سەرۆکێ زانکۆیا دهۆک پشکداری د رێورەسمێن سالڤەگەرا ئێکەتیا قوتابیێن کوردستانێ دا کر
Feb. 20, 2022, 7 p.m.

د. داوود سلێمان ئەترووشی سەرۆکێ زانکۆیا دهۆک ب یاوەریا هەردوو هاریکارێن سەرۆکێ زانکۆیێ د. ئەحمەد محەمەد سالح و د. مێڤان عارف، بۆ پشکداریکرنێ د رێورەسمێن پیرۆزکرنا جەژنا قوتابیان دا، کو ئەڤرۆ ب هەلکەڤتا ٦٩ سالییا دامەزراندنێ هاتنە گێران، سەرەدانا بارەگایێ ئێکەتیا قوتابیێن کوردستانێ کر و پیرۆزباهیێن سەرۆکاتیا زانکۆیێ پێشکێشکرن و پتر نویبوون و پێشڤەچوونێ بۆ خوازت.


د ڤان رێورەسمان دا و ب ئامادەبوونا بەرپرسێ لقا ئێک یا پارتی دیموکراتی کوردستان رێزدار سەربەست تروانشی و هژمارەکا کارگێر و ئەندامێن لقێ، هەروەسا ب ئامادەبوونا سەرۆکێ زانکۆیا نەورۆز د. عەبدولوەهاب خالد، سەرۆکا زانکۆیا پۆلی تەکنیکی-دهۆک د. ئاری عادل، سەرۆکێ زانکۆیا جیهان د. زێرەڤان عەبدولموحسن و بەرپرس و کارگێرێن لقێن دهۆک و زانکۆ یێن (ی.ق.ک.) و ب بەرهەڤبوونا هژمارەکا قوتابیان، کێکا ئاهەنگێ هاتە بڕین و بەرپرسێ لقا ئێک پەیڤەکا کورت پێشکێشکر و تێدا خوینا شەهیدان و کەدا پێشمەرگەیان بلند نرخاند و پیرۆزباهیێن خۆ ئاراستەی ڤێ قوتابیان کرن.


دهێتە زانین کو د رۆژا ١٨ی شوباتا ئەڤ سالە دا، د. داوود ئەترووشی سەرۆکێ زانکۆیا دهۆک پەیامەکا پیرۆزباهیێ ئاراستەی ئێکەتیا قوتابیێن کوردستانێ و ئێکەتیا لاوێن دیموکراتا کوردستانێ کر و ئاماژە ب رۆلێ وان یێ گرنگ دا و داخوازیێن هاندانا قوتابیان دەربرین بۆ پتر گرنگیدانێ ب زانین و ئاڤاکرنا شیان و دەستهەلیان ژ لایێ قوتابیان ڤە. هەروەسان باس ل گرنگیا پتر پشتەڤانیکرنا (ی.ق.ک.) ب پلان و سیاسەتێن نوی یێن زانکۆیا دهۆک کر.