کولیژا پزیشکی یا زانکۆیا دهۆک ب هەڤپشکی دگەل رێڤەبەریا گشتی یا ساخەلەمیا پارێزگەها دهۆکێ رێکەڤتننامەکا لێکتێگەهشتنێ دگەل زانکۆیا نبراسکا یا ویلایەتێن ئێکگرتیێن ئەمریکا ئیمزاکر.
ل ١٠ـی نیسانێ ٢٠٢٣ و ب پشکداربوونا د. عەلی تەتەر پارێزگارێ دهۆکێ، د. داود سلێمان ئەتروشی سەرۆکێ زانکۆیا دهۆک، د. ئەفراسیاب مووسا رێڤەبەرێ گشتی یێ ساخلەمیا پارێزگەها دهۆکێ، بەیان سامی عەبدولرەحمان نوینەرا حکومەتا هەرێما کوردستانێ ل ئەمریکا، د. رەند حەمۆدی رێڤەبەرا نڤیسینگەها پەیوەندیێن ناڤدەولەتی ل زانکۆیا دهۆک و د. دلدار حاجی مووسا راگرێ کولیژا پزیشکی ل زانکۆیا دهۆک و ژمارەکا تایبەتمەندێن بوارێ (پرۆژەیێن هەڤپشک، ساخلەمی، خواندنا بلند و راهێنانا بسپۆرا)، وەکو ئێکەم پێنگاڤا دروستکرنا دەستەخویشکاتیێ، رێکەڤتنناما لێکتێگەهشتنێ ب هەڤبەشی زانکۆیا دهۆک و رێڤەبەریا گشتی یا ساخلەمیا پارێزگەها دهۆکێ دگەل زانکۆیا نبراسکا یا ئەمریکی هاتە ئیمزاکرن.
د رێورەسمێن ئیمزاکرنا ڤێ رێکەڤتننامێ دا، ئەوا ب شێوازێ ئونلاین هاتیە ئەنجامدان، ب تێروتەسەلێ گەنگەشە ل دۆر زێدەتر پێشڤەبرنا پەیوەندیێن پارێزگەها دهۆکێ و باژێرێ نبراسکا هاتنەکرن، هەروەسا ژی پێشخستنا پەیوەندیێن د ناڤبەرا زانکۆیا دهۆک و زانکۆیا نبراسکا ژ تەوەرێن سەرەکیێن ڤان دانوستاندنا بوو، ب تایبەتی د بوارێ ئالوگۆرکرنا پێزانینا د بوارێ ساخلەمیێ و پێشڤەبرنا ساخلەمیا گەنج و زارۆکا. زێدەباری ئالوگۆرکرنا قوتابی و ستافێ ئەکادیمی د ناڤبەرا هەردوو زانکۆیان دا و ئەنجامدانا ڤەکۆلینێن زانستی دبوارێن جودا دا.
دهێتە زانین ئەڤ رێکەڤتننامە ئێکەم پێنگاڤا کارێ هەڤپشکە د ناڤبەرا پارێزگەها دهۆکێ و باژێرێ نبرسکا یێ ئەمریکی دا، کو بریارە بۆ ماوێ سێ سالا هەر ژ رۆژا ئیمزاکرنێ ئەڤ رێکەڤتننامە بەردەوام بیت.
راگەهاندنا زانکۆیا دهۆک؛ ١٢ـی نیسان ٢٠٢٣
فرمێسک حەسۆ