شاندەكێ‌ زانكۆیا دهۆك سەرەدانا زانكۆیا پوتسدام یا ئەلمانی كر
Dec. 2, 2021, 11:51 a.m.

ل رۆژا 26/11/2021 د چارچوڤێ پرۆگورامێ‌ هەڤپشك دا دناڤبەرا زانكۆیا دهۆك و زانكۆیا پوتسدام ل ئەلمانیا ، شاندەكێ زانكۆیا دهۆك سەرەدانا زانكۆیا پوتسدام كر، و بوو ماوێ‌ حەفتیەكێ‌ هژمارەكا چالاكیان ئەنجام دا.
رێڤەبەرێ‌ سەنتەرێ‌ بێشكچی د. نشوان شكری دیاركر رۆژا 1/12/2021 ل زانكۆیا پوتسدام رێورەسمێن دانەنیاسینا پەرتوكا (فەرمانا 74) ێ ب ئامادەبوونا بالیوزێ عێراقێ ل بەرلین بەرێز، لقمان فەیلی، و شاندێ بالیوزخانێ‌ و كومەكا ڤەكولەر و رۆژنامەڤان و رەوشەنبیرا ئامادەبوون.
د. نشوان شكری، ل دور ڤێ‌ چالاكیێ‌ گوت" د. هانس گیورك ولف، راگرێ كولیژا فەلسەفێ ل زانكۆیا پوتسدام پەیڤەك ل دۆر گرنگیا پەرتوكا (فەرمانا 74) ێ پێشكێش كر، و هەروەسا بالیوزێ عێراقێ باس ل گرنگیا گوهارتنا كلتوری و زانستی دناڤبەرا زانكۆیێن ئەلمانی و عێراقی ب تایبەت دگەل زانكۆیێن كوردستانێ كر، و سوپاسیا وەلاتێ ئەلمانیا كر كو پێشوازیا هزاران قوربانێێن جینوسایدا ئێزدیا كریە.
رێڤەبەرێ‌ سەنتەرێ‌ بێشكچی دیاركر" خانم زەنفیرا دلوڤانی، سەرۆكا جڤاتێن كومەلەیێن ئێزدی ل ئەلمانیا بەحس ل دیرۆكا فەرمان و ژناڤبرنا ئێزدیان و بەرخودان و پارستنا ئولێ ئێزدی كر و گەلەك ب گرنگ دیت كو ئەڤ پەرتوكە ب زمانێ ئەلمانی هاتیە دەركرن داكو خواندەڤان و جڤاكا ئەلمانی پتر ئاگاداری جینوسایدا ئێزدیان ببن، هەردڤێ‌ چالاكیێ‌ دا، د.ستیفن گاتسهامەر، كو ئێك ژ سەرپەرشتێن ئامادەكرنا پەرتوكێ یە ل سەر ناڤەروك و چەوانیا ئەنجامدانا پروژێ و وەرگێران و چاپكرنا پەرتوكێ ب زمانێ ئەلمانی شلوڤەكر، و خانم، لیلیت رویتر، ژ زانكۆیا پوتسدام باس ل قورتالبووێن ئێزدی و گرنگیا پێزانینێن وان كر، هەروەسا داوود خەتاری، ل سەر چەوانیا ئامادەكرنا پەرتوكێ ئاخفت، و وەرگێر، شەوقی عیسی، ل سەر سەربورا خو یا وەرگێرانا پەرتوكێ ژ زمانێ عەربی بوو زمانێ ئەلمانی بەحس كر، دیسان خانم، تركو گرێت بدو، كو یەك ژ قوتالبوویێن جینوسایدا ئێزدیانە ل سەر ئێش و ئازارو و نەخوشیێن خو یێن سێ سالا د دەستێ داعش بەحسكر.
هەر دڤێ‌ سەرەدانا شاندێ‌ زانكۆیا دهۆك هژمارەكا چالاكیێن دی هاتنە ئەنجام دان ژوانا، گەنگەشە هاتە كرن ل سەر پروژێ ئامادەكرنا نەخشەكێ دجیتال ل دۆر جهێن ئاینی ل باژێرێ هەولێرێ، و سەرەدانا دەزگەهێ (DAAD) یێ گوهارتنا ئەكادیمی ل باژێرێ پوتسدام، هەروەسا روینشتنەك هاتە ئەنحام دان دناڤبەرا رێكخەرێن زانكۆیێن پشكدار دڤی پرۆگورامی ژ بوو گەنگەشەكرنێ ل سەر پرۆژێن هەڤپشكێن پاشەروژێ.
دهێتە زانین شاندێ‌ زانكۆیا یێ‌ پێكهاتی بوو ژ دوو قوتابیا و سێ ماموستا ژ سەنتەرێ بێشكچی و سەنتەرێ ڤەكولینێن جینوسایدێ.