ستافێ وانەگۆتنێ یێ ھەردوو قوناغێن ئێكێ و دوویێ ل كولیژا پزیشكی یا زانكۆیا دھۆك، ب ئامادەبوونا راگرێ كولیژا پزیشكی د. دلدار حاجی مووسا، وۆركشۆپەك ل ژێر ناڤونیشانێ (فێركرنا گرۆپێن مەزن) بۆ مامۆستایێن ھەردوو كولیژێن پزیشكی یێن زانكۆیا دھۆك و زانكۆیا زاخۆ و پزیشك و بسپۆرێن زیندەوەرزانی و ستافێ سازیێن پزیشكی ل پارێزگەها دھۆكێ، ل ھۆلا پێشمەرگە یا ناڤەندا قوتابیان ل ٢ـی شوباتا ٢٠٢٣ ئەنجامدا.
وۆركشۆپ ب مەرەما دياركرنا دوو رێكێن جودا یێن وانەگۆتنێ ھاتە ئەنجامدان؛ رێكا ئێكێ، رێكا ئاسایی یا وانەگۆتنێ، كو تێدا مامۆستا سەركردە و تەوەرێ سەرەكیە د پرۆسێسا وانەگۆتنێ دا و ب گەھاندنا ھەمی پێزانینان بۆ قوتابیان رادبیت، بێی پشكداریكرنا وان د بابەتی دا، ئەڤ رێكە پێدڤیا ڤی سەردەمی د فێربوونێ دا دابین ناكەت و حەز ل سەر بكارئینانا وێ نینە. رێكا دووێ، رێكا نوی یا وانەگۆتنێ یە، كو وانەگۆتنا ب ھەڤرایە و پتر كاریگەری ھەیە، كو قوتابی ل سەر پشكداربوونێ د پرۆسێسا فێركرنێ دا هانددەت. ئارمانجا ئەڤی وۆركشۆپی پێشئێخستنا رێكێن وانەگۆتنێ بوو، زێدەباری دویڤچوونا پیڤەر و رێنمایێن وانەگۆتنا نوی بۆ قوتابیێن كولیژا پزیشكی.
پەیڤا دەستپێكێ ژلایێ راگرێ كولیژا پزیشكی د. دلدار حاجی مووسای ڤە ھاتە پێشكێشكرن، پاشی تەوەرێ ئێكێ یا وۆركشۆپی دەستپێكر، ئەوژی ب پێشكێشكرنا نموونەیەكێ ژ بابەتێ خواندنێ یێ قوناغا ئێكێ یێ كولیژا پزیشكی ژلایێ د. ھشیار عەزۆ. ل دویڤ دا نموونەیەك ژ بابەتێ خواندنێ یێ قوناغا دووێ ژلایێ د. عەبدولمەتین شوكری ڤە ھاتە پێشكێشكرن. دیسان پێنج مامۆستایان بابەتێن جودا ل دۆر پێشئێخستنا رێكێن وانەگۆتنێ ل كولیژا پزیشكی پێشكێشكرن، ئەوژی ب ڤی شێوەی: د. عەبدولسەلام محەمەد باس ل (نێرینەكا گشتی بۆ فێركرنا گرۆپێن مەزن) كر، د. محەمەد حازم بابەتەک ل دۆر (جھێ سمیناران د رێبازا پزیشكی یا نوی دا) پێشكێشكر. ل دویڤ دا د. ئەنەس عامر باس ل (پلاندانانا وانەگۆتنا ب ھەڤرا ب رێكا سمیناران) كر. د. شەنگ محەمەد ژی سمینارەك ل دۆر (تەكنیكێن وانەگۆتنا ب ھەڤرا) پێشكێشكر. ل دویماھیێ ژی د. ئاری محەمەد باس ل (چەوانیا ھەلسەنگاندنا سمیناران) كر.
د. عەبدولسەلام محەمەد، وەکو ئێك ژ پشكدارێن وۆركشۆپی، دیارکر "دەمێ فێركرنا گرۆپێن مەزن، شێوازێ سمینارێ دھێتە بكارئینان و د ئەنجام دا مامۆستای پتر دەمێ ئاخڤتنێ ھەیە؛ لەورا د ڤی دەمی دا پێدڤیە ستراتیژیا سمینارێ یا ب ھەڤرایی و چالاك بیت بۆ پشكداریكرنا قوتابیان د گەنگەشێ دا، داكو ب شێوەكێ باشتر فێرببن و ھاندانا وان بۆ پتر فێربوونێ بھێتەكرن. پێدڤیە د سمینارێ دا باشترین ستراتیژیێن وانەگۆتنێ بهێنە بکارئینان، داكو یا ب ھەڤرایی بیت و كاریگەری د فێركرنا گرۆپێن مەزن دا ھەبیت".
ل دویماھیا وۆركشۆپی، پرسیار ژ لایێ ئامادەبوویا ڤە بۆ پێشكێشكەرێن سمینارا هاتنە ئاراستەکرن و گەنگەشا ھزر و بۆچوونێن پێشكێشكری ھاتەكرن.
راگەهاندنا زانکۆیا دهۆک
و: ماھر كێستەیی