د چارچۆڤێ سەرەدانەکێ دا بۆ پشکا شینواران ل کولیژا زانستێن مرۆڤایەتی ل زانکۆیا دهۆک، د. داوود سلێمان ئەترووشی، سەرۆکێ زانکۆیا دهۆک و ب ئامادەبوونا د. مزگین محەمەد حەسەن راگرێ کولیژا زانستێن مرۆڤایەتی، کۆمبوونەک دگەل ستافێ پشکا شینواران، وەکو پشکەکا نوی یا زانستی ل زانکۆیا دهۆک، ئەنجامدا.
دڤێ کۆمبوونێ دا سەرۆکا پشکا ناڤبری د. ژیار سدیق باس ل هزرا ڤەکرنا پشکا شینوارا و قوناغێن پێشڤەبرنا ڤێ هزرێ و پشتەڤانیا راگریا کولیژا زانستێن مرۆڤایەتی کر تاکو گەهشتینە ئارمانجێ و پشکەکا تایبەت ب شینواران ڤە ل زانکۆیا دهۆکێ هاتیە ڤەکرن. دیسان باس ل پشتەڤانیا بێسنوورا سەرۆکاتیا زانکۆیێ بۆ ڤەکرنا ڤێ پشکا زانستی کر. ژ لایێ خۆ ڤە، سەرۆکێ زانکۆیا دهۆک ئاماژەدا شارستانیەتێن دێرینێن دەڤەرا مە کر و گرنگیا هەبوونا پشکەکا زانستیا تایبەت ب ڤەکۆلین و هەلکۆلانێن شینواران ڤە. هەروەسا بەرهەڤیا سەرۆکاتیا زانکۆیێ بۆ هەر پشتەڤانیەکێ دەربڕی بۆ سەرئێخستا ڤێ پشکێ.
هەر د ڤێ سەرەدانێ دا، سەرۆکێ زانکۆیا دهۆک دگەل قوتابیێن پشکا شینواران کۆمبوو و لدۆر گرنگیا ڤێ بسپۆریێ ئاخڤت و گۆت: "ئەڤێ پشکێ گرنگیەکا مەزن هەیە، گرنگە هوینێن خۆشتڤی د ڤان ٤ سالێن خواندنێ دا هەمی رێکا بکاربینن کو زانینێ د ڤی بواری دا بدەستخۆڤەبینن، چونکو پشتبەستنەکا مەزن دێ لسەر هەوە هێتەکرن بۆ ڤەدیتنا پشکەکا بەرزەیا دیرۆکا مە". هەروەسا سەۆکێ زانکۆیا دهۆک گوهداریا پرسیار و تێبینیێن قوتیێن ڤێ پشکێ کر و دانوستاندن دگەل ئەنجامدا.
هەژی گۆتنێ یە کو د ڤێ سالا خواندنێ دا، پشکا شینواران ل کولیژا زانستێن مرۆڤایەتی یا زانکۆیا دهۆک هاتیە ڤەکرن و ٤٦ قوتابی لێ هاتینە وەرگرتن و وانێن تیۆری و پراکتیکی لدۆر شینوارناسیێ هەلکۆلان و ڤەکۆلینێن شینواری و هندەک بابەتێن دی یێن پەیوەندیدار لێ دهێنە خواندن.