زانکۆیا دهۆک ل گەل جڤاتێن جۆتیارێن دەشتا نەینەوا کۆمبوو
June 14, 2023, 9:40 a.m.

د چارچۆڤێ پرۆژێ (پشتەڤانیا پێرابوونێن کەلتۆریێن رەسەن ل دەشتا نەینەوا) دا، ئەوێ زانکۆیا دهۆک ب هەڤکاری دگەل رێکخراوا USAID ئەنجامددەت، و ب مەرەما هەلسەنگاندنا قۆناغا نوکە یا پرۆژەی و دەستنیشانکرنا ئاستەنگ و ئاریشێن دەڤەرێ د بوارێ چاندنێ دا و چەوانیا بەزاندنا وان، ل رێکەڤتی ٧ـی گۆلانێ ٢٠٢٣، زانکۆیا دهۆک دگەل هژمارەکا ئەندامێن جڤاتێن جۆتیارێن دەشتا نەینەوا کۆمبوو.

د کۆمبوونێ دا، و ب ئامادەبوونا هەردوو هاریکارێن سەرۆکێ زانکۆیا دهۆک، د. لوقمان هادی حەسەن و د. نەبەز ئیبراهیم محەمەد و رێڤەبەرا ئۆفیسا پەیوەندیێن ناڤدەولەتی یا زانکۆیا دهۆک و هژمارەکا مامۆستایێن زانکۆیا دهۆک، پلانێن پاشەرۆژی یێن سەرئێخستنا پرۆژێ ناڤبری هاتنە گەنگەشەکرن.

د. شەوكەت عەبدولرزاق نیشاندانەك دەربارەی "بەرنامێ ساخڤەكرنا كەلتۆرێ رەوشەنبیری ب رێكا چاندنێ ل دەشتا نەینەوا" پێشكێشكر. ل دەستپێكێ ئاماژە دا وێ چەندێ كو پالپشتیا دارایی ژ لایێ ئاژانسا ئەمریكی بۆ گەشەپێدانا ناڤدەولەتی دھێتە كرن ب مەرەما ڤەكۆلینا ئاستەنگێن پێرابوونێن کەلتۆری ل دەشتا نەینەوا ب رێكا كەرتێ چاندنێ و خوارنێ و پەیداكرنا چارەسەریێن گونجای. ئەڤ پرۆژە دەڤەرێن حەمدانیە و تلكێف و بەعشیقە بخۆڤەدگریت ژ ڤان دەڤەران ژی ٣٠ گوند ژ دەڤەرێن جودا بۆ ھەلسەنگاندنا پێدڤیێن وان ھاتینە ھەلبژارتن.

د درێژەپێدانا نیشاندانا خۆ دا د. شەوكەت عەبدولرزاق ب ھویری باس ل ئاستەنگێن بەرھەمئینانا گیانەوەری و ئالنكاریێن بەرھەمئینانا متایێن رەزا و زەرزەواتی كر و ئەنجامێن هندەک ڤەكۆلینا، یێن د ڤی بواری دا ھاتینە ئەنجامدان، دیاركرن. ل دویماھیێ گرنگترین پێشنیاز بۆ باشتركرنا بەرھەمئینانا متایێن رەزی و زەرزەواتی بەرچاڤكرن.

ژ لایێ خۆ ڤە د. نەشوان شەوکەت باس ل قۆناغێن پرۆژێ "پشتەڤانیا پێرابوونێن کەلتۆریێن رەسەن ل دەشتا نەینەوا" كر، كو ئەڤ پرۆژە پەیوەندیێن د ناڤبەرا بوهایێن کەلتۆری و دیمەنێن سرۆشتی یێن چاندنێ بەرچاڤ دكەت، بۆ زانینا کارتێکرنێن جڤاكی، کەلتۆری، چاندنێ و ئابووری یێن ژ ئەگەرێ پێرابوونێن رێكخراوا تیرۆرستیا داعش ل سەر جڤاك و كەمینەیێن دەشتا نەینەوا پەیدابووین. ل گەل جەختكرن ل سەر دەڤەرێن حەمدانیە، تلكێف و بەعشیقە.

ل دویڤ دا مامۆستایێ ناڤبری باس ل قۆناغا ئێكێ یا پرۆژە كر، كو پێكھاتبوو ژ ئەنجامدانا ھەڤدیتنان ل گەل ٩٧ رێبەرێن جڤاكی و ١٠٧ جۆتیار و گوندیا و ١٥ ئاوارەیا، زێدەباری پێرابوونێن پیڤانەیی بۆ داتایێن ٨٩٢ جۆتیار و گوندیا. ل دویڤ ئەنجامێن قۆناغا ئێكێ و گەنگەشەكرن ل گەل تیما پرۆژەی، چەندین رێك بۆ چالاكیێن پرۆژەی قۆناغا دووێ ھاتنە دەستنیشانكرن، كو دشیاندایە ببنە ئەگەرێ پەرەپێدانا پەیوەندیێن دناڤبەرا بوهایێن کەلتۆری و دیمەنێن سرۆشتی یێن چاندنێ و پالپشتیكرنا نەرماتیا جڤاكی و ساخبوونەڤە ژ کارتێکرنێن شەرێ داعش.

ھەژی ئاماژەدانێ یە پرۆژێ "پشتەڤانیا پێرابوونێن کەلتۆریێن رەسەن ل دەشتا نەینەوا" ژ لایێ زانكۆیا دھۆك ڤە و ب ھەڤكاری ل گەل رێكخراوا USAID بۆ بهێزترکرنا پێکڤەژیانێ ل دەڤەرا دەشتا نەینەوا دھێتە ئەنجامدان.

راگەھاندنا زانكۆیا دھۆك؛ ١٠ـی گولان ٢٠٢٣

راپۆرت: ماھر كێستەیی و عسمەت خابوور

فۆتۆ: عەلی بانکی