سەرۆکێ زانکۆیا دهۆک د. داوود سلێمان ئەترووشی سەرەدانەک بۆ پشکا هۆنەرێن شێوەکاری ل کولیژا زانستێن مرۆڤایەتی یا زانکۆیا دهۆک ئەنجامدا. د ڤێ سەرەدانێ دا و ب ئامادەبوونا راگرێ کولیژێ د. مزگین محەمەد حەسەن، سەرۆکێ پشکا هۆنەرێن شێوەکاری م. دلگەش جاسم باس ل هویرکاریێن کارێ پشکا هۆنەرێن شێوەکاری کر و بەرهەمێن هۆنەریێن پایەبلندێن یێن ژ لایێ قوتابی و مامۆستایێن ڤێ پشکێ ڤە دهێنە دروستکرن نیشاندان. پاشی ئاماژەدا هندەک کێماسیان د بوارێ کەلوپەلێن پێدڤی بۆ کارێ شێوەکاریێ و ب تایبەتی کێماسیێن د بوارێ ستاندێن دروستکرنا تابلۆیان دا. ژ لایێ خۆ ڤە سەرۆکێ زانکۆیێ بەرهەڤیا سەرۆکاتیا زانکۆیێ دیارکر بۆ دابینکرنا هەر ئامیرە و کەلوپەل و کەرستەکێ پێدڤی بۆ ڤێ پشکێ.
پاشی د. داوود ئەترووشی گەریانەک لناڤ هۆلێن وێنەکێشانێ ئەنجامدا و ژ نێزیک کار و بەرهەمێن قوتابیێن ڤێ پشکێ دیتن و دانوستاندن لدۆر کار و بەرهەمێن شێوەکاری دگەل قوتابیێن ڤێ پشکێ ئەنجامدان. لدۆر بەرهەمێن قوتابیێن ڤێ پشکێ سەرۆکێ زانکۆیێ گۆت: "ئەز سەرسامم ب ئاستێ بلندێ داهێنانێ لدەف قوتابیێن ڤێ پشکێ! بەرهەمێن وان د ئاستەکێ بلند دانە و ئەم وەکو سەرۆکاتیا زانکۆیا دهۆک دێ پشتەڤانێن ڤان بەرهەمێن هۆنەریێن پایەبلند و ڤان قوتابیێن بەهرەمەند بین".
ل دویماهیێ سەرۆکێ زانکۆیێ ئاماژەدا وێ یەکێ کو زانکۆیا دهۆک پلانێن تایبەت هەنە بۆ پشتەڤانیا بوارێ هۆنەری ل زانکۆیا دهۆک و دابینکرنا هەر پێداویستیەکێ بۆ ئاڤاکرنا قوتابیەکێ داهێنەر د بوارێ هۆنەری دا.