگەها دهۆكێ ددەن، چونكو پێشتر هەر ئێك ژ بەرێز د. علی تەتەر و بەرێز فەرهاد ئەمین، وەك پارێزگارێن پارێزگەها دهۆكێ، سەرەدانا ڤێ باژێری كربوون و رێكەڤتنەكا لێكتێگەهشتنێ گرێدایە.
ل رێکەڤتی ٥/٥/٢٠٢٢ ل رۆژا دووێ یا سەرەدانا خۆ دا بۆ ئەلمانیا، سەرۆكێ زانكۆیا دهۆك دوو دیدار ئەنجامدان. د. داود ئەتروشی هاتە پێشوازی كرن ژ لایێ سەرۆكا پەرلەمانێ هەرێما بادن ڤۆرتمبێرگ خانم (موهتەرەم ئاراز) كو د بناغە دا كوردا خەلكێ بینگۆلێ یە، ئەڤ خانما كورد بۆ جارا دووێ یە هاتیە هەلبژارتن وەكو سەرۆكا پەرلەمانی. دیدارا دووێ ژی دگەل خانم (ئایلا كاتالتەپە)، ئەنداما پەرلەمانێ وێ هەرێمێ بوو، ئەڤ خانمە ژی د بنەرەت دا خەلكا كوردستانا باكورە. د هەردوو دیداران دا هژمارەكا بابەتان هاتنە گەنگەشەكرن، ب تایبەتێ بابەتێن گرێدایی خواندنا بلند، رەوشا قوتابی و ئافرەتان ل زانكۆیا دهۆك و ئاریشا بێكاریێ دناڤ دەرچوویێن زانكۆیان دا.
ل دویماهیا سەرەدانا خۆ بۆ وەلاتێ ئەلمانیا، سەرۆکێ زانکۆیا دهۆک پشکداری کۆنفرانسێ ئێسن بوو ، د. داود ئەتروشی دیارکر "پشکداری د کۆنفرانسێن نیڤدەولەتی دا، زێدەباری لایەنێن ئەکادیمی و مفاوەرگرتن ژ پێشکەڤتنێن زانستی یێن وان وەلاتان، دەلیڤەیەکە بۆ ئاڤاکرنا پرێن پەیوەندیێ و مفاوەرگرتن ژ ئەزموونێن هەڤ".
هەر د سەرەدانا خۆ دا بۆ ئۆروپا سەرۆكێ زانكۆیا دهۆك دگەل پێنج سەرۆك زانكۆ و هژمارەكا بەرچاڤ ژ كادرێن پایەبلندێن ئەكادیمی یێن هەشت زانكۆیێن كوردستانێ (دهۆك، پۆلیتەكنیكیا دهۆك، زاخۆ، سەلاحەدین، سلێمانی، چەرمۆ، گەرمیان و هەلەبچە) و هەروەسا نوینەرێن وەزارەتا خواندنا بلند و ڤەكۆلینێن زانستی بۆ ماوێ پێنج رۆژان پشكدار بوون د خولەكا راهێنانێ دا ل وەلاتێ نەرویج ل زانكۆیا ئۆسلۆ، بابەتێ خولێ راهێنان بوو لدۆر چەوانیا بجهئینانا (بۆلۆنیا پرۆسێس) كو نوكە ل زانكۆیێن هەرێمێ دهێتە پەیرەوكرن، و هەروەسا فێربوون ژ سەربۆرا زانكۆیا ئۆسلۆ.
هەژی ئاماژێ یە ئێكەتیا ئۆروپی پشتەڤانیا دارایی یا ڤی پرۆگرامی دکەت و چوار زانكۆ ژ هەر ئێك ژ وەلاتێن نەرویج، ئسپانیا، ئیتالیا و پورتۆگال تێدا پشكدارن.
لدۆر سەرەدانا وەلاتێ نەرویج و پشکداریکرنێ د ڤێ خولێ دا د. داود ئەتروشی دیارکر "خولەكا چڕ و ب مفا بوو بۆ هەمی پشكداران، هەڤدەم دەلیڤە بوو کو چەندین دیداران ئەنجامبدەین و پەیوەندیا دروستبکەین دگەل كەسانێن ئەكادیمی و سیاسیێن نەرویجی و هەروەسا دگەل دیاسپۆرا كوردی ل وەلاتێ نەرویج كو كەسانێن خودان شیان و سەركەڤتی بوون و حەزدكەن هاریكاری و پشتەڤانیا پێشڤەبرنا كەرتێ خواندنا بلند ل كوردستانێ بکەن.