سەرۆکێ زانکۆیا دهۆک دگەل جڤاتا کولیژا دەرمانسازی کۆمبوو
راگەهاندنا زانکۆیا دهۆک؛ ١٢ـی کانوینا دووێ ٢٠٢٣
ئەڤرۆ رێکەڤتی ١٢ـی کانوینا دووێ ٢٠٢٣، و ب مەرەما هایداربوونێ ل سەر چەوانیا ئەنجامدانا پرۆسێسێن زانستی و ئەکادیمی و پێگەهاندنێ و بجهئینانا پێڤاژۆیا بۆلۆنیا و هەروەسا زانینا رێگریێن دکەڤنە د ڤان بابەتان دا، سەرۆکێ زانکۆیا دهۆک دگەل جڤاتا کولیژا دەرمانسازی کۆمبوو و دانوستاندن ل دۆر بابەتێن ناڤهاتی و کۆمەکا بابەتێن دی کرن.
د ڤێ کۆمبوونێ دا و ب ئامادەبوونا د. دلشاد عەبدولجەبار حەلیم، هاریکارێ سەرۆکێ زانکۆیێ و د. سۆزان عومەر رەسوول، راگرا کولیژا دەرمانسازی ل زانکۆیا دهۆک و ئەندامێن جڤاتا کولیژا ناڤهاتی، راگرا کولیژێ ب گشتی شرۆڤەکرنەک دا پرۆسێس و پلان و پرۆژێن کولیژا دەرمانسازی و ئاماژە دا چەوانیا بجهئینانا پێڤاژۆیا بۆلۆنیا، کو د ڤێ سالا خواندنێ دا، ل قۆناغا ئێکێ هاتیە بجهئینان.
هەر د کۆمبوونێ دا، دانوستاندن ل دۆر چەوانیا پتر رێکخستن و پێشڤەبرنا پرۆسێسێن زانستی و ئەکادیمی و فێرکرن و پێگەهاندنا قوتابیا و دروستکرنا سەقایەکێ پێشکەڤتیتر بۆ خواندن و فێربوون و ڤەکۆلینێ و خواندنا بلند و دابینکرنا ستافەکێ ئەکادیمیێ گونجای بۆ کولیژا دەرمانسازی و گرنگیا بهێزترکرنا هەماهەنگیێ دگەل رێڤەبەریا ساخلەمیێ و هەروەسا کەرتێ تایبەت هاتنە کرن و جڤاتا کولیژا دەرمانسازی ژی بۆچوونێن جودا د ڤان مژارا دا پێشکێشکرن.
هەژی ئاماژێ یە کو كولیژا دەرمانسازی ل 27/9/2009 هاتیە دامەزراندن و ژ پێنج پشكان پێكدهێت، ئەوژی: پشكا فارماكۆلۆژی، پشكا دەرمانسازیا كلینیكی، پشكا دەرمانسازیەكان، پشكا كیمیا دەرمانسازی و پشكا زانستێن بنەرەتی، و هەتا نوكە 425 قوتابی ژێ دەرچووینە.