ئەڤرۆ رێکەڤتی 13/2/2022 پشكا مێژوویێ یا كولیژا زانستێن مرۆڤایەتی ل زانكۆیا دهۆك سمپۆزیومەكا زانستی ل ژێر ناڤێ (ڤەكۆلینێن مێژوویی ل هەرێما كوردستانێ دناڤبەرا كەتوار و خواستان دا) ل سەنتەرێ كونفرانسان ل زانكۆیا دهۆك گێرا.
د پەیڤەكی دا، راگرێ كولیژا زانستێن مرۆڤایەتی د. مزگین محەمەد حەسەن باس ل گرنگیا گێرانا ڤان جۆرە چالاكیان كر و دیاركر كو پشكا مێژوویێ و هەمی پشكێن دی یێن زانستی پێدڤیە پویتەی بدەنە بابەتێن ڤەكۆلینان، ب تایبەتی ژی پشکا مێژوو، چونکو گەلەک رووبەر ل مێژوویا کوردی هەنە پێدڤیە پتر بهێنە ڤەکۆلین.
لدویڤدا هاریكارێ سەرۆكێ زانكۆیا دهۆك بۆ كاروبارێن زانستی و خواندنا بلند د. لوقمان هادی حەسەن د پەیڤەكی دا ئاماژە دا بابەتێ مێژوویێ و پەیداكرنا ژێدەران بۆ ڤەكۆلینان و گرنگیا هەبوونا ڤەكۆلینێن زانستی د بیاڤێ مێژوویێ دا.
سەرۆكێ پشكا مێژوویێ ل كولیژا زانستێن مرۆڤایەتی و سەرپەرشتێ ڤێ سمپۆزیومێ د. فەرهاد محەمەد د پەیڤەكی دا گۆت: "پێدڤیە وەزارەتا خواندنا بلند لدویڤ پێشڤەچوونێن سەردەمیانە سەرەدەریێ دگەل ژێدەرێن مێژوویی و بابەتێن مێژوویێ بكەت، چونكو ڤەكۆلەرێن مێژوویێ ئاستەنگان دبینن هەتا دگەهنە هندەك بابەتان و ڤەكۆلینێن خۆ لدۆر دكەن".
د ڤێ سمپۆزیومێ دا پەنەلەكێ زانستی لدۆر چوار تەوەران هاتە گەنگەشە كرن، ئەوژی بەلگەنامەیێن مێژوویی، كو تێدا باس ل گرنگیا بكارئینانا بەلگەنامێن مێژوویی د ناڤ نڤیسینێن مێژوویی دا هاتە كرن، كو وەسا بهێنە پاراستن ڤەكۆلەر مفایی ژێ ببینن، د تەوەرێ دووێ دا باس ل بابەتێ رۆژنامەڤانیێ هاتە كرن وەكو ژێدەرەكێ رەسەن د ڤەكۆلینێن مێژوویی دا، د تەوەرێ سێیێ دا باس ل بیرهاتنێن كەسایەتی و مێژوویا زارەكی هاتە كرن وەكو ژێدەر بۆ ڤەكۆلینێن مێژوویی ب تایبەت مێژوویا نوی و هەڤچەرخ. د تەوەرێ دویماهیێ دا ژی باس ل كار و رۆلێ وەزارەتا خواندنا بلند و ڤەكۆلینێن زانستی د بیاڤێ پێشخستنا ڤەكۆلینێن مێژوویی دا هاتە كرن و دانانا پلانان بۆ پێشخستنا ڤی بیاڤی د ئایندەی دا.
ل دویماهیێ دانوستاندنان دەستپێکر و مامۆستا و بسپۆر و قوتابیێن پشکدار پرسیار و تێبینی و زێدەکرنێن خۆ لدۆر هەر چوار تەوەرێن پەنەلی ئاراستەکرن و دانوستاندنێن فراوان هاتنە ئەنجامدان.